VOV4.Êđê - Aguah 20/4, Knơ̆ng bruă hâo hưn mtô mblang čar Dak Lak mphŭn pŏk Hruê hdruôm hră leh anăn dhar kreh dlăng hră thŭn 2022. Mơ̆ng ară anei truh jih hruê 22/4, “Hruê hdruôm hră leh anăn dhar kreh dlăng hră” mkŏ mjing hŏng lu bruă ngă msĕ si: Rang mdah dŭm mta hră hlue si akŏ kơ Hdruôm hră siam, hră jăk thŭn 2021 leh anăn 2022; Hdruôm hră hđeh điêt, Phung čih mčeh Dak Lak, dŭm hră mơar kơ alŭ wăl; Hră hƀuê ênuk leh anăn hră kơ khua gĭt gai Hồ Chí Minh; Klei bi kƀĭn, hưn mthâo phung čih mčeh, hdruôm hră mrâo leh anăn bi blŭ hrăm phung čih mčeh hŏng phung dlăng hră, mkŏ mjing anôk pioh hdruôm hră hđeh điêt leh anăn dŭm bruă hlăm êpul êya; sang dlăng hră êrô hiu; mguôp hdruôm hră, kdrăp dlăng hră kơ phung hđeh ƀun, đru dŭm sang hră hră krĭng taih kbưi, knông lăn leh anăn phung ala ƀuôn đru ba. 

Mbĭt hŏng klei mkŏ mjing ti ƀuôn prŏng Ƀuôn Ama Thuôt, dŭm anôk bruă lŏ bi hgŭm mkŏ mjing dŭm bruă ngă mđing truh Hruê hdruôm hră leh anăn dhar kreh dlăng hră ti kdriêk Êa Hleo hŏng boh phŭn lu jơr leh anăn yuôm bhăn.

H’Zawut pô mblang