VOV4.Êđê- Mnuih Mnông ti čar Dak Lak, Dak Nông mâo klei mưng hdĭp mbĭt hŏng čư̆ êa, dliê kmrơ̆ng. Dŭm mta djam kreh kyua tŭk knă hlăm grăp hruê lu hĭn ăt mơ̆ng dliê leh anăn pưk hma. Hlăm anăn, Djam mbrông jing sa hlăm dŭm mta mnơ̆ng ƀơ̆ng jăk yâo êdah êdi mơ̆ng mnuih djuê ana Mnông.

Grăp blư̆ hiu hlăm dliê, amâodah nao hma pưk, mnuih Mnông kreh ba yua dŭm mta mnơ̆ng mâo leh hlăm dliê, hlăm hma čiăng tŭk mkra mnơ̆ng ƀơ̆ng huă. Y Xim Ndu, ti ƀuôn Yuk La 1, sa Dak Liêng, kdriêk Lăk, čar Daklak brei thâo:

“Mnơng ƀơng mnuih Mnông khăp kơ mta phĭ, amâdaoh msăm, lehanăn lu bi mkra jing ăm lehanăn tŭk. Mnơng tŭk jing lu kreh brông hŏng đĭng m’ô, đĭng đrao, amâo mâo yua gŏ bưng ôh. Ngă djam brông jing sa hlăm dŭm mta djam jăk êdi mơng mnuih Mnông”.

Hla djam biăp

Jih jang djam čiăng brông dưi mjing sa mnâo ƀâo mngưi jăk snăk, leh brông dlông pui tơl djam ksă. Hla dliê, lehanăn dŭm mta kđeh čĭm, ba brông hŏng đĭng mnuih Mnông pia Prung, Y Xim brei thâo:

Tal êlâo jing drei mprăp kđeh čĭm thâodah kan leh ƀhu krô, anăn jing kđeh čĭm ŭn, kđeh čĭm êmô ƀhu leh dlông pra pui, srăng jing jăk hĭn, bi djam djiê jing djam biăp, lehanăn guôl hwiê. Drei khăt guôl hwiê, alôk mă juê mda hlăm lam pioh brông, ñu mâo klei phĭ phĭ, lehanăn tơdah drei ƀơng bi ƀuh mâo klei mmih, ƀăt jăk snăk. Hla djam biăp mâo klei mmih ƀăt, lŏ bi ƀăt hŏng hră, kpŭng bi mƀăt lehanăn amrêč mơh”.

Djam, čĭm, mnơ̆ng bi ƀăt dưm hlăm mơô

Leh wĭt pĕ djam rao hĕ bi doh, jiă hlăm đĭng, khăt đ’điêt êpih kđeh čĭm, guôl khăt klŏ điêt điêt trôk mbĭt hlăm đĭng, yua hla mtei kăt hĕ ti mbah đĭng, lehanăn mhưng dlông pui, mnuih brông dôk kiă, kăp mbliư̆ mdar nanao đĭng brông đăm bi khiă amâodah pui ƀơ̆ng hĕ ôh đĭng brông. Dôk brông msĕ snăn mâo hlăm brô 30’ djam ksă yơh, lehanăn yua giê kwă điêt, mdar thâodah jeh hĕ djam bi ƀhĭ hlăm đĭng. Leh kơ anăn blah đĭng, mă ƀơ̆ng yơh djam jăk snăk. Y Xim Ndu yăl dliê, tơdah ƀơ̆ng djam anei, phung tue ƀuh mâo mnâo mdê lehanăn jăk snăk.

“Djam brông msĕ snăn jing siă suôr leh êdi hŏng klei hdĭp mnuih Mnông, bi êdah kơ klei hdĭp jĕ giăm hŏng dliê kmrơng. Mnơng yua čŏng mâo hlăm dliê, snăn bi êdah kơ klei hdĭp dhar kreh thâo khăp kơ dliê kmrơng jăk snăk”.

Y Xim Ndu leh anăn phung tuê India ƀơ̆ng djam brông

Kyua mâo mă klei juăt mưng hjăn mơ̆ưng pô msĕ djuê anăn yơh, djam brông mnuih Mnông mâo nanao hlăm ai tiê sa mta mnâo mnañ jăk êdi mơ̆ng djam brông djuê ana pô. Khădah klei mkra amâo mâo jing dleh ôh, ƀiădah ñu jiă mnâo mnañ dliê kmrơ̆ng. Djam brông anei bi êdah knhuah gru dhar kreh mơ̆ng klei hdĭp mda, duh ƀơ̆ng, aguah tlam mlam hrue mơ̆ng Mnuih Mnông hŏng dliê kmrơ̆ng./.

                         Pô mblang: Y-Khem Niê