Dŭm hruê knhal jih hruê kăm, mơ̆ng aguah ưm, krĭng wăl knhuah gru Sang Tuôr Nhạn mâo leh lu mnuih ƀuôn sang lehanăn tuê hiu čhưn ênguê. Mnuih êbat jơ̆ng mjuăt ktang asei mlei, mnuih nao čuh brui mngưi, nao čhưn dlăng amâo dah đa đa dôk ti dlông čư̆ dlăng krông Dă Răng lehanăn ƀuôn prŏng Tuy Hòa mơ̆ng dlông. Ti krah wăl adiê jăk êđăp lehanăn hơĭt ênang, sang tuôr đưm dlăng siam êdi hŏng êa mil ƀrĭk tuil jiă knhuah rŭ mdơ̆ng Chăm Pa. Sa čô mnuih ƀuôn sang hiu êbat jơ̆ng tinei, brei thâo:

Tinei arăng khăp sơaĭ. Arăng hriê tinei êbat jơ̆ng mjuăt ktang asei mlei. Pô dôk kbưi ăt kreh hriê mơh tinei, grăp knăm năm, knăm kjuh amai adei bi jak hriê mjuăt ktang asei mlei čiăng jăk ai tiê klei mĭn pô”,

Hluê si mnuih ƀuôn sang alŭ wăl, krĭng “Čư̆ Nhạn” lehanăn Snag Tuôr Nhạn, êlâo adih jing anôk hdĭp mơ̆ng lu mta čĭm. Poưk rup êpul čĭm phiơr hlăm grăp blư̆ adiê tlam jing leh klei mưng arăng iêu kơ krĭng lăn anei. Sang Tuôr Nhạn dưi rŭ mdơ̆ng hlăm knhal ênuk gưl XI, akŏ ênuk gưl XII. Anei ăt jing sa hlăm dŭm anôk ăt mâo sang Tuôr dôk krơ̆ng kjăp klei mĭn đăo ngă yang kơ Thiên Y A Na.

Sang Tuôr Nhạn dlông giăm 24 met, dưi bi mklă jing Knhuah gru ala čar mdê hjăn. Amâo djŏ knŏng mâo boh tŭ yuôm hƀuê ênuk lehanăn hdră rŭ mdơ̆ng, tinei lŏ siă suôr hŏng klei hdĭp dhar kreh, klei mĭn đăo mơ̆ng mnuih ƀuôn sang alŭ wăl hlăm dŭm ênuk gưl. Dŭm thŭn giăm anei, wăl sang Tuôr dưi mkra prŏng, bi msiam, mjing klei găl kơ mnuih ƀuôn sang nao tui ksiêm, čhưn dlăng. Hluê si Nguyễn Thị Thục Oanh, ti ƀuôn hgŭm Tuy Hòa, hnơ̆ng tuê truh ti Sang Tuôr Nhạn ƀrư̆ hruê ƀrư̆ lu, boh nik hlăm yan bhang lehanăn dŭm knăm mơak.

 “Tinei ară anei gơ̆ mdê leh mkă hŏng êlâo adih, dưi mkra bi msiam lu anôk, ƀuh jăk hĭn, siam hĭn, dưi drông lu tuê hriê čhưn. Hlăm yan bhang mâo lu tuê hruê, phung hđeh mdei hriăm hră dôk ti sang, wưng anei hriê tinei lu mơh, amâo dah hlăm dŭm knăm mơak, têt hat, hruê Vía Bà lu snăk, tuê hiu čhưn hriê ăt lu êdi”.

Wăl anôk yuôm bhăn lehanăn dôk ti krah krĭng ƀuôn prŏng ktuê hang ksĭ mjing leh Sang Tuôr Nhạn mâo gru kruăk mdê hŏng lu tuê hiu čhưn tơdah truh ti krĭng Ngŏ čar Dak Lak. Mơ̆ng dlông čŏng čư̆ Nhạn, phung tuê hiu čhưn dưi ƀuh kluôm ƀuôn prŏng Tuy Hòa, krông Dă Răng lehanăn krĭng ksĭ mơ̆ng kbưi. Amai Tống Thị Hải Yến, tuê hiu čhưn mơ̆ng Phú Thọ, brei thâo:

 “Truh tinei kâo ƀuh jăk êdi. Anôk yuôm bhăn msĕ snei, ti krah krĭng ƀuôn prŏng ăt mâo lu mnuih hdĭp hlăm ênuk gưl mrâo, ƀiădah tinei kâo ƀuh mâo klei yuôm bhăn ngă kơ kâo ƀuh jăk êdi. Gưl tal êlâo kâo ƀuh sa hdră rŭ mdơ̆ng mâo mơ̆ng đưm, ênuk gưl 11 truh kơ ară anei ăt dôk siam, msĕ si dôk hrông msĕ hđăp đưm, kâo ƀuh hdră kriê pioh mơ̆ng knŭk kna jăk êdi”.

Hlăm hdră êlan mđĭ kyar bruă hiu čhưn ênguê mơ̆ng čar Dak Lak leh klei bi mŭt mbĭt, krĭng nah Ngŏ hŏng klei găl mâo êa ksĭ, knhuah gru dhar kreh lehanăn wăl anôk lăn adiê dưi bi mklă jing wăl anôk đĭ kyar bruă hiu čhưn ênguê yuôm bhăn. Hlăm anăn, Sang Tuôr Nhạn dưi dlăng jing gru kruăk bi mguôp hdră hiu čhưn ênguê dhar kreh, ai tiê klei mĭn lehanăn tui ksiêm kơ wăl anôk ƀuôn prŏng ktuê hang ksĭ. Trần Thị Bử, Kơiăng khua ksiêm dlăng wăl knhuah gru, Knơ̆ng bruă dhar kreh, mjuăt ktang asei mlei lehanăn hiu čhưn ênguê čar Dak lak, brei thâo:

 “Leh mâo klei bi mklă wăl knhuah gru Snag Tuôr Nhạn snăn Anôk kriê dlăng knhuah gru srăng mkra mnư̆ gang djiêu gah Sang Tuôr čiăng rơ̆ng klei êđăp ênang kơ tuê hiu čhưn hriê čhưn dlăng lehanăn čuh brui mngưi ti wăl knhuah gru. Anôk kriê dlăng knhuah gru ăt mâo hdră kčah ngă yang knăm Vía Bà grăp thŭn mkăp kơ tuê hiu čhưn, mnuih mâo klei čiăng hriê čuh brui mngưi ti Sang Tuôr Nhạn kñăm jak iêu lu tuê hiu čhưn hriê tinei”.

Ti krah klei hdĭp ênuk mrâo dôk bi mlih hlăm grăp hruê ti krĭng ƀuôn prŏng ktuê hang ksĭ, Sang Tuôr Nhạn msĕ si sa gru kruăk hƀuê ênuk, dhar kreh lehanăn ai tiê klei mĭn đăo mơ̆ng krĭng lăn nah Ngŏ čar Dak Lak. Leh yang hruê lĕ ti dlông čư̆ Nhạn, dlăng phă krông Dă Răng lehanăn ƀuôn prŏng ti ƀuôn hgŭm Tuy Hòa guh mngač pui, Sang Tuôr Nhạn msĕ si lŏ yăl dliê kơ klei bi mjĕ mjuk dhar kreh, kơ ai hdĭp mơ̆ng knhuah gru hlăm klei hdĭp hruê anei./.