VOV4.Êđê- Mbĭt hŏng dŭm hruê knăm, hlăm wưng bi hdơr hruê mkŏ mjing ala čar mrâo êgao, dŭm anôk hiu čhưn ênguê ti čar Dak Lak mâo lu phung tuê nao čuă dlăng. Mâo đa đa anôk hiu čhưn ênguê, sang hƀuê ênuk êgao knŭk kna mrâo pŏk hŏng dŭm knhuah mdê hjăn kơ dhar kreh dŭm djuê ana mnuih djuê ƀiă mâo lui phung tuê hiu čhưn ênguê hlăm leh anăn êgao čar ktuê dlăng, čuă dlăng.

Gưl knăm mơak, leh nao hiu ti dŭm anôk hiu čhưn dlăng ti krĭng mâo êman hlăm Dak Lak ti să Čư̆ Êbur, ƀuôn prŏng Ƀuôn Ama Thuôt, ayŏng Võ Lê Trung Hiếu, ti ƀuôn hgŭn Tân Lợi, ƀuôn prŏng Ƀuôn Ama Thuôt lŏ dơ̆ng dôk dlăng ti rup êman čiăng hmư̆ klei hưn mthâo, dlăng hră mơar kơ êman dưi hiu duah, mdah tinei. Ayŏng Hiếu brei thâo, amĭ kkiêng kơ ñu leh anăn hriê kơ prŏng ti Dak Lak, anôk mâo lu êman ƀuôn lu hĭn ti Việt Nam.

Phung tuê hiu dlăng rup êman dưi dưm ti mtih

Khădah, ară anei ênoh êman ƀuôn ƀrư̆ ƀiă leh anăn mduôn, bruă kriê pioh rup, klei bi knăl kơ êman ƀrư̆ jing yuôm bhăn, đru kơ phung ka tuôm ƀuh êman dưi thâo bi mĭn hŏng klei ênưih. Ayŏng Hiếu jing sa čô khăp hiu duah mnơ̆ng đưm, mnơ̆ng hin yuôm anăn ñu khăng hriê tinei ksiêm hriăm. Võ Lê Trung Hiếu brei thâo:

        Kâo khăng pioh mmông hriê tinei čiăng ksiêm hriăm klei thâo kơ mnơ̆ng đưm jing msĕ si rup êman ti krĭng lăn êman. Tinei rang mdah lu mnơ̆ng dhơ̆ng mâo ênoh yuôm leh anăn mâo lu mnơ̆ng hin. Wăl kriê pioh tinei snăn mâo lu mta mnơ̆ng đưm, klei bi hdơr, djŏ guôp hŏng phung khăp mnơ̆ng đưm leh anăn dŭm mnơ̆ng đưm dưi mâo jing jăk snăk.

Ayŏng Võ Minh Luân hưn mthâo kơ klei bră leh anăn mnơ̆ng dưm ti rŏng êman hŏng hmôk kyâo

 Dưi pŏk ƀăng sa mlan hŏng anei, anôk hiu čhưn dlăng krĭng êman Dak Lak khăng drông lu phung tuê hiu čhưn dlăng, mă rup leh anăn bi trông kơ mnơ̆ng dhơ̆ng dưm. Ayŏng Võ Minh Luân, Khua anôk hiu čhưn dlăng brei thâo, tinei ară anei mâo dŭm êbâo rup êman hŏng hlăm brô 200 mta rup mdê mdê, dưi ngă lu mta mnơ̆ng msĕ si rup hŏng lăn čuh, kyâo, msei, jing dŭm mta mnơ̆ng hŏng lăn čuh hing ang Chu Đậu, Thổ Hà, Bát Tràng, Biên Hòa, Lái Thiêu, Thành Lễ. Jăk siam hĭn jing rup êman hŏng êbeh 2000 rup êman hŏng lăn čuh jăk siam dưi mjing sa rup prŏng.

Hưn mthâo kơ hdră kriê pioh rup êman hŏng lăn čuh prŏng hĭn Lăn Dap Kngư̆

 Hlăm 10 thŭn êgao, ayŏng Luân hiu duah hră mơar, mnơ̆ng dhơ̆ng ktur rup êman čiăng bi lu jơr mnơ̆ng pô pioh, hưn mthâo, hưn mdah lar ƀar hŏng mnuih ƀuôn sang leh anăn tuê hiu čhưn. Hŏng anăn pia “Krĭng lăn êman Dak Lak”, ayŏng Luân čang hmăng klei hâo hưn kriê pioh dhar kreh djuê ana, pioh rup êman ti krĭng Lăn Dap Kngư srăng dưi lar bra ktang.

