Klei bi kƀĭn trông mâo lu phung văn nghệ sĩ, nai mtô, knuă druh, lĭng kahan lehanăn sinh viên nao hgŭm, bi trông kơ dŭm boh tŭ yuôm mơ̆ng dŭm klei čih kơ Khua gĭt gai Hồ Chí Minh lehanăn bruă klam mơ̆ng dhar kreh dlăng hră hlăm klei ksŭl mbŭ klei mĭn hdĭp, ai tiê čŏng pô gĭr tui hriăm kơ ênuk gưl hđeh ară anei. Lu klei blŭ lač, hlăm ênuk gưl mrô, bruă dlăng hră čih kơ Awa amâo djŏ knŏng đru kơ ênuk gưl hđeh lŏ thâo săng kơ hƀuê ênuk djuê ana ƀiădah lŏ đru mkŏ mkra pŏk rup mjing knhuah hdĭp, knhuah dôk dơ̆ng ƀơ̆ng huă lehanăn klei đua klam hŏng êpul êya. Hluê si Thạc sĩ Nguyễn Thị Phương, Nai mtô Sang hră gưl prŏng Luật Hà Nội ti Dak Lak, bruă dlăng dŭm klei čih kơ Awa ară anei amâo djŏ knŏng hluê hŏng hdră čih ƀiădah mâo lu hdră dlăng mkăn djŏ guôp hŏng ênuk gưl hđeh.

“Dhar kreh dlăng hră jing jăk leh. Khă snăn ară anei, drei amâo guôn blei hdruôm hră dlăng ôh ƀiădah drei dưi hmư̆, msĕ si VOV Live, dlăng phim amâo dah dŭm hdră bruă hưn mthâo kơ hƀuê ênuk. Anei ăt jing sa hdră čiăng kơ drei tui ksiêm klei hâo hưn”.

Ti anôk bi kƀĭn trông, nghệ sĩ, pô mă bruă ksiêm dlăng kơ dhar kreh Linh Nga Niê Kđăm hưn mdah leh lu klei bi hdơr hlăm dŭm blư̆ dưi bi tuôm hŏng Awa Hô, mơ̆ng anăn bi mklă pŏk rup mơ̆ng sa čô khua gĭt gai prŏng kdrưh, jăk ênang, jĕ giăm, bŏ hŏng klei khăp kơ mnuih ƀuôn sang, hđeh êlăk. Ñu bi êdah klei mĭn, dŭm klei čih kơ Awa Hô ăt dôk mâo ai lar bra hlăm ênuk gưl hđeh hruê anei.

“Kâo čang hmăng dŭm klei yăl dliê hruê anei amâo djŏ knŏng bi hdơr pŏk rup Khua gĭt gai Hồ Chí Minh, pô mă bruă dhar kreh êdah kdlưn tar rŏng lăn, ƀiădah lŏ ba klei khăp mơai kơ phung mda asei tui ksiêm dŭm pŏk hră čih kơ Awa Hô čiăng lŏ mâo hdră tă kơ klei hdĭp lehanăn klei mĭn đĭ kyar mơ̆ng pô.

Mbĭt hŏng hdră bi kƀĭn trông, lŏ mâo klei kưt mmuñ, vọng cổ lehanăn mjĕ mjuk tui ksiêm kơ klei hdĭp, hdră mă bruă mơ̆ng Khua gĭt gai Hồ Cí Minh, jak iêu lu phung sinh viên nao hgŭm. Quản Phạm Anh Thương brei thâo, hdră lŏ đru kơ phung sinh viên thâo săng hĭn kơ klei hdĭp, ktuê êlan mă bruă cách mạng mơ̆ng Awa Hô ăt msĕ mơh klei tŭ yuôm mơ̆ng hdră dlăng hră lehanăn mjuăt bi hriăm pô.

 “Mmông bi mjĕ mjuk, kƀĭn trông yuôm bhăn êdi. Kâo dưi dlăng dŭm hdruôm hră čih kơ Khua gĭt gai Hồ Chí Minh, dưi bi tuôm hŏng phung čih klei yăl dliê, klei duê lehanăn ƀĭng dlăng hră hŏng dŭm klei mĭn, kiêng dlăng mdê mdê kơ dŭm pŏk hră čih kơ Awa, dưi thâo săng hĭn kơ klei hdĭp, ktuê êlan mă bruă mơ̆ng Awa”.

Hluê si pô čih klei yăl dliê Niê Thanh Mai, Khua êpul hgŭm bruă Văn học Nghệ thuật čar Dak Lak, bruă bi lar dŭm klei čih, klei mmuñ lač kơ Awa srăng dưi hluê ngă hŏng lu hdră čiăng ba boh tŭ yuôm klei mĭn, knhuah mă bruă, knhuah hdĭp mngač mơ̆ng Hồ Chí Minh truh giăm hĭn hŏng êpul êya.

“Mđrĭng hŏng dŭm bruă dưi hluê ngă klă anăp snăn hmei ăt mă asăp dŭm klei duê, klei čih, klei mmuñ lač kơ Awa lehanăn ba mơĭt kơ dŭm anôk bruă, hlăm anăn mâo dŭm ƀuôn hgŭm lehanăn hmei ăt mă bruă ti dŭm anôk krư̆ kđăl čăng dưi mđing dŭm hdră anei hluê kdrăp mđung asăp truh hŏng jih jang mnuih”.

Klei bi kƀĭn trông amâo djŏ knŏng ksul mbŭ klei khăp hŏng Khua gĭt gai Hồ Chí Minh ƀiădah lŏ bi lar dhar kreh dlăng hră hlăm êpul êya, boh nik ênuk gưl hđeh. Mơ̆ng dŭm pŏk hră, klei yăl dliê kơ Awa, hdră ba leh klei khăp mơai čiăng kơ grăp čô nao tui ksiêm kơ hdruôm hră msĕ si sa hdră čiăng tui ksiêm, hriăm mbŏ lehanăn rông ba klei čang hmăng dưi hdĭp jăk, hdĭp tŭ dưn./.