VOV4.Êđê- Čiăng đru kơ phung hđeh mâo thiăm lu klei lông dlăng jăk mơak leh anăn yuôm bhăn, lu bruă ngă hlăp lêñ, lông dlăng dhar kreh dŭm djuê ana ti Dak Lak dưi mkŏ mjing leh. Mơ̆ng dŭm bruă ngă phung hđeh mâo thiăm lu klei găl ksiêm hriăm kơ dhar kreh dŭm djuê ana hŏng klei jăk siam leh anăn mdê hjăn.

Sa hruê knhal jih hruê kăm mlan 8, Ti tač sang krum Ama Jenny, ƀuôn Akŏ Dhông, ƀuôn prŏng Ƀuôn Ama Thuôt lŏ mtlŭk mtlak mơak mñai hŏng dŭm klei hlăp lêñ. Dŭm êpul phung hđeh điêt mơ̆ng 8 truh kơ 12 thŭn hrăm mbĭt nao hlăm dŭm klei hlăp lêñ msĕ si “gui êa wĭt kơ ƀuôn”, “hlăk mblang hră hŏng klei Angle”, “tăp mdiê”, hrăm mbĭt tŭk knă kơ êpul hŏng dŭm mta mnơ̆ng jing djam mtam kreh mâo hlăm grăp hruê mơ̆ng mnuih djuê ana Êđê.

Phung hđeh dôk tŭk djam trŏng phĭ

Ênai mđĭ ai, ênai tăp mdiê kma mbĭt hŏng dŭm klei bi blŭ hrăm klei Angle – klei Yuăn ngă bi mâo klei mơak mñai hĭn. Adei Tô Trần Pha Lê, 12 thŭn, hriê mơ̆ng ƀuôn prŏng Kon Tum, čar Kon Tum nao hlăm dŭm mta bruă anei brei thâo:

Anei jing hdră tal êlâo kâo nao hgŭm, pơ̆ng nưh, Farmtrip hdră ktuê dlăng dŭm drei êman êđai. Kâo hơ̆k mâo sơnăk leh anăn thâo săng klă hĭn klei hdĭp mnuih Êđê. Kâo hmăng hmưi dưi ksiêm hriăm lu hĭn čiăng thâo săng klă dŭm dhar kreh dŭm djuê ana mkăn.

Amâo djŏ knŏng tŭk knă êsei djam leh anăn nao hlăm dŭm klei hlăp lêñ, hlăm hdră anei, phung adei dưi nao čuă dlăng ƀuôn Akŏ Dhông, ksiêm hriăm kơ dhar kreh leh anăn sang krum, bruă pơ̆k mñam, mđing hmư̆ ênai pĕ tông mơ̆ng kdrăp pĕ tông djuê ana, ngă klei kač rup leh anăn nao hlăm lu mta bruă mkăn. Anei jing hdră ksiêm hriăm bruă hiu čhưn ênguê dhar kreh kơ phung hđeh hŏng anăn “Dŭm drei êđai êman” mơ̆ng anôk bruă mtô bi hriăm klei blŭ ala tač êngao ti ƀuôn prŏng Kon Tum, čar Kon Tum mkŏ mjing ti čar Dak Lak.

Ksiêm hriăm dhar kreh kdrăp pơ̆k mñam djuê ana Êđê

Amai Nguyễn Thị Tuyết Nhung, khua kiă kriê anôk bruă mtô bi hriăm klei blŭ ala tač êngao Sunshine, ti čar Kon Tum brei thâo: Hlăm mmông mdei yan mdei prŏng, mbĭt hŏng klei hriăm ti adŭ hriăm, phung nao hriăm dưi nao hlăm klei hiu čhưn ênguê ksiêm hriăm dhar kreh ti dŭm čar hlăm alŭ wăl krĭng Lăn Dăp Kngư. Hluê anăn dưi đru kơ phung hđeh mâo mmông găl hriăm êjai, hlăp êjai leh anăn dưi ksiêm hriăm kơ dhar kreh, klei blŭ leh anăn boh blŭ. Hlăm dŭm čar msĕ si Gia Lai, Kon Tum amâodah Dak Lak, dŭm mta bruă ksiêm hriăm kơ dhar kreh dŭm djuê ana mmuih djuê ƀiă jing jăk êdi leh anăn iêo mthưr klei uê̆ñ mĭn, klei ksiêm hriăm mơ̆ng phung hđeh.

