VOV4.Êđê - Hruê 26/8, ti să Dak Phơi, Knơ̆ng bruă Dhar kreh, mjuăt ktang asei mlei lehanăn hiu čhưn ênguê Dak Lak bi hgŭm hŏng Adŭ bruă Dhar kreh – hâo hưn kdriêk Lăk lehanăn Anôk bruă sang čư̆ êa să Dak Phơi mkŏ mjing knăm mdah wĭt klei mjing ayŏng adei mơ̆ng mnuih Mnông Gar.

Anei jing sa hlăm dŭm bruă mơ̆ng hdră “Kriê pioh lehanăn mđĭ lar boh tŭ dhar kreh čing čhar ti alŭ wăl čar Dak Lak” mâo Anôk bruă bi hgŭm quốc tế čar Jeollabuk-do, Dhŭng Korea đru. Knăm anei dưi ngă ti sang dlông Y Thiêng Čil, ti ƀuôn Jiê Yŭk, să Dak Phơi, kdriêk Lăk, čar Dak Lak, mjing ayŏng adei hŏng Y Nam Pan Ting mbĭt ƀuôn. Hluê anăn, Y Thiêng Cil lehanăn Y Nam Pan Ting jing ƀĭng găp sĭt suôr miơ̆ng lu thŭn.

Knăm anei dưi mkŏ mjing 5 kdrêč, hŏng 2 klei bhiăn phŭn anăn jing ngă yang akâo klei suaih pral, hưn mthâo hŏng phung Yang kơ klei mjing ayŏng adei mơ̆ng dua gŏ sang lehanăn knăm huă êsei mbĭt mơ̆ng 2 gŏ sang. Hlăk knăm anei, ênai čing Bor kwang, phung êkei êdam, mniê êra bi kdŏ mmuñ h’êč hmưi lehanăn dlăng knăm mjing ayŏng adei anei. Leh knăm anei, dua gŏ sang anei jing ayŏng adei sa tian prôč, thâo bi đru tơdah tuôm hŏng klei dleh dlan, kƀah êwư./.

H’Nêč pô mblang