VOV4.Êđê Ti Anôk bruă dhar kreh čar Dak Lak, Knơ̆ng bruă kdŏ mmuiiñ - Phŭn bruă dhar kreh, mjuăt ktang asei mlei leh anăn hiu čhưn ênguê bi hgŭm hŏng Knơ̆ng bruă sang čư̆ êa čar Dak Lak, Êpul hgŭm čih mčeh klei mmuiñ Việt Nam, Êpul hgŭm phung kdŏ Việt Nam mrâo mkŏ mjing mphŭn pŏk klei bi lông Klei kdŏ mmuiñ kluôm ala thŭn 2021 tal 2.

Klei bi lông kdŏ mmuñ kluôm ala thŭn 2021 gưl 2 mâo êbeh 1 êbâo čô nghệ sĩ, diễn viên hriê mơ̆ng 22 êpul bruă kdŏ mmuñ kluôm ala. Grăp êpul nao bi lông 1 hdră bi lông mơ̆ng 65 - 110 mnĭt, mâo mmuñ, kdŏ amâo dah giao hưởng, nhạc vũ kịch, thanh xướng kịch. Hlăm wưng mơ̆ng ară anei truh kơ jih hruê 30/6 ti anăp, dŭm êpul srăng mkŏ mjing klei bi lông čiăng ruah êpul mâo boh tŭ kdlưn hĭn čiăng brei klei pah mni.

Hluê si NSƯT Trần Ly Ly, Khua knơ̆ng knơ̆ng bruă Nghệ thuật Biểu diễn, Khua anôk bruă mkŏ mjing klei bi lông, leh sa wưng sui kyua hmăi mơ̆ng klei ruă Covid 19, dŭm êpul nao bi lông mâo leh lu klei bi mlih jăk siam čiăng bi êdah klei khăp m’ai kơ bruă, hưn mdah klei thâo ăt msĕ mơh klei čang hmăng mĭn mrâo, klei čiăng ba myơr klei thâo: Klei bi lông kdŏ mmuñ kluôm ala leh wưng bluh mâo klei ruă Covid 19 snăn hlăm gưl 2 anei mâo 22 êpul nao hgŭm, hŏng dŭm klei bi êdah jăk čiăng mđĭ kyar bruă dhar kreh, kdŏ mmuñ ăt msĕ mơh mtrŭt mđĭ bruă hiu čhưn ênguê Việt Nam. Grăp čô mnuih mprăp leh jăk êdi lehanăn phung nghệ sĩ hŏng dŭm klei čang hmăng ba myơr jih klei thâo pô. Kâo bi mĭn hŏng dŭm klei bi êdah msĕ snăn, klei bi lông anei srăng dưi mâo klei tŭ dưn prŏng.

Leh knăm mphŭn pŏk, Êpul kdŏ mmuñ dŭm djuê ana čar Dak Lak pŏk leh mlam mphŭn pŏk. Hŏng anăn “Dŭm pŏk rup Bazan hrah”, êpul Dak Lak ba leh 11 klei kdŏ mmuñ jăk jĭn, jiă knhuah krĭng čư̆ čhiăng Lăn dap kngư prŏng kdrưh. Hŏng klei mprăp kluôm dhuôm, rang mdah hŏng klei thâo mơ̆ng phung nghệ sĩ, diễn viên mbĭt hŏng ênai čing čhar, kdrăp tông ayŭ djuê ana ba wĭt leh mnĭt mmông jăk êdi, mâo tŭ mă klei sa ai, klei bi mni lehanăn hơ̆k m’ak mơ̆ng mnuih dlăng. Ca sĩ Y- Hoăt Byă, Êpul kdŏ mmuñ dŭm djuê ana čar Dak Lak brei thâo:Ayŏng adei gĭr leh jih ai tiê lehanăn bi êdah jih ai tiê pô hlăm klei bi lông mmăt anei, kâo ƀuh phung dlăng pah kngan snăn kâo hơ̆k m’ak êdi.