Amâo guôn nao kbưi ôh, ƀiădah phung hđeh ăt dưi ktuê dlăng jih jang dŭm mta bruă anăn leh anăn hmei amâo djŏ knŏng ngă hŏng klei Yuăn amâodah hŏng klei hlăp lêñ, ƀiădah hmei lŏ yua wăt klei blŭ Angle, ba hlăm klei blŭ bi hriăm pô čiăng kơ phung hđeh dưi thâo klă hlăm boh sĭt si diñu yua boh blŭ jing djŏ hĭn.

Lông knă kpiê čeh

Ti čar Dak Lak, hlăm wưng yan mdei prŏng anei, lu anôk hiu čhưn ênguê yang ƀuôn čŏng mkŏ mjing lu mta bruă ksiêm hriăm dhar kreh kơ dŭm êpul phung tuê hiu čhưn ênguê jing phung hđeh msĕ sĭ ksiêm dlăng klei mkra mjing đĭng năm, đĭng buôt, knă kpiê, klei pơ̆k mñam, tŭk djam trong phĭ, điŏ brông. Phung hđeh dưi hriăm êjai ngă êjai. Đa đa mâo wăt dŭm tour lông ngă bruă lŏ hma hŏng klei dôk ti sang mnuih ƀuôn sang, đĭ êdeh kai nao ti đang kphê, nao mă kan amâodah hriăm ayŭ đĭng buôt.

Ayŏng Y-Thiên Adrơ̆ng, knơ̆ng bruă hiu čhưn ênguê Siam Tour, ti ƀuôn prŏng Ƀuôn Ama Thuôt, čar Dak Lak brei thâo, hŏng dŭm klei găl mơ̆ng dŭm ƀuôn mâo knhuah gru ngă bruă hiu čhưn ênguê, dŭm anôk bruă gĭr ktưn mkŏ hŏng dŭm mta bruă mâo gru kruăk knăl djuê ana mdê mdê čiăng đru kơ phung tuê, boh nik jing phung hđeh mâo lu klei ksiêm hriăm kơ dhar kreh krĭng lăn.

Phung hđeh dưi ksiêm hriăm dhar kreh sang krum, kdrăp čŭt hơô, hlăm dŭm mta bruă nao mbĭt hŏng dhar kreh. Diñu srăng dưi bi lông tŭk knă dŭm mta. Dŭm mta mnơ̆ng ƀơ̆ng anăn čŏng diñu tŭk knă mă. Ƀiădah dŭm mta mnơ̆ng yua mơ̆ng dhar kreh djuê ana Êđê, mkŏ hŏng dŭm mta bruă dhar kreh hlăm anăn. Kâo hmăng hmưi dưi mkŏ mjing čiăng ƀuôn sang anei, grăp ƀuôn sang jing sa wăl hdĭp mda leh anăn lu jơr, amâo djŏ knŏng kphê, amâo djŏ knŏng sang krum, amâo djŏ knŏng bruă pơ̆k mñam, ƀiădah mâo lu mta hlăm dhar kreh djuê ana pô.

Ksiêm hriăm kơ kdrăp tông ayŭ djuê ana leh anăn hdră ayŭ đĭng buôt

Hŏng klei mbruă, hriăm êjai, mă êjai, dŭm hdră ksiêm hriăm dhar kreh kơ phung hđeh Dak Lak dưi iêo mthưr lu phung hđeh nao hgŭm. Amâo djŏ knŏng đru kơ phung hđeh mâo dŭm mta bruă jăk yâo hlăm wưng yan mdei prŏng, ƀiădah dŭm mta bruă anei lŏ đru kơ phung hđeh mâo mmông găl ksiêm hriăm lu hĭn kơ dhar kreh dŭm djuê ana jing mnuih djuê ƀiă, mơ̆ng anăn dưi krŭ wĭt leh anăn lŏ dơ̆ng kriê pioh dhar kreh jăk siam mơ̆ng dŭm djuê ana.

Pô mblang: Y-Ƀel Êban