VOV4.Êđê - Klei bhiăn mjĕ mjing ayŏng adei ti ala čar drei mâo mơ̆ng đưm đă leh, bi mguôp 2 čô kbưi jing găp djuê jĕ giăm. Mnuih Mnông ti čar Dak Lak ăt mjĕ mjing ayŏng adei, ƀiădah klei mjĕ mjing anei amâo djŏ knŏng 2 čô, ƀiădah wăt 2 gŏ sang sa djuê, jing ayŏng amai adei mjĕ giăm msĕ sa amĭ. Hŏng knăm mjĕ mjing mbĭt hŏng dŭm mta mnơ̆ng myơr dưi mkŏ mjing kdrưh k’ăm.

Hlăm sang dlông Y Thiên Čil, djuê ana Mnông, ti ƀuôn Jiê Yuk, să Dak Phơi, kdriêk Lăk, čar Dak Lak, ênai čing bor êdu êun, hlai mbĭt hŏng asăp riu yang êmưt pral, iêô jak phung yang wĭt hlăm knăm mơak. Hruê anei, gŏ sang Y Thiên Čil ngă klei mjing ayŏng adei hŏng gŏ sang Y Nam Păng Ting hlăm ƀuôn. Anei jing hlâo ƀĭng găp siă suôr, bi kral sui leh. Kyua čiăng bi mguôp jĕ giăm sa găp djuê, diñu bi tŭ ư ngă knăm bi mjing.

Mnơ̆ng ngă yang dưi mprăp mâo čĭm ŭn, điŏ, mtei ksă, boh mnŭ, sa drei mnŭ hdĭp, 2 boh kông, 2 añŭ. Dŭm mta mnơ̆ng anei dưi dưm ti anăp ung mô̆ 2 čô mnuih mkŏ mjing knăm bi mjĕ mjing. Pô ngă klei bi mjing jing khua mduôn Y Krai Čil. Ñu dôk phă ngŏ, tlă anăp hŏng 2 gŏ sang dưi bi mjing leh anăn mphŭn ngă klei bhiăn ngă yang hlăm ênai čing kdrăm kơah. Khua mduôn Y Krai Čil lač:Hruê anei, 2 čô ayŏng adei mkŏ mjing klei bi mjing ayŏng adei. Diñu mâo leh klei bikral mơ̆ng sui leh. Kâo ngă yang čiăng akâo klei suaih pral, akâo kơ 2 čô ayŏng adei msĕ si sa boh sang. Êdeu anei, hlei pô tuôm hŏng dleh dlan snăn diñu srăng bi đru, bi hgŭm”

Klei ngă yang dưi ngă 5 knhuang, hŏng 2 klei bhiăn phŭn jing ngă yang suaih pral, hưn hŏng yang kơ klei bi mguôp 2 gŏ sang leh anăn klei huăn ƀơ̆ng bi khăp plah wah dua gŏ sang dưi mjing. Tal êlâo, pô riu yang mă sa drei mnŭ knô dôk hdĭp dưm ti dlông čeh kpiê, đrut jơ̆ng mnŭ hlăm čeh leh anăn mmia ti adhei 2 hlâo ung mô̆ 7 blư̆, mmia êjai leha năn riu yang leh anăn aduôn aê atâo atiêt wĭt dlăng, đru kơ gŏ sang bi mjing ayŏng adei. Leh kơ anăn, pô riu yang buič 8 aruăt mlâo ti siap mnĭ lŏ dơ̆ng ngă yang kơ grăp čô leh anăn ktiêt ti knga 2 čô êkei leh anăn ti ƀuk 2 čô mô̆ digơ̆. Mă kông mbuh hlăm kngan dua čô ayŏng adei leh anăn mbăk 2 añŭ hlăm kkuê mô̆ digơ̆. Anei jing mnơ̆ng yuôm bhăn kơ klei răng mgang phung yang, akâo klei suaih pral, bi mguôp kjăp plah wah 2 gŏ sang.

