VOV4.Êđê - Aguah mbrue (8/4) ti sang bi lông mjuăt asei mlei čar Daklak, ƀuôn prŏng Ƀuôn Ama Thuôt, knơ̆ng bruă dhar kreh, mjuăt asei lehanăn hiu čhưn ênguê čar hgŭm hŏng Dhar bruă djuê ana mkŏ mjing klei bi lông mjuăt asei mlei mnuih djuê ƀiă tal 18 thŭn 2022. Mkŏ mjing mơ̆ng hrue 8/4 – 10/4.

Êbeh 600 čô phung bi lông hriê mơ̆ng 15 êpul dŭm kdriêk, wăl krah bi lông hlăm 7 mta, mâo: pah boh êkei mniê, čưng boh mini êkei, bi lông êran kbưi êkei, mniê, đĭ kwưng êkei mniê, mnah hna êkei, mniê, trŭt hlâo êkei, mniê, lehanăn bi ktŭk klei. Anei jing jih jang klei kreh mkŏ mjing.

Boh nik klei bi lông anei mkŏ mjing hlăm grăp thŭn, ƀiădah tuôm hŏng klei ruă tưp snăn kpăk hĕ thŭn dih. Phung bi lông jing mnuih djuê ƀiă hlăk dôk hdĭp hlăm čar Daklak, mơ̆ng klei bi lông anei mđĭ ai klei mjuăt asei mlei, lehanăn kriê pioh dŭm myta knhuah siam mơ̆ng dhar kreh djuê ana, hyuă kjăp klei bi mguôp hlăm jih jang mnuih djuê ƀiă hlăm čar./.

Y-Khem pô mlang