Aguah anei, Ti wăl anôk kriê pioh hƀuê ênuk ala čar Sang yang Hùng ( čar Phú Thọ), mkŏ mjing knăm bi hdơr hruê djiê mtao Hùng leh anăn myơr mnga ti knưng rup krah “Awa Hôg blŭ hrăm hŏng knuă druh, lĭng kahan Đại đoàn Quân Tiên Phong”. Hlăm hƀuê ênuk mkŏ mjing leh anăn răng mgang lăn čar, hdră bhiăn hdơr kơ ai đru mơ̆ng aduôn aê tâo tiết jing leh klei kă, anôk knang hlăm ai tiê, ai ktang mơ̆ng klei bi mguôp djuê ana, mkŏ mjing boh tŭ mâo anăn Việt Nam hlăm klei bi mguôp hlăm bruă bi mdrơ̆ng hŏng klei truh yan adiê, klei jŭ jhat, răng mgang leh anăn mkŏ mjing lăn čar. Ai ktang mơ̆ng knăm bi hdơr hruê djiê mtao Hùng msĕ si klei blŭ mơ̆ng ai tiê grăp čô mđing truh kơ phŭn agha, kơ lăn čar hŏng dua boh blŭ Djuê ana. Knăm hdơr djiê mtao Hùng amâo djŏ knŏng jing hruê knăm prŏng mơ̆ng djuê ana, ƀiădah lŏ jing wưng bi lar ai tiê khăp kơ lăn čar, klei mĭn čŏng pô leh anăn klei hmăng hmưi kpưn đĭ - msĕ hŏng awa Hồ mtă: “Phung mta Hùng mâo ai rŭ mdơng lăn čar, drei srăng hrăm mbĭt răng mgang lăn čar”.

Êlâo kơnăn, mơ̆ng hruê 17/4 (1-3 Bính Ngọ), Hdră bi hdơr hruê djiê Mtao Hùng  -Knăm sang yang Hùng leh anăn Hruê kăm dhar kreh - hiu čhưn ênguê Lăn phŭn 2026 mkŏ mjing leh lu hdră prŏng ti Anôk kriê pioh hƀuê ênuk Sang yang Hùng leh anăn dŭm să, ƀuôn hgŭm ti čar Phú Thọ. Hdră thŭn anei mâo lu mta mrâo, bi mguôp plah wah kriê pioh knhuah gru leh anăn pŏk mlar klei bi mjĕ tar rŏng lăn

Anei jing thŭn tal êlâo čar Phú Thọ mkŏ mjing klei rang mdah rup kač prŏng, hưn mdah rup lăn čar hŏng mah jiăng tar rŏng lăn. Lu mta bruă dhar kreh knhuah gru dưi lŏ rơ̆ng leh anăn mkŏ mjing hơ̆k mơak msĕ si: Knăm pơ̆ng nưh dhar kreh, hưn mdah dŭm mta mnơ̆ng dhơ̆ng alŭ wăl, Klei kdŏ mmuñ mnuih ƀuôn sang, Klei bi lông đŭng điŏ - bêñ giầy…Knăm myơr brui mgưi bi hdơr phung mtao Hùng mơ̆ng dŭm să, ƀuôn hgŭm hlăm čar Phú Thọ dưoi mkŏ mjing hluê 18 să, ƀuôn prŏng.

Sa hlăm dŭm mta kñăm mơ̆ng Knăm mơak dhar kreh êlan klông dưi krŭ wĭt. bruă anei mkŏ hŏng hdră “Khuah siam bruă hiu čhưn ênguê Lăn phŭn”, đru iêo jak lu mnuih ƀuôn sang leh anăn phung tuê nao hgŭm, mbĭt anăn kriê pioh, pŏk mlar dhar kreh jăk siam mơ̆ng krĭng lăn Phŭn - Phŭn agha djuê ana Việt Nam, Găl guôp hŏng hdră tă mđĭ kyar dhar kreh hluê si Hdră mtrŭn mrô 80 mơ̆ng Phŭn bruă kđi čar.

Klei đăo kkuh kơ Mtao Hùng mâo UNESCO čih yap jing mnơ̆ng kriê pioh dhar kreh amâo mâo êdah klă mơ̆ng anak mnuih mơ̆ng thŭn 2012. Hruê bi hdơr hruê djiê mtao Hùng jing sa gru hmô hƀuê ênuk amâo mâo ôh hŏn lu ala čar djuê ana dlông rŏng lăn.

Khuah phŭn mơ̆ng Knăm mơak bi êdah 4 mta phŭn: Klei ngă anak, mñăm êa hdơr kơ hnoh, klei thâo săng kơ phŭn agha leh anăn bi êdah klei mdê mơ̆ng klei đăo kkuh kơ aduôn aê tâo tiêt mơ̆ng mnuih Việt Nam. K’iăng khua nao prŏng nao prĭn Bùi Hoài Sơn, pô bi ala klam bruă dhar bruă dhar kreh - mtô mjuăt bi hriăm mơ̆ng Bruă Kbĭn ala lač:

 “ UNESCO bi myuôm bruă klam dŭm êpul êya dŭm djuê ana Việt Nam hlăm bruă bi mni sa klei đăo kkuh kơ Mtao Hùng jing klei bi hmô djuê ana.

Leh anăn klei bi hmô djuê ana anăn mkŏ mjing klei bi mguôp kơ lăn čar anei leh anăn đru kơ drei mâo sa knhuah gru krŭ kdơ̆ng mkŏ mjing lăn čar leh anăn răng mgang lăn čar truh kơ ară anei. Leh anăn sa klei mkăn mâo UNESCO bi myuôm anăn jing klei đăo kkuh kơ Mtao Hùng mơ̆ng hlăm hƀuê ênuk mkŏ mjing ƀiădah truh kơ ară anei ăt dưi mâo dŭm êpul êya dŭm djuê ana Việt Nam djă pioh./.