VOV4.Êđê- Mrâo anei, ti Hà Nội, Êpul bruă hđeh êdam êra gưl dlông Hồ Chí Minh bi mguôp hŏng êpul bruă hâo hưn gưl dlông, Dhar bruă Dhar kreh, mtô mjuăt bi hriăm mơ̆ng bruă kƀĭn ala, phŭn bruă dhar kreh, mjuăt ktang asei mlei leh anăn hiu čhưn ênguê, sang mđung rup Việt Nam leh anăn êpul hgŭm phung čih klei yăl dliê Việt Nam mkŏ mjng klei kƀĭn trông “Anôk êlan mạng leh anăn bruă klam răng mgang kdriêl dhar kreh, klei mĭn mơ̆ng hlăk thŭn mda”. Blŭ hlăm klei kƀĭn, khua êpul bruă hâo hưn gưl dlông Nguyễn Trọng Nghĩa mtă kơ dŭm gưl bruă hđeh êdam êra dưn yua jih hnơ̆ng klei găl mơ̆ng anôk êlan mạng, klei mlih mrô čiăng mđĭ hĭn klei thâo săng mơ̆ng gưl thŭn mda kơ knhuah gru hƀuê ênuk, dŭm mta knhuah dhar kreh jăk siam mơ̆ng djuê ana.

Hlăm klei bi kƀĭn, phung bi ala kƀĭn ksiêm dlăng kơ klei hmaĭ mơ̆ng internet, dŭm hdră bruă hluh knông lăn hŏng bruă răng mgang kdriêl dhar kreh klei mĭn hlăm wưng ară anei. Lač kơ dŭm mta mnơ̆ng dhar kreh hlăm internet, dŭm klei bi mguôp brei thâo, brei mâo klei bhiăn ktuê dlăng hŏng mnơ̆ng dhơ̆ng anei hlăm internet, čiăng rơ̆ng mkăp klei hâo hưn hŏng hdră djŏ klă, kpă ênuah, klă mngač, tă hdră dhar kreh kơ mnuih ƀuôn sang, boh nik phung mda asei, mjing wăl mtăp mđơr, êđăp ênang čiăng kơ dŭm tur knơ̆ng, mnơ̆ng dhơ̆ng dhar kreh hlăm internet hlăm ala čar đĭ kyar.

Anôk bi kƀĭn

Čiăng kơ phung mda asei hrăm mbĭt răng mgang tur knơ̆ng dhar kreh hlăm internet, K’iăng nai prŏng - nai prĭn Nguyễn Thị Thu Phương, Khua Anôk bruă dhar kreh kdŏ mmuiñ ala čar (Phŭn bruă dhar kreh mjuăt ktang asei mlei - hiu čhưn ênguê) brei thâo, brei mjing anôk ngă bruă kơ phung mda asei mbruă.

"Anôk ngă bruă ngă kơ arăng đaŏ knang, diñu thâo săng jih, brei mâo klei bi kƀĭn amâodah dŭm hdră thơ̆ng kơ bruă, amâodah mkŏ mjing lu knăm mơak… Dŭm hdră anăn jing hdră čiăng mjing anôk kơ phung mda asei dưi mkŏ hŏng klei leh êgao. Amâo mâo ôh hdră ngă jăk hĭn, bi lar hĭn tơdah phung hđeh bi mlih ya klei jing phŭn hŏng klei mrâo, klei diñu bi ƀuh mrâo”.

