VOV4.Êđê - Pô mbruă H’Bim Kƀuôr, kreh iêu Amĭ Blan, ti ƀuôn Ƀling, să Čư̆ Mgar, kdriêk Čư̆ Mgar, čar Dak Lak, jing pô jih ai tiê hŏng dhar kreh đưm mơ̆ng djuê ana. Dŭm thŭn êgao, ñu khăp m’ai kơ bruă tui ksiêm hriăm dŭm boh tŭ yuôm bruă dhar kreh mơ̆ng djuê ana pô. Amâo djŏ knŏng khăp kơ ênhiang mmuñ djuê ana, tông ayŭ kdrăp djuê ana, ñu lŏ raih bruă pơ̆k mñam:

Drei mrâo hmư̆ leh Eirei hŏng đŏk H’Ƀim Kƀuôr, mnuih ƀuôn Ƀling kreh iêo jing Amĭ Blan sa čô mnuih thâo mbruă. Ñu thâo mñê lu mta klei Eirei, thâo mplĕ pruĕ mmuiñ jăk siam, dưi mmuiñ hŏng lu mta ya klei čiăng bi mmuiñ hlăm klei hdĭp mda aguah tlam mlam hrue. Êngao anăn ñu lŏ thâo kưt mơh, kreh ƀuh lu jing klei kưt jêñ hŏng êkei.

Tui si klei bhiăn mưng mơ̆ng anak Êđê, grăp blư̆ mâo klei djiê brŭ, snăn kreh mâo yơh klei mñê Eirei čiăng đru bi juh găp djuê sang djiê, bi yăl dliê kơ klei hdĭp mnuih leh djiê. Ñu mâo đŏk siam mngač, đăng ngă kwang mâo lu snăk mnuih khăp hmư̆, kyuanăn grăp blư̆ ti anôk mâo klei djiê brŭ ƀuôn jĕ giăm thâodah taih kbưi, mâo yơh mnuih nao iêo ñu mñê eirei jih tlam kma mlam bhung aguah, kyua mâo lu snăk mnuih khăp hmư̆, mñê čiăng đru bi juh găp djuê mâo klei luh hla kyâo mtâo, mmuiñ čiăng lŏ bi hdơr kơ klei hdĭp mnuih leh wĭt hŏng aê aduôn atâo atiêt, lehanăn ăt mñê mơh kơ klei khăp êkei mniê, klei mtă mtăn anak čô hdĭp bi jăk yâo êđăp ênang. Êngao anăn, ñu lŏ hiu mmuiñ hlăm dŭm knăm mơak mơ̆ng ƀuôn sang, klei kdŏ muiñ, bi mjĕ mguôp hŏng dŭm alŭ wăl riêng gah. “Kâo hiu mmuiñ eirei lu hĭn hlăm dŭm klei djiê brŭ, hlăm sang kƀĭn ƀuôn, hlăm dŭm knăm mơak, kâo nao muiñ ti dŭm să kdriêk mkăn lehanăn nao mmuiñ kơ čar mkăn. Ya mta klei mmuiñ kâo ka thâo, snăn pô mđing hmư̆ klei arăng mmuiñ, tui hriăm mơ̆ng anăn. Mâo mơh dŭm klei mmuiñ yăl dliê kơ klei hdĭp knap mñai pô mmuiñ êjai rôč êa ală êjai. Êngao anăn, kâo lŏ kriăng tui hriăm bruă hrĭ mñam bŭng bai, lip knguôr, lehanăn mmuiñ eirei êjai”.

Amĭ Blan yăl dliê; klei khăp kơ klei kưt muiñ, kơ đĭng năm jiă leh hlăm ai tiê klang êrah ñu mơ̆ng điêt mtam, grăp blư̆ hlue amĭ ama nao hma pưk, hmư̆ aê lehanăn ama ayŭ đĭng năm, snăn ñu dơ̆ng tui hriăm hdră ayŭ, lehanăn truh ñu 14 thŭn ñu dơ̆ng raih yơh ayŭ đĭng năm, lehanăn lu mta đĭng mkăn msĕ si đĭng tŭt, đĭng kliă; buôt... Amâo mâo djŏ knŏng êmăt hlăm klei lŏ wĭt lač êjai dôk bi mñê eirei, thâo ayŭ dŭm mta đĭng hlue ênhiang djuê ana pô, ƀiădah ñu jing sa čô mnuih thâo hlăm klei hrĭ mñam, thâo hlăm bruă giêng kpañ mñam m’iêng ao abăn, chiăm djuê ana pô.

