VOV4.Êđê - Hŏng mnuih djuê ana Jarai leh anăn dŭm djuê ana mkăn ti krĭng Lăn Dăp Kngư. Knăm mơak mdiê mrâo jing sa hlăm dŭm klei bhiăn yuôm bhăn hŏng lu mta bruă ngă jăk siam wăt ti pưk hma leh anăn hlăm sang. Hlăm hdră hruê anei, hmei mâo klei čih hưn kơ klei jăk siam hlăm klei ngă yang mdiê mrâo ti pưk hma mơ̆ng mnuih Jarai ti čar Dak Lak.

Hlue si si klei bhiăn mnuih Jrai ti čar Dak lak, knăm huă êsei mrâo mơ̆ng mnuih ƀuôn sang dưi mbha dua kdrêč klă sĭt, sa jing klei ngă yang, dua jing klei huă mnăm. Hlăm kdrêč tal sa mâo 3 bruă phŭn jing ngă yang huă êsei mrâo ti hma, ti pưk, ti sang pô mdiê. Êlâo kơ ngă yang huă êsei mrâo ti sang, mnuih Jrai srăng ngă yang huă êsei mrâo ti hma. Kpă Chua ti kdriêk Ea Hleo, čar Dak Lak brei thâo: Hlăm tal huă êsei mrâo hlăm hma anei mnơ̆ng kơ klei ngă yang knŏng mâo kpiê čeh leh anăn mnŭ.Grăp thŭn, êlâo kơ wĭa mdiê arăng ngă yang ti hma. Ngă yang ti hma, mnơ̆ng ngă yang jing dua čeh kpiê, dua drei mnŭ leh anăn sa boh mtĭl. Čeh kpiê ta kă ti hma, bi čeh tal dua kă ti djiêu pưk, leh anăn sa kŏ mnŭ, k’iăng mnŭ srăng čŭt ti sa ƀĕ giê hlăm hma.

Hŏng mnuih Jrai, pô riu yang hlăm klei bhiăn ngă yang jing pô khua thŭn hlăm găp djuê. Kyua pô anei jing pô mâo bruă klam leh anăn kơhưm yuôm bhăn hlăm djuê ana. Jing mnuih khua thŭn mâo klei thâo leh anăn kơhưm mơ̆ng găp djuê. Kpă Chua lŏ brei thâo:Anăn jing pô akŏ arăng bâo hlâo arăng yap mơ̆ng gŏ sang găp djuê ana anăn. Kyua jih jang dŭm djuê ana mơ̆ng mnuih Jrai mâo sơăi sa čô riu yang, pô anăn jing pô akŏ arăng bâo hlâo arăng yap mơ̆ng gŏ sang.

Čiăng kơ klei ngă yang dưi mkŏ mjing jăk, mơ̆ng aguah ưm pô sang hŏng phung hlăm gŏ sang leh anăn pô riu yang nao mprăp bi jăk ti hma mnơ̆ng čiăng ngă yang kơ mdiê ti hma. Leh mnơ̆ng ngă hŏng pô riu yang mprăp leh, mnuih Jrai ngă yang huă êsei mrâo ti hma êlâo kơ wiă mdiê ba wĭt dưm hlăm brŏng ti sang.

Hlăk êjai pô riu yang ngă yang, ñu srăng ndưm kngan kjuh blư̆ ti čeh kpiê leh anăn kwưh kơ 7 čô yang mâo: Yang lăn, yang adiê, yang êa, yang pô rông ba, yang răng mgang, yang kriê dlăng leh anăn yang mdiê brei mdiê pral ksă, brei mdiê ƀâo mngưi. Boh nik, leh dŭm klei pô riu yang kwưh, phung êdam êra suaih pral srăng puôt djơ djĕ mdiê, amâo bi joh ôh ana mdiê, amâo ngă amâo jăk kơ phung yang, snăn kơh, yan boh mnga thŭn anăn srăng mâo lu, jăk siam.

Sĭt leh myơr mnơ̆ng ngă yang, hlue si klei bhiăn mnuih Jrai, pô dưi iêô mnăm kpiê čeh tal êlâo jing phung mniê hlăm sang, leh anăn brei mô̆ leh anăn amĭ pô mdiê mnăm. Kyua mnuih ƀuôn sang Jrai mă djuê tĭng kơ amĭ, kyua anăn, jih jang bruă djŏ tuôm kơ klei bhiăn ngă yang kyua phung mniê ngă êlâo hĭn. Hlue si Kpă Chua klei bhiăn iêô mnăm kpiê čeh lŏ dơ̆ng dưi ngă leh pô lŏ čuê êdei anăn jing pô mdiê leh anăn ayŏng mô̆ pô mdiê, leh anăn gưl tuê hriê hgŭm mơ̆ng điêt truh kơ prŏng mnăm kpiê čeh, snăn yơh mnăm êla truh jih.Huă mnăm ti pưk, snăn arăng khăng huă mnăm ti êngao jih sa hruê anăn ti hma, mơak hŏng pô hma truh tơl mmăt kơh wĭt.

Ăt msĕ si dŭm knăm ngă yang mkăn hlăm thŭn, hlăm knăm ngă yang huă êsei mrâo hlăm hma mnuih Jrai ăt iêô ayŏng adei nao mơak mbĭt, akâo klei êđăp ênang myun mdah djăp ênŭm kơ gŏ sang hŏng klei diñu nao hgŭm.Pô iêô jih jang phung ayŏng adei găp djuê ƀĭng găp nao mbĭt ƀrư̆ lu ƀrư̆ jăk, mơak hĭn. Knăm huă êsei mrâo anei mprăp nkơ klei hrui wiă, bi phung hriê jing hơêč hmưi kơ pô dưi mâo yan boh mnga… Sĭt nao, tơdah diñu mâo kpiê čeh snăn mba, bi tơdah amâo mâo snăn nao bi mơak.”

Leh knăm ngă yang huă êsei mrâo ti pưk dưi leh jih jang êkei mniê hrăm mbĭt puôt mdiê čiăng dưm hlăm pưk. Leh puôt mdiê snăn mjưh ruê̆ klei ngă yang huă êsei mrâo ti hma. Knăm huă êsei mrâo mnuih Jrai jing gưl čiăng kơ mnuih ƀuôn sang bi mni kơ yang brei kơ ƀuôn sang yan boh mnga jăk siam klei hdĭp trei mđao. Mbĭt anăn ăt jing gưl čiăng kơ gŏ sang, ƀĭng găp sa djuê ana bi hgŭm yăl dliê klei mơak dưi dưn boh tŭ ngă bruă leh anăn čang hmăng yang lŏ dơ̆ng đru kơ yan kơ anăp dưi jăk êa hlĭm hjan ngă pưk hma găl jăk, mơêa kiê kngan./.