VOV4.Êđê - Leh sa wưng mdei kyua klei hmăi amâo mâo jăk mơ̆ng klei ruă tưp Covid-19, ară anei bruă hiu čhưn ênguê yang ƀuôn ti Dak Lak lŏ wĭt msĕ hŏng êlâo leh, mnuih ƀuôn sang hlăm dŭm ƀuôn êlan ti čar Dak Lak mâo leh dŭm klei mlih, čŏng bi mrâo čiăng mkŏ mjing klei jak iêo, ba kơ phung tuê hui čhưn ênguê djăp klei jăk yâo.

Sui leh mnuih ƀuôn sang ti Ƀuôn Tơ̆ng Jŭ, să Êa Kao, ƀuôn prŏng Ƀuôn Ama Thuôt lŏ dưi hmư̆ ênai čing čhar kwang bŏ čư̆ dliê, dưi nao hlăm dŭm knăm m’ak mơ̆ng djuê ana pô msĕ si knăm akâo klei suaih pral, knăm mjĕ mjing ayŏng adei. Mrâo nao ti knăm akâo klei suaih pral mơ̆ng mnuih djuê ana Êđê dưi hưn mdah wĭt ti homestay Hnoh Ea Kao, ƀuôn Tơ̆ng Jŭ lehanăn tui ksiêm kơ hdră hiu čhưn dlăng knhuah dhar kreh ti dŭm anôk hlăm Dak Lak, Ayŏng Lê Ngọc Tân, tuê hiu čhưn mơ̆ng Hà Nội brei thâo:Gưl tal êlâo kâo dưi nao hlăm knăm ngă yang akâo klei suaih pral, kâo ƀuh m’ak êdi. Kâo dưi nao dlăng đang kphê, Drai Sap, Ênao Lăk, lehanăn kâo ƀuăn hŏng gŏ sang ti Hà Nội hlăm sa hruê giăm hĭn ti knăm yan mdei prŏng srăng lŏ hriê čhưn ti Ƀuôn prŏng Ƀuôn Ama Thuôt, tui ksiêm kơ knhuah dhar kreh mnuih djuê ana ƀiă tinei, digơ̆ jăk êdi, thâo khăp čiăng kơ phung tuê”.

Leh sa wưng mdei, hlăm mlan giăm anei, leh klei ruă Covid 19 dưi ksiêm dlăng, dŭm êpul hiu čhưn truh ti Ƀuôn Tơ̆ng Jŭ ƀrư̆ hruê ƀrư̆ lu. Hŏng klei găl mơ̆ng lăn êa jăk siam, dưi krơ̆ng lu bruă djuê ana mơ̆ng đưm msĕ si bruă pơ̆k mñam, tŭk knă kpiê čeh, čing čhar… mbĭt hŏng ktuê êlan čih kač rup siam yăl dliê kơ klei hdĭp, dhar kreh mơ̆ng mnuih Êđê, Mnông lehanăn dŭm anôk jăk siam mơ̆ng čar, ƀuôn hlăk dôk jak iêu lu mnuih hriê mă rup, hiu čhưn. H’Yam Buôn Krông, khua ƀuôn Tơ̆ng Jŭ brei thâo, ară anei ti ƀuôn mâo leh lu êpul ngă bruă hiu čhưn ênguê hŏng anăn pia Krĭng hiu chưn ênguê ƀuôn čih kač rup Tơ̆ng Jŭ. Êpul mâo 9 čô jing mnuih djuê ana Êđê hlăm ƀuôn, mâo lu klei đru mguôp lehanăn mkăp mă bruă tơdah mâo tuê hriê čhưn truh ti krĭng ƀuôn sang.Ăt mâo lu êpul tuê hiu čhưn mơ̆ng dŭm čar msĕ si ti Hà Nội, Sài Gòn, Huế lehanăn dŭm čar riêng gah, diñu hriê tinei ƀơ̆ng dŭm mta mnơ̆ng jiă knhuah tinei, dlăng tông čing čhar, tui ksiêm kơ knhuah dhar kreh mơ̆ng mnuih djuê ƀiă tinei mtam. Ară anei, 9 gŏ êsei hmei mâo kah mbha mdê bi bruă, si tô hmô pla djam, rông ŭn mnŭ, tŭk knă kpiê čeh. Kâo čang hmăng êdei anei krĭng hiu čhưn ênguê anei srăng đĭ kyar lu hĭn, mâo lu mnuih hgŭm hĭn mơh.

