VOV4.Êđê- Hlăm hdră Knăm mơak Kâo khăp kơ čar kwar kâo, Bruă êdam êra čar Dak Lak mkŏ mjing leh Klei bi lông hâo hưn klei mmuiñ krŭ kdơ̆ng, phung êdam êra mmuiñ ênhiang djuê ana leh anăn yua kdrăp tông ayŭ djuê ana. Mơ̆ng anăn, lu klei kdŏ mmuiñ phung êdam êra dŭm kdriêk dưi mprăp jăk, bi êdah knhuah dhar kreh krĭng kwar.

 Hŏng čing kram drông tue kwang bŏ sang bi kƀĭn hlăm hdră bi lông hâo hưn klei mmuiñ cách mạng, phung êdam êra mmuiñ ênhiang djuê ana pô lehanăn pĕ tông kdrăp djuê ana pô mơh hlăk jing mjhĭt m’uăt hĭn. Phung êkei êdam mniê êra Êđê hŏng kdrăp čŭt hơô djuê ana pô, tông čing kram mâo kdŏ čhuang, lehanăn bi hmô knhuah gai kpiê mơ̆ng anak Êđê. Anei jing klei bi lông mdah kdrăp djuê ana pô mơ̆ng Êpul êdam êra kdriêk Krông Ƀŭk mdah ti anôk bi lông. Y-Thu Mlô, ti ƀuôn Tlan, să Čư̆ Pơ̆ng, kdriêk Krông Ƀŭk lač, leh giăm dua thŭn mdei hĕ klei hriăm mjuăt kyua tuôm hŏng klei ruă tưp, mâo klei bi lông anei yơh jing mmông găl lŏ dơ̆ng iêo jak, lŏ bi hdơr hriăm dŭm klei tông čing leh hriăm:

Nao hlăm klei bi lông anei jing mmông čiăng kơ jih jang ƀĭng găp hlăm ƀuôn mâo klei mjĕ mjuk hŏng kdriêk riêng gah bi mguôp hlăm dhar kreh čing čhar, lehanăn dŭm klei mmuiñ knhuah cách mạng. Lu jing knăm kơ klei mjĕ mjuk, bi hriăm êmuh hdơ̆ng găp. Ƀuh leh sa wưng mdei kyua găn klei ruă tưp, snăn bruă dhar kreh, kdŏ mmuiñ ăt ƀiă mơh mâo mkŏ mjing. Mơ̆ng klei anei mơh, jing mmông myun lŏ mâo mjuăt bi hriăm bruă dhar kreh hlăm ƀuôn.

Êpul tông ayŭ kdrăp djuê ana Krông Ƀuk

Hŏng 48 mta klei bi lông kơ 3 knhuah jing klei muiñ kơ cách mạng, klei mmuiñ ênhiang djuê ana, lehanăn pĕ tông kdrăp djuê ana pô, mâo giăm 300 čô mnuih nao bi lông hriê mơ̆ng dŭm êpul êdam êra, knuă druh bruă êdam êra ti 16 êpul êya dŭm kdriêk, sang hră gưl krah kdrăp mrâo mrao Lăn Dap Kngư lehanăn êpul hgŭm mnuih atăt hdră mơ̆ng čar nao bi mguôp.

Êpul Ƀuôn Đon hŏng kdrăp tông ayŭ Lao, kdŏ Lăm Vông

Grăp êpul bi ruah klei pô bi lông djŏ hŏng knhuah krĭng kwar, knhuah dhar kreh ƀuôn sang pô hdĭp mda, nao mdah ti anôk bi lông. Mbĭt hŏng dŭm ênhiang kưt muiñ, kdrăp pĕ tông mâo msĕ si: Eirei, kưt, čing kram mơ̆ng djuê ana Êđê, djuê ana Mnông, djuê ana Bahnar snăn dŭm ênhiang êdah êdi mơ̆ng ênhiang djuê ana quan họ Bắc Ninh, ayŭ ken hla, đĭng kliă, đĭng buôt, amâodah mmuiñ then mơ̆ng djuê ana Tày, ăt mâo leh mơh dŭm êpul êya mdah mbĭt.

