VOV4.Êđê- Hŏng akŏ “Hdĭp leh anăn čang hmăng”, hruê klei duê Việt Nam tal 20 ti Dak Lak dưi mkŏ mjing mơ̆ng hruê 15 truh 17/2 ti êlan dlăng hră - kphê Ƀuôn Ama Thuôt. Hdră anei kyua Êpul hgŭm kdŏ mmuiñ čar Dak Lak bi hgŭm hŏng Knơ̆ng bruă dhar kreh mjuăt asei mlei hiu čhưn ênguê mkŏ mjing hŏng lu klei mdê hĭn, jiă kma knhuah dhar kreh djuê ana tinei.

Mphŭn pŏk hŏng klei rang mdah tông čing čhar lehanăn klei bhiăn jak iêu tuê mnăm kpiê čeh mơ̆ng mnuih Êđê, hruê klei duê Việt Nam tal 20 ti Dak Lak mâo lu mnuih lehanăn phung tuê hiu čhưn nao hgŭm. Hlăm wăl anôk ti Êlan dlăng hră – mnăm kphê Ƀuôn AmaThuôt, phung tuê hiu čhưn dưi dlăng dŭm klei kdŏ mmuñ jiă knhuah djuê ana, mguôp hŏng klei tông čing čhar, tông ayŭ kdrăp djuê ana, răk klei duê mbĭt hŏng lu hdră bruă mkăn msĕ si čih kač rup, krah mkra rup hŏng kyâo, čih hră thư pháp, rang mdah rup... Nghệ sỹ Linh Nga Niê Kđăm, ti ƀuôn prŏng Ƀuôn Ama Thuôt lač snei:

        “Hlăm wưng dôk mâo klei ruă Covid, pô mkŏ mjing snei dưi leh, jăk êdi, kâo ƀuh mâo lu jơr lehanăn lu hdră bruă mbĭt anăn mâo klei bi hgŭm, jiă knhuah dhar kreh. Čang hmăng dŭm hruê msĕ snei srăng lŏ mâo lu hĭn phung khăp kơ klei duê, klei čih yăl dliê hriê mbĭt lehanăn khăp kơ dhar kreh dlăng hră mơ̆ng mnuih Việt ăt đĭ kyar hĭn mơh”

Klei bhiăn klei duê hlăm Hruê klei duê Việt Nam ti Dak Lak

        Boh nik, hlăm knăm mphŭn pŏk Hruê klei duê Việt Nam ti Dak Lak, lŏ bi êdah leh kdrêč klei khan Mdrŏng Dam, yăl dliê kơ sa čô jhŏng ktang hlăm klei khan Êđê. Anei jing gưl tal êlâo hdră anei dưi hưn mthâo, ba mdah hlăm wăl anôk lu mnuih ti ƀuôn prŏng Ƀuôn Ama Thuôt. Hmư̆ pô mbruă êdah êdi Vũ Lân, sa čô ksiêm hriăm kơ knhuah dhar kreh dŭm djuê ana krĭng lăn dap kngư lač, bruă ba klei khan hlăm hdră anei mjing leh gru kruăk jăk siam, knŏng mâo mă ti lăn dap kngư hlăm hruê klei duê mơ̆ng ala čar:

“Kâo ƀuh jăk êdi jing kdrêč hưn mthâo “Klei khan”, jing klei khan mơ̆ng mnuih Êđê. Klă sĭt, anei jing klei duê mơ̆ng mnuih ƀuôn sang krĭng lăn dap kngư, diñu yua klei duê hlăm grăp boh blŭ mjing ênhiang mmuñ, klei khan kơ kdrêč blŭ, klei duê anăn, jih jang klei anăn mâo klei bi mguôp kjăp hŏng dŭm ênhiang mmuñ dŭm djuê ana krĭng lăn dap kngư. Anei jing klei jăk jĭn êdi.

Hdră kdŏ mmuiñ hŏng lu klei hdră mdê mdê, jiă kma Lăn Dap Kngư

        Hŏng boh phŭn “Hdĭp lehanăn čang hmăng”, hruê klei duê lŏ mâo dŭm hdră bruă lar bra klei khăp čiăng msĕ si mđup brei dŭm hdruôm hră, klei čih kač rup čiăng ba čhĭ, mjing keh đru kơ mnuih ruă ƀun, klei bhiăn bi phiơr mđung klei duê ba m’ĭt klei čang hmăng dŭm klei jăk siam hlăm klei hdĭp. Niê Thanh Mai, Khua êpul hgŭm čih klei duê, klei yăl dliê lehanăn kdŏ mmuñ čar Dak Lak brei thâo, hdră anei srăng sui truh kơ hruê 17/2 hŏng klei čiăng hmăng dưi lar bra klei khăp kơ klei duê, klei kdŏ mmuñ truh kơ mnuih ƀuôn sang.

        “Hmei čang hmăng hruê m’ak anei klă sĭt jing hruê kơ phung khăp kơ klei duê, kyua anăn hlăm hdră hruê anei snăn knhuah dhar kreh jăk siam mơ̆ng krĭng lăn dap kngư dưi bi êdah. Lehanăn hlăm hdră mmăt anei “Hdĭp lehanăn čang hmăng”, hmei srăng mâo dŭm klei mmuñ jăk siam kơ krĭng lăn dap kngư prŏng siam, klei duê lehanăn klei čang hmăng, klei duê lehanăn yan mnga mbĭt hŏng klei čang hmăng mlih mrâo čiăng ba m’ĭt truh kơ jih jang mnuih ƀuôn sang hluê hŏng ai tiê čiăng ba klei hơ̆k m’ak truh kơ mnuih khăp kơ klei duê./.

                                                    Pô mblang: H’Nêč Êñuôl