Bi ti ƀuôn Akŏ Dhông, anôk dưi dlăng jing gru kruăk ti hră kak lăn hiu čhưn ênguê ti ƀuôn prŏng Ƀuôn Ama Thuôt, hdră hiu čhưn ênguê êpul êya mâo leh čar Dak Lak ruah čuăl mkă mơ̆ng thŭn 2019. Knhal jih mlan 3 thŭn anei, Anôk bruă sang čư̆ êa čar Dak Lak mâo leh hră m’ar đru mđĭ kyar bruă hiu čhưn ênguê ti ƀuôn lehanăn 5 čô hlăm ƀuôn. Dŭm hdră đru mâo rŭ mdơ̆ng anôk bruă nah gŭ, hdră hiu čhưn tui ksiêm, hdră hrui mƀĭn lehanăn msir mghaih djah djâo, bi msiam wăl hdĭp mda, mjuăt bi hriăm, mđĭ klei thâo hlăm hdră bruă anei.

Ară anei, hlăk hdră hiu čhưn ênguê dưi lŏ pŏk ƀăng, krĭng ƀuôn sang mâo leh dŭm klei bi mlih. Dŭm gŏ êsei hlăm ƀuôn mđing pŏk mlar wăl anôk, rŭ mdơ̆ng thiăm dŭm boh sang dlông djuê ana, bi mlih gru hmô ngă bruă duh mkra mnia mblei, bi mguôp hdră huă čhưn, tui ksiêm mnơ̆ng ƀơ̆ng huă, dhar kreh čiăng jak iêu lu phung tuê hiu čhưn. Hluê amai H’Tít Aliô̆, mnuih ƀuôn sang ƀuôn Akŏ Dhông, mta mrâo mơ̆ng hdră hiu čhưn ênguê êpul êya ti ƀuôn ară anei jing grăp čô mnuih hlăm ƀuôn bi hgŭm mjing sa hdră bi hgŭm kluôm dhuôm jiă knhuah dhar kreh djuê ana:Nao hgŭm hlăm hdră hiu čhưn ênguê, grăp gŏ sang srăng mâo sa klei mdê ƀiădah diñu ăt mâo sa klei msĕ mbĭt, anăn jing klei hgŭm mguôp lehanăn krơ̆ng kjăp knhuah dhar kreh, čiăng knhuah dhar kreh anei đĭ kyar kơ êpul êya, kơ pô êlâo hĭn, leh kơnăn truh kơ ayŏng adei mkăn, dưi thâo, dưn lehanăn tui ksiêm kơ knhuah dhar kreh anăn ƀrư̆ hruê ƀrư̆ đĭ kyar hĭn.

Mbĭt anăn, mrâo anei, Anôk bruă Dhar kreh – mjuăt ktang asei mlei lehanăn hiu čhưn ênguê ƀuôn prŏng Ƀuôn Ama Thuôt mkŏ mjing leh adŭ mjuăt bi hriăm tông čing lehanăn kdŏ čhuang kơ phung êdam êra mnuih Êđê ti ƀuôn Akŏ Dhông. Adŭ anei mâo klei mđing mơ̆ng lu mnuih ƀuôn sang. Khua mduôn Y-Nuel Niê (Ama Jenny) brei thâo, gưl tal êlâo, adŭ mtô bi hriăm tông čing dưi mkŏ mjing ti ƀuôn, pŏk sa klei găl mrâo hlăm hdră lŏ čuê pioh knhuah yuôm dhar kreh, đru hlăm hdră mđĭ kyar bruă hiu čhưn ênguê êpul êya ti krĭng ƀuôn sang.Ti anăp kâo čang hmăng dưi mâo lu klei tŭ jing hlăm hdră tông čing mniê, tal êlâo brei mâo anôk hriăm. Tal 2 jing mđing mâo čing bi hriăm. Tal 3 srăng đru kơ êa mnăm. Anei jing adŭ tal êlâo ti ƀuôn Akŏ Dhông, ară anei phung mniê lehanăn di amĭ sa ai s’aĭ. Anei srăng jing klei bi hmô čiăng kơ ƀuôn mkăn tui hriăm lehanăn mđĭ kyar hlăm wưng ti anăp.

Amâo djŏ knŏng ti Ƀuôn Ama Thuôt, dŭm kdriêk mkăn mơ̆ng Dak Lak msĕ si Lăk, ƀuôn Đôn ăt dôk mđĭ hdră hiu čhưn ênguê êpul êya, nao čhưn dlăng lăn mnga êa m’ak, tui ksiêm dlăng bruă ngă lŏ hma. Hŏng klei gĭr tui ksiêm, ngă mrâo mơ̆ng alŭ wăl, dŭm anôk hiu čhưn ri Dak Lak ƀrư̆ ƀrư̆ đĭ kyar hdră hiu čhưn ênguê êpul êya čiăng jak iêu lu phung tuê hiu čhưn, đru mguôp hlăm hdră lŏ krŭ wĭt lehanăn mđĭ kyar bruă hiu čhưn ênguê ti alŭ wăl./.

H’Nêč pô mblang