VOV4.Êđê - Dôk hlăm hdră mđing truh kơ Knăm bi hdơr Hruê djiê kơ Mtao Hùng 10/3, hluê si hruê mlan ƀlĕ, Sang kriê pioh kdrăp hbuê ênuk ala čar mkŏ mjing leh tuôr hiu čhưn “Wĭt hŏng ênuk Hồng Bàng” mâo dŭm hdră bruă tui ksiêm kơ ênuk mkŏ mkra lăn čar mơ̆ng mtao Hùng mbĭt hŏng bruă tui ksiêm kơ klei bhiăn hlăm knăm m’ak mơ̆ng djuê ana Việt đưm. Hlăm hruê tal êlâo, tuôr hiu čhưn “Wĭt hŏng ênuk Hồng Bàng” pral jak iêu klei mđing dlăng mơ̆ng lu mnuih ƀuôn sang.

Gưl tal êlâo hĭn nao hgŭm hlăm tour “Wĭt hlăm ênuk Hồng Bàng”, ayŏng Phạm Văn Tuấn, sa čô dôk hriăm ti sang hră Sỹ quan Lục quân 1, Phŭn bruă lĭng kahan mbĭt hŏng phung ƀĭng hgŭm mâo mmông găl ksiêm hriăm klă klơ̆ng kơ hƀuê ênŭk mkŏ mjing ala čar leh anăn răng mgang ala čar mơ̆ng phung mtao Hùng, leh anăn kriêm hrăm kơ dŭm mnơ̆ng yuôm bhăn ala čar msĕ si Hgơr kông Ngọc Lũ, msat mran Việt Khê hlăm bruă nao čuă dlăng mnơ̆ng rang mdah: “Hlăm hdră anei đru leh kơ hmei thâo săng klă hĭn kơ hƀuê ênuk djuê ana, bi hdơr leh anăn lač jăk kơ dŭm gưl aduôn aê atâo atiêt gĭr jih ai mkŏ mjing, hdră anei lŏ yuôm bhăn hĭn êjai dưi mkŏ mjing djŏ hruê mmông kluôm ala dôk mđing truh hruê bi hdơr hruê djiê mtao Hùng hruê 10/3.

Leh ngă bruă čuă dlăng, phung ksiêm hriăm mơ̆ng sang hră Sỹ quan Lục quân 1 dưi mâo klei ktrâo lač, nao hgŭm hlăm dŭm mta bruă knhuah gru djuê ana msĕ si “Tap mdiê hŏng 2 bĕ hlâo” (bi lông tăp mdiê, kpei, hdei braih), mă kan tluôr hlăm čeh, mblĭr mnga kơ hgơr kông Ngọc Lũ, mkra đuôn mlâo čĭm đua hlăm klei ngă yang. Bi mguôp nao hgŭm dŭm mta bruă anăn hŏng phung ksiêm hriăm mơ̆ng sang hră Sỹ quan Lục quân 1, phung bruă lĭng kahan, sa čô anăn Minh, jing hđeh sang hră gưl prŏng sang hră gưl prŏng Dhar kreh Hà Nội brei thâo:  "Kâo ƀuh tour anei jing jăk êdi, brei kơ grăp čô dưi ksiêm hriăm kơ hƀuê ênuk, boh nik jing dŭm hruê knăm anei, čiăng hlăp lêñ dŭm klei hlăp knhuah gru bi hdơr leh anăn čiăng kơ phung msĕ hmei dưi ngă dŭm mta bruă msĕ si tăp mdiê amâodah mă kan tluôr hlăm čeh čiăng bi hdơr kơ phŭn agha djuê ana leh anăn êngao kơ anăn lŏ dưi ksiêm hriăm kơ dŭm mta mnơ̆ng rang mdah hlăm sang hƀuê ênuk, boh nik jing dŭm mta mnơ̆ng dhơ̆ng yuôm bhăn mơ̆ng ala čar msĕ si hgơr kông Ngọc Lũ”

