VOV4.Êđê- Ayŏng A Huyñ (djuê ana Jarai) ti ƀuôn Chôt, wăl krah Sa Thầy, kdriêk Sa Thầy, čar Kon Tum, lui jih gưl ai hlăk mơ̆ng pô kơ kdrăp tông ayŭ djuê ana mơ̆ng đưm”. Lač snăn, kyua thŭn anei ñu êbeh 40 thŭn leh ƀiădah “Ăt ka mâo pô khăp mơh”. Bruă grăp hruê hruê mơ̆ng ayŏng A Huyn jing nao kơ pưk hma, mmăt wĭt ti sang lŏ mkra kdrăp tông ayŭ lehanăn ñu pô tông ayŭ êjai dôk bi mĭn kơ klei hdĭp êjai. Hŏng klei khăp m’ai lehanăn klei thâo hlăm hdră mkra, tui ksiêm lehanăn mdah klei tông ayŭ kdrăp djuê ana, ayŏng A Huyn mâo leh Knŭk kna mđup brei anăn knăl “Pô mbruă kdlưn hĭn”, alum kơ ƀĭng găp mđing hmư̆ klei čih kơ ñu.

            Ênai drei mrâo hmư̆ jing ênai brô̆ K’ni mơ̆ng ayŏng A Huynh pĕ hlăm gưl mă asăp klei mmuñ ênhiang mrâo anei mơ̆ng Sang mđung asăp blŭ Việt Nam krĭng Lăn Dăp Kngư. Brô̆ K’ni mơ̆ng ayŏng A Huynh čŏng mkra mjing, dlăng mdê êdi. Brô̆ anăn mâo sa đĭng đrao hlăm brô 5 kgam kngan, mâo dŭm dŏ gư̆. Klei ƀrô̆ kpă hŏng đĭng đrao leh anăn bi êbeh sa kdrêč hlăm brô sa kgam kngan. Akŏ klei brô̆ kă sa pŏk ksu.  Êjai pĕ brô̆, ayŏng A Huynh djă sa bĕ giê đrao leh anăn uôt ti klei brô̆, mlim pŏk ksu čiăng mâo ênai kwang. Ayŏng A Huynh brei thâo, brô̆ K’ni leh anăn Ting Ning jing 2 mta kdrăp pĕ tông ayŏng khăp êdi.

“Brô̆ K’Ni, jing brô̆ sa aruăt klei, akŏ klei brô̆ mâo sa pŏk ksu pioh mlim hlăm ƀăng êgei. Êjai pĕ, yua giê uôt ti klei brô̆ hluê si ênai mơ̆ng ƀăng êgei leh anăn êlah gai. Brô̆ anei dleh êdi thâo pĕ, tơdah mâo mưng srăng êgah ƀăng êgei, êgah kƀông, ƀiădah tơdah mưng srăng jăk sơnăk. Bi brô̆ Ting Ning msĕ si tông čing, sitôhmô, čing mâo dŭm boh, Ting ning srăng mâo dŭm aruăt klei msĕ sơnăn. Sa boh Ting Ning mâo ênŭm ênap ênai msĕ si ênai čing. Pĕ Ting Ninh ăt dleh mơh, boh nik pĕ kơ arăng mmuñ, Pô srăng pĕ čiăng hmao leh anăn djŏ hŏng tông kơh jăk hmư̆”.

A Huynh dôk pĕ brô̆ kni leh anăn ting ning

Ƀuôn Čô̆t, wăl krah Sa Thây, čar Kon Tum ară anei mâo êbeh 1000 čô, jih jang jing mnuih djuê ana Jarai. Tinei ăt dôk djă pioh lu knhuah gru dhar kreh. Ƀuôn mâo êpul tông čing, hlăm anăn ayŏng Huynh klam sa êpul. Êngao kơ kdrăp čing čhar, lu kdrăp pĕ tông mơ̆ng êpul mâo ayŏng huynh čŏng mkra mjing hluê si klei khăp pô.

“Kâo thâo yua lu kdrăp pĕ tông msĕ si Ting Ning, Klông Pŭt, K’ni…jih jang kdrăp pĕ tông knhuah gru djuê ana Jarai kâo thâo sơăi. Kâo khăp kơ kdrăp pĕ tông djuê ana. Hlăk dôk điêt kâo ƀuh phung mduôn mkra čĭng boh tâo, tông čing, mkra brô̆ goong Ting ning leh anăn kâo tui leh anăn hluê ngă. Kâo hmăng hmưi mơ̆ng ară anei truh kơ êdei, phung mda asei lŏ dơ̆ng bi lar, amâo mâo lui ôh knhuah dhar kreh djuê ana pô. Msĕ si mkra brô̆ Klông Put, brô̆ Tơrưng. Dŭm mta bruă kâo ngă amâo mâo pô mtô ôh, knŏng kâo khăp leh anăn čŏng duah ngă mă. Tông čing knŏng duah dlăng mă mơ̆ng phung mduôn đuč.

