VOV4.Êđê - Hlăm dŭm thŭn giăm anei ti lu boh ƀuôn mnuih djuê ƀiă ti čar Kon Tum mâo leh lu êpul kdŏ mmuñ hlăm anăn lu jing phung êdam êra mda asei. Klei mdê êdi mơ̆ng êpul anei anăn jing phung êdam êra mda asei čŏng pô tui ksiêm, mdah klei kdŏ mmuñ, tông ayŭ mơ̆ng djuê ana pô. Boh sĭt brei ƀuh, hdră anei mơ̆ng êpul kdŏ mmuñ mda asei đru lar bra leh klei khăp kơ ênhiang mmuñ lehanăn đru kriê kjăp, mđĭ lar boh tŭ yuôm hdră kdŏ mmuñ djuê ana mơ̆ng đưm hlăm klei hdĭp grăp hruê hruê mơ̆ng mnuih ƀuôn sang.

Knăm 6 grăp hruê kăm, êpul pĕ tông mơ̆ng 15 čô hđeh êdam êra, djuê ana Bahnar, djuê Rơ Ngao ti ƀuôn Đăk Yo, să Hơ Moong, kdriêk Sa Thây lŏ hrăm mbĭt hriăm pĕ tông. Jih jang phung pĕ tông thâo raih klei pĕ đĭng Put, thâo tông čing, čing boh tâo, tơ rưng, tông hgơr. Êdah êdi hlăm anăn mâo A Não, 20 thŭn, thâo yua jih jang dŭm mta kdrăp pĕ tông: “Phung hmei čŏng hriăm pĕ tông mâo leh 2 thŭn. Hmei mâo klei mơak sơnăk. Pĕ brô̆ tơ rưng ñu mñê mdê, čing boh tâo msĕ si ênai drai êa. Kyua klei khăp phung hmei hriăm pĕ tông ƀuh klei mơak sơnăk”.

Khua êpul phung pĕ tông mda asei ti ƀuôn Đăk Yo, A Chiêng, 21 thŭn brei thâo, hruê mmông mkŏ mjing êpul pĕ tông mâo hŏng anei leh 3 thŭn, êjai anăn mâo lu klei dleh dlan. Duah ƀuh phung thâo pĕ tông jing dleh êdi, lŏ mđĭ ai diñu nao hgŭm lŏ dleh hĭn mơh. Đa đa dôk nao sang hră, đa đa amâo mâo mmông wăn kyua bruă pưk hma leh anăn đa đa dôk mâo klei hêñ. Ƀiădah kyua klei khăo hŏng kdrăp pĕ tông knhuah gru, mâo klei sa ai, klei mđĭ ai hŏng mnuih ƀuôn sang hlăm ƀuôn, êpul pĕ tông dưi mkŏ mjing hŏng pô mda asei hĭn jing 16 thŭn, khua hĭn jing 25 thŭn leh anăn jih jang ka tuôm hriăm ôh adŭ mtô bi hriăm kơ klei tông: “Pô ăt msĕ hŏng jih jang mơh, kăn thâo pĕ dŭm kdrăp pĕ tông lei mơh. Pô čŏng hriăm ƀrư̆ ƀrư̆ yơh. Grăp tlam hriê ti nei hriăm tông nanao. Pô pĕ brei kơ phung mda asei mkăn dlăng êdi dih diñu hluê ngă msĕ pô, diñu ƀuh pô pĕ srăng mâo klei khăp leh anăn hrô bruă anei kơ pô”.

Kyua klei hriăm pĕ tông hur har hŏng jih ai tiê, ară anei êpul pĕ tông mda asei ti ƀuôn Đăk Yo thâo raih leh klei pĕ tông hlăm brô 100 klei pĕ tông. Hlăm anăn mâo giăm 50 klei pĕ tông jing dŭm klei mmuñ ênhiang mnuih Banhar Rơ Ngao kreh yua hlăm dŭm wưng klei ngă yang hlăm yang ƀuôn msĕ: Knăm huă mdiê mrâo, ngă yang kpin êa, huă sang roong mrâo. A Luyến, pô tông Tơ rưng brei thâo, čiăng dưi mâo ênoh prăk msĕ ară anei, phung pĕ tông hlăm êpul mâo klei gĭr ktưn hriăm riah grăp klei pĕ tông. Leh bi tŭ ư, grăp čô srăng hriăm pĕ hluê si brô̆ pô, leh thâo raih srăng pĕ mbĭt: “Tơdah djŏ klei pĕ tông dleh srăng hriăm mơ̆ng 4 truh kơ 5 hruê. Klei mmuñ đŭt amâodah ênưih srăng hriăm mơ̆ng 2 truh kơ tlâo hruê. Hlăm hruê kăm srăng hriăm pĕ ti knăm 5 leh anăn knăm 6. Tơdah lŏ mâo klei kdŏ amâodah mâo klei ngă yang prŏng srăng hriăm jêñ hĭn. Kâo ƀuh knhuah dhar kreh djuê ana pô jing siam êdi.”

Bi lar klei khăp hŏng knuah gru klei mmuñ ênhiang, êpul pĕ tông mda asei ti ƀuôn Đăk Yo dưi mâo klei sa ai, klei mđĭ ai mơ̆ng mnuih ƀuôn sang hlăm ƀuôn leh anăn krĭng mkăn. Bruă tŭ jing mơ̆ng êpul pĕ tông jing tur knơ̆ng čiăng kơ phung mda asei ti ƀuôn Đăk Yo mkŏ mjing êpul kdŏ čhuang hđeh hlăm ƀuôn hŏng 14 čô nao hgŭm jing phung hđeh sang hră leh anăn pô điêt hĭn knŏng mrâo 10 thŭn. Trần Công Thanh, k’iăng khua bruă sang čư êa să Hơ Moong, kdriêk Sa Thầy mñă klă, anei jing bruă năng mơak êdi hlăm klei kriê pioh, bi lar knhuah jăk siam hlăm klei mmuñ ênhiang mơ̆ng mnuih ƀuôn sang Bahnar Rơ Ngao ti nei: “Să ăt mâo phung thâo mbruă ƀiădah ară anei diñu mduôn leh anăn ruă asei mlei jih leh. Phung hđeh ti nei kñăm kơ klei hriăm tông čing jing klei bi knăl jăk hlăm bruă kriê pio knhuah dhar kreh jăk siam djuê ana ti alŭ wăl.

Nao hgŭm hŏng ai tiê hur har, čŏng pô, êpul pĕ tông mơ̆ng hđeh êdam êra djuê ana Bahnar Rơ Ngao ti ƀuôn Đăk Yo, să Hơ Moong, kdriêk Sa Thây, čar Kon Tum dôk bi mguôp hlăm bruă kriê pioh, bi lar knhuah klei mmuñ ênhiang djuê ana hlăm klei hdĭp grăp hruê mơ̆ng mnuih ƀuôn sang. Dŭm klei mmuñ ênhiăng siam anăn bi mni kơ klei khăp êklei mniê, klei bi mguôp hlăm gŏ sang leh anăn klei khăp kơ ƀuôn sang, lăn čar dưi kwang nanao ti ƀuôn Đăk Yo, dôk đru mguôp bi lu jơr leh anăn bi siam knhuah dhar kreh hlăm klei hdĭp, ai tiê mnuih ƀuôn sang krĭng anei.