Lu klei jăk siam krĭng nah Dưr hlăm klei bi lông

Boh nik, êpul êya mơ̆ng kdriêk Ƀuôn Đon mdah dŭm kdrăp mơ̆ng djuê ana Lao mâo kdŏ ênhiang Lăm Wŏng, hŏng dŭm ênhiang êdu êun mơak mñai. Y – Nôly Kƀuôr, djuê ana Êđê, ti să krông Ana, kdriêk Ƀuôn Đon, jing khua êpul mdah kdrăp djuê ana Lao ti să Krông Ana lač, mâo bi klin jih jang kdrăp pĕ tông djuê ana Lao, mkŏ mjing klei mjuăt bi hriăm lehanăn nao mdah ti dŭm bruă mâo să, kdriêk mkŏ mjing. Khădah hlăm grăp mta bruă, găn hĕ hlăm klei kpăk dưn, jih jang ƀĭng hlăm êpul ăt dăp mmông mjuăt bi hriăm nanao:

Êlâo kơ truh hŏng klei bi lông msĕ snei, hlăm êpul ăt mâo klei mjuăt bi hriăm êbeh sa hrue kăm êlâo hlăm grăp hruê, lehanăn truh knhal jih hrue kăm, lehanăn mlam mmăt nao lŏ bi hriăm. Êpul mâo mkŏ mjing leh čiăng kriê pioh knhuah gru dhar kreh djuê ana Lao, pioh mdah kơ phung ƀuôn sang jing djuê ana Lao dôk ti să krông Ana, lehanăn nao ti dŭm anôk bi lông hlăm djăp knăm msĕ si Bunpimei, pia thŭn mrâo Lao.

Lu phung êdam êra bi êdah klei thâo mmuiñ ênhiang djuê ana, kdrăp tông ayŭ djuê ana

Mjưh klei bi lông Êpul mkŏ mjing mđup brei leh 3 klei pah mni ênoh A, 6 klei pah mni ênoh B, lehanăn 9 klei pah mni ênoh C kơ dŭm mta klei bi lông jing kdlưn hĭn hlăm jih 3 knhuah bi lông. Jao klei pah mni mrô 1 kơ kluôm êpul mâo êpul êya kdriêk Čư̆ Mgar. Tui si Êpul mkŏ mjing lač, lu êpul êya truh hlăm klei bi lông mâo leh lu mmông mjuăt bi hriăm, ƀhĭ klĭ snăk, djŏ hŏng hdră êlan mơ̆ng êpul mkŏ mjing dăp, mprăp djăp kdrăp yua, kdrăp čŭt hơô, lehanăn klei mdah ƀuh jing mbruă snăk. Boh nik, hlăm đa đa êpul phung bi lông mâo êpul hđeh, digơ̆ jing hđeh hriăm hră ăt nao bi lông mbĭt, mâo dŭm klei bi lông tông kdrăp djuê ana pô, snăn ƀuh jing yuôm bhăn snăk, đru mguôp leh hlăm klei tŭ jing mơ̆ng klei bi lông anei. Lê Văn Hồng, k’iăng khua anôk mtô bi hriăm Âm Nhạc – muá, sang hră gưl krah dhar kreh kdŏ mmuiñ čar Daklak. Jing khua êpul brei puăng klei bi lông lač:

Êpul mkŏ mjing lehanăn êpul brei puăng klei bi lông ăt ƀuh mgei ai tiê êdi, lehanăn bŏ hŏng klei mơak ƀuh phung mda asei mnuih djuê ƀiă, phung êdam êra drei thâo kriê pioh knhuah gru dhar kreh djuê ana pô, thâo tông čing char jăk êdi. Lehanăn dŭm ênhiang klei pĕ tông lŏ mâo dŭm klei ayŭ ken hla, đĭng kliă, lehanăn klei mdah kdrăp pĕ tông djuê ana Lao ăt bŏ hŏng klei jăk mơh, mdah siam êdi. Mâo đa đa êpul êya mâo leh klei duh bi liê ƀhĭ klĭ hriăm mjuăt dŭm klei muiñ ênhiang djuê ana ti lăn Dap kngư anei. Lehanăn lŏ mâo dŭm ênhiang klei muiñ nah Dưr, dưi bi êdah leh djăp mta klei thâo, hŏng dŭm đŏk mmuiñ siam bi êdah jih jang klei mmuiñ ênhiang djuê ana pô.

Hŏng lu klei nao bi lông jiă leh knhuah dhar kreh djuê ana mdê mdê hlue si krĭng kwar, klei bi lông hâo hưn dŭm klei muiñ cách mạng, phung êdam êra djăp djuê ana thâo mjing leh sa anôk hlăp jăk kơ phung êdam êra djăp djuê ana hlăm čar Daklak. Mơ̆ng anăn, lŏ kơrŭ klei thâo khăp, thâo mpŭ kơ knhuah gru dhar kreh klei kưt muiñ djuê ana, sa ai bi răng kriê, lehanăn mđĭ bi lar knhuah gru dhar kreh djăp djuê ana hlăm alŭ wăl./.

Pô mblang: Y-Khem Niê