Ti lu boh ƀuôn hlăm čar Lâm Đồng, čing čhar kwang nanao hlăm klei hdĭp ƀuôn sang; kdrăp čŭt hơô mâo mprăp nanao hlăm klei hdĭp aguah tlam mlam hrue, dŭm klei kưt muiñ ênhiang djuê ana, bruă đêč giêng, hrĭ mñam, amâodah knăm kơ klei hdĭp mâo djă pioh kơ anak čô. Dhar kreh dŭm djuê ana hlăm car mâo: K’ho, Mạ, Chu Ru, M’Nông, Chăm… ti čar Lâm Đồng amâo mâo djŏ knŏng mâo hlăk mphŭn dô ôh, ƀiădah ăt dôk djă pioh nanao hlăm grăp blư̆ huă ƀơ̆ng, nao pưk hma, thâodah hlăm klei dôk dơ̆ng ƀơ̆ng huă hŏng yang ƀuôn lehanăn lăn adiê. Pô mbruă Ka Duýp, ƀuôn hgŭm Đinh Trang Thượng, brei thâo:

 “Jing mnuih djuê ana K’ho, kâo ƀuh tơdah ară anei amâo lŏ bi kriê pioh ôh dhar kreh djuê ana pô mgi dih srăng luič ram yơh. Snăn bruă klam anăn, ti Đinh Trang Thượng, kâo kiă kriê sa êpul hgŭm tông čing čhar phung hđeh hriăm hră. Mơ̆ng bruă ngă điêt anăn, ăt  msĕ si sa kƀong pui čiăng kơ phung hdeh ƀuh klei tŭ dưn kơ dhar kreh pô, lehanăn bi kriê pioh. Mbĭt hŏng anăn, ti Đinh Trang Thượng lŏ dơ̆ng mâo lu êpul hgŭm mkăn, hŏng mta kñăm phŭn jing bi kriê pioh knhuah gru dhar kreh mnuih djuê ana K’ho”.

 Kră Jan K’Druynhs – sa čô pô mbruă dôk mda asei ti ƀuôn hgŭm Langbiang – Đà Lạt brei thâo, ñu mbĭt hŏng hlăm brô 20 čô êdam êra ti gŭ jơ̆ng čư̆ Lang Biang kreh nao hlăm êpul mdah hlăm alŭ wăl hiu čhưn ênguê Langbiang Land. Mâo dŭm ênhiang čing, klei kdŏ mơ̆ng djuê ana, êpul hmei mâo bi mguôp leh hŏng sa knhuah mrâo, ba hriê klei jĕ giăm hĭn, mơak mñai hĭn kơ tue ƀuh lehanăn dlăng, ƀiădah dưi kriê pioh ai tiê dhar kreh ƀuôn sang pô. ƀĭng hgŭm mâo leh klei kuôl kă mă bruă hơĭt ti alŭ wăl hiu čhưn ênguê anei, hŏng 3 gưl mdah hlăm sa hrue, kyuanăn mâo ênoh dưi ba wĭt hơĭt mơh.

Khua mduôn K’Keo, ƀuôn Hàng Làng, ƀuôn hgŭm Di Linh, čar Lâm Đồng brei thâo, dŭm thŭn êgao, Đảng lehanăn knŭk kna mjing nanao klei găl đru mnuih ƀuôn sang lŏ kơrŭ wĭt bruă dhar kreh djuê ana pô. Amâo mâo djŏ knŏng hlăm ƀuôn sang, čing čhar lŏ dưi ba mtô hlăm sang hră mơar, lehanăn mâo klei mjuăt bi hriăm hlăm lu êpul hgŭm dhar kreh. Mơ̆ng anăn, ƀrư̆ hrue mâo lu phung hđeh êdam nao tui hriăm tông čing. Tui si Khua mduôn K’Keo, klei lŏ mkŏ mjing dŭm knăm mơak huă êsei mrâo, jing wưng čiăng kơ anak čô lŏ čuê, djă pioh knhuah gru dhar kreh djuê ana.

“Kâo jing khua mduôn, mnuih mâo k’hưm hlăm krĭng mnuih djuê ƀiă, snăn čiăng lŏ kơrŭ wĭt knhuah gru dhar kreh anei, kñăm djă pioh kơ anak čô bi tui hriăm. Tơdah mâo klei găl srăng lŏ mkŏ mjing, kơrŭ wĭt bruă bi kriê pioh dhar kreh čing čhar mơ̆ng djuê ana pô, nâo mđrĭng mđrăm mbĭt hŏng dŭm djuê ana ayŏng adei mkăn.”

 Leh mâo klei bi mŭt mbĭt čar Lâm Đồng, Dak Nông lehanăn Bình Thuận, čar  Lâm Đồng mrâo pral mâo ngă leh lu hdră jăk bi kriê pioh knhuah gru dhar kreh hŏng klei kjăp. Dŭm bruă hiu čhưn ênguê hlăm yang ƀuôn, hŏng anôk dhar kreh čing čhar, adŭ mjuăt bi hriăm klei tông čing čhar mâo lŏ mtrŭt mjhar leh klei mkŏ mjing hlăm ƀuôn sang mtam. Mnuih ƀuôn sang yơh jing pô phŭn hlăm klei bi kriê pioh, mbĭt anăn hlŏng jing anôk kơ klei duah ƀơ̆ng hŏng klei hơĭt mơ̆ng bruă dhar kreh. Boh sĭt brei ƀuh, bruă bruă ba dhar kreh ƀuôn sang pô, amâo mâo djŏ knŏng hjăn ti čar Lâm Đồng hlăm ênuk ñŭ kma anei. Anei jing atur yuôm bhăn pioh kơ dhar kreh djuê ana mâo kriê pioh kjăp, hdĭp mđrĭng hŏng ênuk ară anei, dưi mđĭ bi lar kơ êdei anăp./.