KIei ngă yang lŏ dơ̆ng hŏng klei bhiăn huă êsei djam mbĭt. Pô riu yang mă kpiê čeh hlĭng hlăm 4 kčoh, brei kơ 2 čô hlâo ung mô̆ mjing bi truăk kngan mnăm jih. Leh kơ anăn, ñu lŏ mă mnơ̆ng ngă yang jing čhiên dưm điŏ, čĭm, boh mnŭ leh anăn mrei mprăp leh ba kơ 2 gŏ sang dưi ngă yang, čiăng kơ digơ̆ ƀơ̆ng mbĭt leh anăn mčiêm kơ ayŏng adei pô ƀơ̆ng. Anei jing klei kruăk knăl kơ klei bi mguôp, klei bi kah mbha bi đru plah wah 2 ayŏng adei, 2 gŏ sang.

Hlăm jih klei ngă yang, ênao čing bor kwang kdrăm kơah, phung mniê kdŏ klei kdŏ hơêč hmưi leh anăn dlăng klei bi mguôp plah wah 2 gŏ sang. Mơ̆ng ară anei, diñu klă sĭt jing mnuih sa boh sang, jĕ giăm msĕ sa amĭ ama. Y Nam Păng Ting, ayŏng adei mjing hŏng pô sang, brei thâo:Mjing leh ayŏng adei snăn jing msĕ si ayŏng adei ăt msĕ si sa djuê ana siă suôr. Bi mguôp leh anăn êdei anei plah wah gŏ sang kâo hŏng gŏ sang găp kâo jing Y Thiên srăng bi hgŭm, bi đru sĭt tuôm hŏng klei dleh dlan. Ya klei dleh dlan snăn hmei srăng bi đru, kyua mnuih Mnông sĭt bi mjing jing thâo mpŭ, bi hgŭm tliêr kjăp hĭn, lu hĭn mơh”

Mjưh ruê̆ klei bi mjing, grăp čô mnuih hgŭm mnăm kpiê čeh, kdŏ mmuiñ, bi blŭ hrăm leh anăn hơêč hmưi kơ phung dưi mjing bi hgŭm, siă suôr nanao. Leh klei ngă yang ti sang Y Thiên Čil, sui ƀiă, klei ngă yang msĕ snăn srăng dưi mkŏ mjing ti sang pô mjing ayŏng adei jing Y Nam Păng Ting.

Nao hlăm knăm bi mjing, ƀuh klei dưi ngă leh anăn mơak kdŏ mmuiñ hơêč hmưi kơ pô sang, amai H Lang Čil, ti ƀuôn Jiê Yuk, să Dăk Phơi, kdriêk Lăk mơak brei thâo:Anei jing gưl tal êlâo kâo nao hlăm knăm bi mjing, kâo ƀuh ñu yuôm bhăn snăk hŏng djuê ana pô. Jing sa čô mnuih hdĭp sui tinei snăn kâo srăng mâo bruă klam mđĭ lar, kriê pioh, bi hriăm ênuk êdei čiăng kơ grăp čô mnuih thâo kơ klei bhiăn hdĭp mda mnuih Mnông.

Ăt msĕ si si lu djuê ana mkăn ti Lăn Dap Kngư, knăm mjing ayŏng adei jing sa knăm mâo leh mơ̆ng đưm, mâo mnuih Mnông ti Dak Lak kriê pioh mơ̆ng lu gưl ênuk. Tơdah mnuih Êđê knŏng mjing ayŏng adei hlăm sa djuê ana amâodah djuê bi giăm snăn mnuih Mnông lŏ mjing ayŏng adei hŏng dŭm dŭm djuê ana amâo mâo klei bi mjĕ sa êrah, amâo jing sa găp djuê nuê êpul, amâo djŏ jing dua nah găp djuê bi mjing ung mô̆. Bruă bi mjing anei čŏng ngă, amâo pô mgô̆ ôh leh anăn jing sa klei jăk siam hlăm dhar kreh mnuih Mnông, đru mđĭ ai tiê bi mguôp, bi đru plah wah grăp čô mnuih hlăm êpul êya, ƀuôn sang./.

H’ Zawut pô mblang