Hluê si aduôn Nguyễn Thị Định, k’iăng khua adŭ bruă ktrâo lač kơ mnuih ƀuôn sang, sang rang mdah hƀuê ênuk ala čar, bruă bi mguôp hưn mdah dŭm mnơ̆ng dhơ̆ng hƀuê ênuk hŏng dŭm mta bruă hluê si akŏ jing hră êlan jăk đru kơ phung hriê dlăng lŏ khăp leh anăn thâo săng hĭn kơ hƀuê ênuk djuê ana.“Ti akŏ mlan 3 hluê hruê mlan blĕ, nao mbĭt hŏng ai êwa kluôm ala mđing truh kơ hruê bi hdơr hruê djiê mtao Hùng, sang kriê pioh hƀuê ênuk ala čar ăt mkŏ mjing tour hŏng akŏ “Wĭt ti ênuk Hồng Bàng” leh anăn klei hmei hmăng hmưi êjai mkŏ mjing tour anei jing phung hriê čuă dlăng dưi ksiêm duah leh anăn ngă dŭm mta bruă djŏ tuôm hŏng akŏ anei, hmăng dưi dưi bi hdơr kơ diñu dŭm bruă ngă yuôm bhăn mơ̆ng phung Mtao Hùng, phung mâo ai hlăm bruă mkŏ mjing ala čar leh anăn mtô mjuăt knhuah gru “Mnăm êa hdơr kơ hnoh”, “Ƀơ̆ng boh hdơr kơ phŭn”.

Êngao kơ dŭm mta bruă phŭn, mnuih ƀuôn sang lŏ dưi nao hgŭm hlăm dŭm klei hlăp lêñ knhuah gru msĕ si kdăt klei, bi tŭng klei, kdăt klung, hlăp mran, ôlang, mkra mnơ̆ng mmuôn hŏng lăn hŏng mdhô̆ dar, kêč rup… mkra mnơ̆ng bi hdơr. Bi klă dŭm klei jăk mơ̆ng tour “wĭt kơ ênuk Hồng Bàng,” Thượng tá Nguyễn Bá Quốc, khua bruă Đảng nah gŭ, khua bruă kđi čar tiểu đoàn 1, sang hră Sĩ quan Lục quân 1 brei thâo: “Klă sĭt tơdah knŏng hŏng dŭm hdră klei hriăm amâodah dlăng hlăm rup srăng dưi ngă ti sang mtam, hlăm dŭm kdrăp hâo hưn amâodah hră mơar hmei ăt dưi ksiêm hriăm, ƀiădah klă sĭt ti nei dưi hmư̆ klei hưn mdah dŭm rup anăn hŏng dŭm mnơ̆ng sĭt leh anăn dưi ngă jih dŭm mta bruă jing yuôm bhăn hĭn leh anăn srăng ba dŭm klei amâo dưi wơr hlăm phung knuă druh, lĭng kahan mơ̆ng sang hră.”

Hruê bi hdơr hruê djuê Mtao Hùng jing knăm prŏng mơ̆ng djuê ana, jing wưng mtô mjuăt knhuah gru “Mnăm êa hdơr kơ hnoh”, “Ƀơ̆ng boh hdơr kơ phŭn”, bi êdah ai tiê hdơr knga hŏng phung Mtao Hùng mâo ai rŭ mdơ̆ng ala čar leh anăn phung aduôn aê atâo atiêt bi mblah hŏng phung roh, răng mgang ala čar. Hluê anăn grăp čô amâo mdei klei ksiêm hriăm, mâo knhuah hdĭp jăk čiăng đru kơ bruă mkŏ mjing ala čar, năng hŏng ai tiê dŭm gưl phung jhŏng ktang djuê ana, hŏng aduôn aê atâo atiêt drei êlâo. Hdră hlăm tour “Wĭt hlăm ênuk Hồng Bàng” srăng dưi mkŏ mjing truh kơ jih hruê 11/4 ti sang răng mdah hƀuê ênuk ala čar.