Mâo sa klei yuôm bhăn hŏng ayŏng Huynh. Mâo hŏng anei 12 thŭn, anăn jing hlăk mlan 10 thŭn 2010, čar Kon Tum mkŏ mjing klei kdŏ mmuñ, ayŏng Huynh ba truh hlăm klei kdŏ mmuñ anei klei tông čing boh tâo ngă kơ phung ktuê dlăng kjăp êdi, kyuadah anei jing gưl tal êlâo mâo čing boh tâo ti čar Kon Tum. Leh kơnăn mtam, knơ̆ng bruă dhar kreh, mjuăt ktang asei mlei leh anăn hiu čhưn ênguê nao truh ti sang ayŏng Huynh čiăng ksiêm hriăm leh anăn čih yap kdrăp pĕ tông anei. Anăn jing kdrăp pĕ tông mơ̆ng đưm đă, ayŏng A Huynh ƀuh ti hnoh êa Ya Lân, jing dŭm klŏ boh tâo ka mâo ôh klei mkra mjing mơ̆ng mnuih. Hŏng bruă ƀuh čĭng boh tâo đưm ti alŭ wăl Dưr krĭng Lăn Dăp Kngư, Ayŏng A Huynh mâo bruă sang čư êa čar Kon Tum mđup brei hdră pah mni mâo klei đru “Tui duah leh anăn kriê pioh kdrăp pĕ tông djuê ana, čing boh tâo”

“Kyua klei khăp mơ̆ng pô, ayŏng čŏng nao hlăm dliê duah mă đing kram, đrao wĭt mkra mjing. Koh đrao, kram leh anăn duiñ grăp klŏ boh tâo leh anăn dăp jing čing amâodah kdrăp pĕ tông djuê ana kâo khăp êdi. Leh anăn, kâo hmâo kdrăp čing boh tâo amâodah kdrăp pĕ tông hŏng kram, đrao, amâo mâo klei lŏ mdê ôh, knŏng sơnăn đuč. Mnơ̆ng kâo mkra mjing mâo sa kdrăp čing boh tâo, brô̆ goong amâodah ting ning čiăng pĕ mơak đuč”.

A Huynh dôk pĕ brô̆ kni leh anăn ting ning

Hŏng Ayŏng A Huynh, bruă tui duah leh anăn mkra mjing kdrăp pĕ tông jing klei khăp čiăng, ngă čiăng mơak, ƀiădah klă klơ̆ng anăn jing sa mta bruă kriê pioh leh anăn bi lar klei yuôm bhăn dhar kreh djuê ana mnuih jarai. Klei thâo leh anăn klei khăp mơ̆ng ayŏng mâo knŭk kna čih yap leh anăn mđup brei klei pah mni pô thâo mbruă êdeh êdi êjai ñu mrâo 35 thŭn.

“Pô tŭ mơ̆ng bruă kâo ngă mâo čar uêñ mĭn êdi. Kâo dưi hiu pĕ tông hlăm djăp anôk, nao truh ti Hà Nội leh anăn dŭm čar mkăn. Kâo ăt mâo Đảng leh anăn knŭk kna mđup brei klei pah mni Pô thâo mbruă êdah êdi, grăp mlan mâo klei đru mơ̆ng knŭk kna êbeh 800.000 prăk. Bi tơdah nao rang mdah, êpul tông čing mơ̆ng mông mâo anôk bruă dhar kreh atăt drông”.

Hŏng klei hmăng hmưi kriê pioh leh anăn klei lar klei khăp čăng, dhar kreh djuê ana truh hŏng phung mda asei, hruê mmông êgao, pô thâo mbruă A Huynh dưi bi kƀĭn leh phung hđeh thŭn êdam ngiêk ti ƀuôn Čô̆t, wăl krah Sa Thầy, kdriêk Sa Thây, čar Kon Tum čiăng mtô klei tông čing, pĕ tông, mmuñ klei mmuñ ênhiang djuê ana leh anăn mkra mjing kdrăp pĕ tông djuê ana. Thŭn anei êgao leh 40 thŭn, pô thâo mbruă A Huynh ăt dôk guiñ guiñ hŏng bruă tui duah, mkra mjing leh anăn mtô kơ phung mda asei, wơr hĕ klei dôk mô̆. Anei djŏ sĭt jing êkei êdam Jarai mkăp jih ênuk thŭn mda kơ klei mmuñ ênhiang djuê ana.

Pô mblang: Y-Ƀel Êban