VOV4.Êđê- Hlăm 5 thŭn kơ anăp, čar Dak Lak srăng pioh êbeh 20 êklai prăk čiăng lŏ dơ̆ng hlue ngă hdră kčah răng mgang leh anăn mđĭ lar dhar kreh čing čhar ti alŭ wăl. Anei jing boh phŭn hlăm Hdră kčah pŏk ngă Hdră mtrŭn mơ̆ng Êpul gơ̆ng bruă ƀuôn sang čar kơ bruă răng mgang leh anăn mđĭ lar dhar kreh čing čhar čar Dak Lak, wưng 2022-2025 mrâo mâo Knơ̆ng bruă sang čư̆ êa čar Dak Lak mtrŭn mrâo anei.

Klă klơ̆ng, hluê si hdră kčah Pŏk ngă Hdră mtrŭn mơ̆ng Êpul gơ̆ng bruă ƀuôn sang čar kơ hdră pŏk ngă bruă ngă êdah kdlưn msĕ si: bi lu jơr hdră hâo hưn mtô mblang, hưn mthâo, răng mgang mnơ̆ng kriê pioh dhar kreh čing čhar. Grăp thŭn mkŏ mjing kơrŭ wĭt ƀiă êdi sa klei ngă yang, knăm mơak knhuah gru djuê ƀiă ti alŭ wăl mguôp hŏng bruă răng mgang dhar kreh čing čhar. Ksiêm hriăm, hiu duah, kơrŭ wĭt, mtô bi hriăm leh anăn mđĭ klei tŭ dưn ba yua  klei tông čhing hđăp mơ̆ng djuê ana Êđê, Mnông hlăm klei hdĭp êpul êya.

Pô mblang: H’Zawut Ƀuôn Yă