VOV4.Êđê - Hriê hŏng mnơ̆ng ƀơ̆ng huă mơ̆ng mnuih Êđê, êngao kơ dŭm mta djam mtam jing hla dliê lŏ mâo dŭm mta djăm jăk yâo mơ̆ng mnga dliê msĕ si djam mnga dliê, mnga tei hŭng, mnga knôk, mông mtei. Mnuih Êđê kreh yua mkra mjing mnơ̆ng ƀơ̆ng jing jăk yâo leh anăn jing dŭm mta êa drao jăk êdi. Hlăm anăn amâo mâo dưi wơr ôh djam muê.

Hlăm brô mlan 4, mlan 5 jing yan mnga muê bi lông čuh blang mnga. Mnuih Êđê kreh bi jak lehanăn gui bŭng nao hiu čoh mnga djam muê. Mơ̆ng đưm êlâo, mnuih Êđê thâo mkra leh mta djam mơ̆ng mnga muê. Kyua anăn, pŏk rup mnga djam muê ăt dưi bơ̆k bâo hlăm klei duê mơ̆ng mnuih djuê ana Êđê. Mta mnga anei knŏng kbiă mnga hlăm dŭm gưl adiê hjan akŏ yan. Amâo djŏ knŏng jiă klei siam mơ̆ng krĭng čư̆ dliê Lăn dap kngư ƀiădah grăp blư̆ huă ƀơ̆ng mâo mta djam mkra mơ̆ng mnga muê snăn êsei hlăm gŏ amâo lŏ dôk sa asăr mtam. Amai H’Lai Hđơ̆k, Ƀuôn Čuôr Knia, să Êa Ƀar, kdriêk Ƀuôn Đon, čar Dak Lak brei thâo, mnga muôi dưi mkra lu mta djam ƀơ̆ng jăk. Leh wĭt čoh, drei lui hĕ jih mnga, knŏng mă mnơ̆ng hlăm lam. Anei jing kdrêč jăk êdi ƀơ̆ng mơ̆ng mnga djam muê čiăng mkra dŭm mta djam.  “Hdră tal êlâo hĭn jing drei rao bi doh, tŭk êa ktơ̆ng, k’ŭl bi ksă, kdjŏng bi thu êa lehanăn tlê hŏng êtak lăn. Hdră tal dua, drei k’ŭl bi ksă, kdjŏng bi thu êa lehanăn đeh hŏng kan hŭl, kan krô, dưm ƀiă amrêč jăk êdi ƀơ̆ng”.

Êngao anăn, mta hlăm lam mơ̆ng mnga muê drei dưi k’ŭl amâo dah đeh hŏng prôč mnŭ srăng krơ̆ng kjăp mnâo ƀâo mngưi mơ̆ng mnga, ƀêñ msĕ đrêñ đrêñ, ñuôt ñuôt ti kuôp mnga ăt jăk mơh. Grăn mnga drei ăt dưi tlê mtah snăn mơh. Ayŏng Y-Đăp Êya, Ƀuôn Nui, să Tâm Thắng, kdriêk Čư̆ Jut, čar Dak Nông hưn mthâo, êlâo adih, grăp blư̆ nao hma, mnuih ƀuôn sang hlăm ƀuôn pĕ sa bŭng ba wĭt tŭk knă djam. Ƀiădah ară anei mâo lu mnuih hiu blei mnga djam muê ba čhĭ kơ mnuih čiăng kñăm mđĭ hnư hrui wĭt. Kyua anăn, mta mnga anei ară anei hin êjai. “Mnga djam muê čăt đĭ hluê krĭng. Tui hluê hŏng klei khăp ƀơ̆ng mdê bi mnuih srăng mâo hdră mkra mdê mơh. Kâo khăp k’ŭl bi ksă lehanăn tlê hŏng êtak lăn, êsŭn êđê, amrêč. Ară anei, mnga muôi hin mơh, nao ti dŭm krĭng kbưi ƀiă kơh mâo pĕ lu ƀiă.

Yan mnga muôi knŏng mâo sa blư̆ hlăm sa thŭn, hlei pô truh ti krĭng ƀuôn sang Êđê hlăm gưl anei ka dưi ƀơ̆ng djam mkra mơ̆ng mnga muôi jing klei klei ênguôt êdi. Mnga djam muôi jăk jĭn, doh êƀăt amâo djŏ knŏng čih kač sa pŏk rup siam kơ krĭng lăn hrah bazan ƀiădah lŏ mjing lu mta djam ƀơ̆ng jăk êdi jiă krĭng čư̆ čhiăng./.