VOV4.Êđê- Ƀri wưng bi hdơr 132 thŭn hruê k’kiêng khua gĭt gai Hồ Chí Minh leh anăn 35 thŭn hruê UNESCO pah mni khua gĭt gai Hồ Chí Minh jing Pô jhŏng ktang bi mtlaih djuê ana, Pô dhar kreh kdlưn hĭn, ti wăl tač mjuăt ktang asei mlei Làng Sen, să Kiêm Liên, kdriêk Nam Đàn, bruă sang čư êa čar Nghệ An bi mguôp hŏng phŭn bruă Dhar kreh, mjuăt ktang asei mlei leh anăn hiu čhưn ênguê mkŏ mjing leh klei kčưm pŏk knăm Làng Sen leh anăn klei kdŏ mmuñ Tuồng, klei mmuñ ênhiang kluôm ala thŭn 2022.

Pô bi ala dŭm phŭn, dhar bruă, anôk bruă gưl dlông, khua gĭt gai čar Nghệ An leh anăn giăm 1.000 čô kdŏ mmuñ, phung bi lông, phung hđeh lăk leh anăn mnuih ƀuôn sang nao hgŭm hlăm knăm anei. Hlăm knăm anei, phung bi ala, mnuih ƀuôn sang hlăm leh anăn êngao čar dưi ktuê dlăng klei rang mdah “Ñu jing klei đăo knang hlăm kâo” mbĭt hŏng dŭm klei kdŏ mmuñ bi mni kơ Awa Hồ, bi mni kơ Đảng leh anăn klei khăp kơ ala čar.

         Pô mblang: Y-Khem Niê