        Pô čang hmăng hŏng lu hdră, hŏng bruă sang čư̆ êa alŭ wăl, pô hưn mthâo klei hâo hưn hŏng jih jang mnuih ƀuôn sang leh anăn tuê hiu čhưn brei hrăm mbĭt kriê pioh rup êman. Mơ̆ng dŭm mta rup êman snei snăn Luân ăt čang hmăng hưn mdah klei anăn čiăng si bĕ ngă kơ jih jang mnuih thâo leh anăn pô kriê pioh rup êman, čiăng ñu amâo luič ôh ti krĭng lăn tinei.

Sang kriê pioh mnơ̆ng dhơ̆ng Ama H’Mai ti krah đang kyâo

Ăt jing anôk ba lu klei dhar kreh djuê ana, Sang kriê pioh leh anăn homestay Ama H’Mai, ti ƀuôn Kmrơ̆ng Prŏng B, să Ea Tu, ƀuôn prŏng Ƀuôn Ama Thuôt mjing kơ phung tuê klei jĕ giăm, hơuh mđao. Hŏng klei mkra mjing wăl kriê pioh hlue si sang dlông djuê ana mnuih Êđê, hdră dăp hŏng kpan, rĭng čing, čeh đưm leh anăn kpur pui. Mbĭt hŏng anăn jing anôk rang mdah, pioh dŭm êbâo mta mnơ̆ng djŏ tuôm kơ klei hdĭp mda, ai tiê, kdrăp ngă bruă pla mjing, kdrăp bi siam, lua nah... mơ̆ng dŭm djuê ana krĭng Lăn Dap Kngư hŏng lu mta mnơ̆ng hin yuôm.

Mẫn Phong Sơn, Khua sang kriê pioh leh anăn homestay Ama H’Mai brei thâo, amâo djŏ knŏng hjăn phung tuê mơ̆ng kbưi hriê čhưn dlăng leh anăn dôk jưh, grăp hruê tinei drông lu snăk mnuih ƀuôn sang hdĭp riêng gah. Boh nok hlăm aguah ưm, sĭt kpur pui trơ̆ng, asăr kphê đeh hŏng kngan ƀâo mngưi dưi kwă leh anăn kar hlăm kdô mnal. Grăp čô dôk mnăm kphê tui si klei pô čiăng, dlăng mnơ̆ng mưng mâo, bi yăl dliê kơ dŭm mta mnơ̆ng dhơ̆ng tuôm mâo hlăm klei hdĭp grăp hruê. Hlue si Mẫn Phong Sơn, anăn jing ênoh yuôm ai tiê đru mguôp bi lar bra klei khăp hŏng dhar kreh ti krah klei hdĭp mrâo mrang.

        Mơ̆ng leh sang kriê pioh hmei mkŏ mjing snăn mă klei mnuih ƀuôn sang čiăng jing phŭn ngă bruă mơ̆ng sang kriê pioh. Êngao kơ pioh kơ mnơ̆ng dhơ̆ng yuôm hin snăn lŏ jing klei hâo hưn, kơ klei hdĭp mnơ̆ng dhơ̆ng ai tiê anak mnuih tinei. Kâo mđing snăk kơ klei bhiăn hdĭp mda leh anăn dhar kreh anak mnuih tinei. Anăn jing tur knơ̆ng kơ Sang kriê pioh Ama H’Mai.

Mẫn Phong Sơn, dôk tal 2 mơ̆ng nah hnuă hưn mthâo hŏng hŏng tuê kơ wăl dhar kreh ti sang kriê pioh mnơ̆ng dhơ̆ng Ama H’Mai

       Hŏng dŭm knăm mơak djuê ana dưi mkŏ mjing ti lu anôk hlăm čar, phung tuê lŏ hriê ti Dak Lak hlăm gưl knăm mơak mrâo êgao mâo klei găl ksiêm hriăm leh anăn lông dlăng lu hĭn kơ knhuah jăk siam mơ̆ng dhar kreh djuê ana tinei. Hŏng hdră nao mrâo mđing kơ klei bhiăn dhar kreh čiăng mjing klei kñăm, lu anôk ghiu čhưn ênguê leh anăn sang kriê pioh êngao knŭk kna ti Dak Lak dôk đru mguôp bi lar bra klei hâo hưn kơ klei khăp dhar kreh, đru kriê pioh, mđĭ lar dŭm ênoh dhar kreh hlue si hdră mrâo mrang, jĕ giăm leh anăn ba ai êwa klei hdĭp lu hĭn./.

Pô mblang: H’Zawut Ƀuôn Yă