VOV4.Êđê- Čar Lâm Đồng hlăk dôk mprăp kơ bruă mkŏ mjing Festival mnga Đà Lạt tal 9 thŭn 2022. Anei jing bruă yuôm bhăn hĭn mơ̆ng êlâo dih truh kơ ară anei hŏng 2 mlan mkŏ mjing. Hŏng akŏ jing: “Đà Lạt – ƀuôn prŏng 4 yan mnga”, Festival mnga Đà Lạt tal anei srăng mkŏ mjing hlăm 2 mlan, mơ̆ng hrue 1/11 truh jih hrue 31/12.

Êngao kơ 10 mta hdră mâo mdah mkŏmjing, lu jing ti ƀuôn prŏng Đà Lạt, Festival mnga tal anei mâo 41 hdră sa ai hŏng bruă rang mgang mâo mkŏ mjing hlăm jih dua ƀuôn prŏng Đà Lạt lehanăn Bảo Lộc lehanăn mbĭt hŏng dŭm kdriêk hlăm čar. Tui si Ngô Văn Ninh, khua adŭ bruă, pô blŭ bi ala mơ̆ng knơ̆ng bruă sang čư̆ êa čar Lâm Đồng, Festival mnga Đà Lạt jing wưng lŏ mđĭ hĭn klei tŭ dưn anăn knăl “Đà Lạt - ƀuôn prŏng mnga”, bi mguôp mbĭt hŏng bruă hiu čhưn ênguê bruă lŏ hma pla mjing, lehanăn hưn mdah lu boh mnga mâo mơ̆ng alŭ wăl. Ară anei bruă mprăp hlăk mâo dŭm anôk bruă, êpul êya hlăm čar nga leh hŏng jih ai tiê./.

VOV/Pô mblang: Y-Khem