Klei hdĭp mda hlăm ênuk ară anei leh, dhar kreh mâo klei bi lŭk mbĭt. Phung hđeh gưl mrâo khăp tui duah klei mrâo hĭn, lehanăn amâo mâo jăk lŏ mđing đei ôh hŏng dhar kreh djuê ana pô. Dôk bi mĭn nanao ti anăp klei msĕ djuê anăn, Amĭ Blan lŏ iêo jak phung hđeh nao čhưn kơ sang ñu, bi mñăm bŭng bai êjai, kưt kdja eirei êjai, lŏ yăl dliê kơ dhar kreh djuê ana pô, knhuah gru jăk siam pô mâo leh. “Kâo mâo mơh klei čiăng mtă kơ phung anak čô brei thâo khăp kơ dhar kreh djuê ana pô. Tơdah drei klă sĭt jing mnuih mbruă snăn brei drei gĭr tui duah, ksiêm hriăm amâo mâo mdei, đăm duah lui ôh ênhiang klei kưt muiñ, kdrăp tông ayŭ pô. Khădah ti anôk nao, ti anôk hdĭp đăm wơr bĭt ôh kơ phŭn agha ana hruĕ pô”.

Y-Ngŭk Niê, kreh iêo jing Aê Suang, ti ƀuôn Hŭk B, să Čư̆ Mgar, kdriêk Čư̆ Mgar, čar Daklak jing sa hlăm phung thâo kưt mmuiñ mơh kreh đuĕ hiu mbĭt hŏng amĭ Blan, mâo klei yăl dliê kơ Amĭ Blan jing mnuih mbruă, thâo kriê pioh lehanăn lŏ bi lar knhuah gru dhar kreh djuê ana pô, lehanăn mâo phung ƀuôn sang khăp snăk. Ñu lehanăn phung ƀuôn sang mpŭ snăk kơ klei Amĭ Blan thâo kriê pioh knhuah gru djuê ana pô: “Kâo jing mnuih khua thŭn leh mơh, ƀiădah kâo muiñ amâo mâo jăk, lehanăn siam đŏk msĕ hŏng Amĭ Blan ôh. Mâo lu snăk mnuih thâo kưt muiñ jing phung khua thŭn wĭt hŏng aê aduôn atâo atiêt dơ̆ng jih leh, hmei jing phung gưl êdei gĭr ktĭr yơh lŏ čuê djă mtô bi hriăm, bi lar ênhiang klei kưt muiñ, kdrăp pĕ tông lehanăn ayŭ djuê ana pô hŏng jih jang ƀuôn sang jĕ giăm taih kbưi”.

Y Mang – K’iăng khua adŭ bruă dhar kreh hâo hưn kdriêk Čư̆ Mgar, čar Daklak brei thâo: Hlăm ƀuôn sang ară anei ăt adôk mâo mnuih thâo kưt mmuiñ ênhiang djuê ana pô. Anăn jing phung jih ai tiê thâo khăp hŏng knhuang gru dhar kreh djuê ana pô. Hlăm anăn mâo Amĭ Blan jing sa čô mnuih êdah hĭn êdi: “Amĭ Blan mâo đŏk mmuiñ siam, hlăm klei ñu muiñ ñu êmăt snăk lŏ mmuiñ bi kmlah hŏng pô mkăn, hŏng đŏk mmuin kwang, lehanăn mâo lu mnuih khăp hmư̆. Đru mguôp leh yuôm bhăn hlăm klei bi kriê pioh, êngao kơ dŭm klei bi kưt mmuiñ hlăm dŭm knăm mơak, anôk bi lông kưt mmuiñ, snăn ăt đru bi mtô bi hriăm mơh kơ anak čô pô mmuiñ eirei, lehanăn kưt”.

Hmư̆ Amĭ Blan yăl dliê, dlăng kơ mnơ̆ng ñu hrĭ mñam, lehanăn mđing hmư̆ đŏk ñu eirei, lehanăn kưt mơak mñai, phung ƀuôn sang hlăm ƀuôn dưi thâo ƀuh yơh klei jăk, klei siam anăn. Mơ̆ng anăn, lŏ mâo klei thâo khăp hĭn, lehanăn thâo mpŭ hĭn kơ knhuah gru dhar kreh djuê ana pô./.