VOV4.Êđê – Mđing truh knăm bi hdơr 92 thŭn hruê mkŏ mjing Đảng cộng sản Việt Nam lehanăn kkuh drông yan mnga Nhâm Dần, aguah (14/1), Sang kriê pioh kdrăp mnơ̆ng Dak Lak mkŏ mjing leh knăm mphŭn pŏk klei rang mdah lehanăn hdră bruă tui ksiêm “Sa ênuk čiăng hdơr”. Hŏng giăm 230 pŏk rup, hră m’ar, mnơ̆ng dhơ̆ng hưn mdah kơ boh phŭn “Sa ênuk čiăng hdơr” dưi rang mdah hŏng 2 mta phŭn anăn jing “Wăl anôk Têt đưm” lehanăn “Gru kruăk ênuk kiă kriê hđăp ti Dak Lak”.

Mơ̆ng anăn, lŏ bi êdah wăl anôk mjĕ mjuk ênuk đưm hŏng dŭm mta mnơ̆ng jĕ giăm hlăm klei hdĭp aguah tlam mbĭt anăn lŏ bi msiam hŏng mnga sŭng gơr, hlao boh kroh, ƀêñ điŏ, ƀêñ tek. Mbĭt hŏng 2 mta phŭn hưn mdah anei, hdră “Sa ênuk čiăng hdơr” lŏ dưi nao tui ksiêm lehanăn hlăp čhưn hŏng phung tuê nao čhưn ênguê msĕ si: Hdră mkra ƀêñ thuẫn (ƀêñ boh mnŭ g’hang), bi mđăo mâo klei pah mni, hlăp lêñ akŏ thŭn./.

H’Nêč pô mblang