 Blŭ hrăm hlăm klei bi kƀĭn, Khua Dhar bruă hâo hưn mtô mblang gưl dlông Nguyễn Trọng Nghĩa bi mni kơ Êpul êdam êra leh anăn phung mda asei Việt Nam ngă leh leh anăn dôk mkŏ mjing lu hdră, bruă ngă klă klơ̆ng čiăng đru răng kriê, mđĭ lar knhuah dhar kreh djuê ana, răng mgang klei mĭn dhar kreh hlăm boh klei ba yua mrô.  Anăn jing dŭm êbâo klei bi kƀĭn kđi čar, dŭm bruă ngă lông wĭt kơ phŭn agha, hiu dlăng sang kriê pioh, anôk kriê pioh hƀuê ênuk, hiu dlăng ti êngao. Dŭm klei bi lông ksiêm dlăng dhar kreh, knhuah gru hƀuê ênuk djuê ana mâo ƀrư̆ hruê ƀrư̆ lu, boh nik bruă ba yua kdrăp mrô dưi pŏk ngă lu. Êpul bruă êdam êra, êpul hgŭm mâo leh lu klei mĭn mbruă, mjing anôk, đru prăk bi liê kčĕ hdră êlan, mnuih mă bruă kơ phung êdam êra mlih mrâo mbruă hlăm lu mta bruă, hlăm anăn mâo phung duh mkra mnia blei mda asei tŭ jing leh hlăm bruă dhar kreh, hŏng mnơ̆ng dhơ̆ng dhar kreh jiă kma krĭng kwar, mguôp hŏng dhar kreh hiu čhưn ênguê, hŏng kdrăp mrâo mrang.

Khua Dhar bruă hâo hưn mtô mblang gưl dlông Nguyễn Trọng Nghĩa

Khădah, hlăm boh klei bruă tuh tia mkra mjing tal 4, hŏng klei đĭ kyar ktang mơ̆ng kreh knhâo leh anăn kdrăp mrâo, klei ba yua mrô, Khua Dhar bruă hâo hưn mtô mblang gưl dlông Nguyễn Trọng Nghĩa mtă kơ dŭm gưl knuă druh êdam êra ba yua jih klei găl hlăm internet, hdră ba yua mrô čiăng mđĭ klei thâo săng phung mda asei kơ knhuah gru hƀuê ênuk, ênoh yuôm dhar kreh mdê hjăn, yuôm bhăn djuê ana ăt msĕ mơh kơ bruă klam mơ̆ng dhar kreh hŏng klei đĭ kyar lăn čar.

“Dŭm gưl knuă druh êdam êra ba yua jih klei găl mơ̆ng internet, hdră bi mlih mrô čiăng mđĭ klei thâo săng mơ̆ng phung mda asei kơ knhuah gru hƀuê ênuk, ênoh yuôm dhar kreh mdê hjăn mơ̆ng djuê ana ăt msĕ mơh bruă klam dhar kreh hŏng klei đĭ kyar lăn čar. Hlăm hdră bruă tuh tia mrâo mrang 4.0, êpul bruă êdam êra brei kƀĭn ksiêm hriăm, bi klă dŭm hdră đru kơ êdam êra mphŭn čô̆ kơ bruă hlăm klei dhar kreh, duh bi liê, đru kơ klei bi lông, hdră mphŭn čô̆ kơ bruă kơ dhar kreh, klei mĭn, mnơ̆ng dhơ̆ng dhar kreh yuôm, mâo klei lar bra jăk hĭn hlăm phung êdam êra, hđeh êlăk”.

Hlăm klei kƀĭn trông, phung bi ala ăt kƀĭn bi trông kơ dŭm boh phŭn kơ hnơ̆ng yuôm bhăn, klei hmaĭ mơ̆ng internet, dŭm hdră bruă hluh knông lăn hŏng bruă răng mgang dhar kreh klei mĭn hlăm wưng ară anei; boh klei leh anăn hdră msir kñăm mđĭ lar ênoh yuôm dhar kreh djuê ana đru mđĭ dŭm bruă mkra mjing dhar kreh ti Việt Nam đĭ kyar, kpưn đĭ dlông rŏng lăn… Đa đa phung bi ala ăt kčĕ kơ klei bhiăn ktuê dlăng hŏng dŭm mta mnơ̆ng dhơ̆ng dhar kreh hlăm internet, duh myơr, hdră tă čiăng đru kơ êpul êdam êra cộng sản Hồ Chí Minh, dŭm gưl, dhar bruă leh anăn phung mda asei Việt Nam hgŭm klă sĭt hĭn, êlam hĭn hlăm bruă răng mgang dhar kreh klei mĭn./.

                                               Pô mblang: H’Zawut Ƀuôn Yă