VOV4.Êđê - Mnuih ƀuôn sang ti alŭ Duệ, să Đinh Lạc, kdriêk Di Linh, čar Lâm Đồng khăp, mpŭ lehanăn ktưn hưn êdi kơ khua mduôn K’Tiếu, 71 thŭn ti ƀuôn. Kyua ñu mâo klei khăp m’ai êdi hŏng dhar kreh čing čhar mơ̆ng mnuih K’ho ti krĭng lăn dlông Di Linh. Êbeh 10 thŭn pŏk adŭ mtô bi hriăm tông čing čhar jing hdră bruă klă sĭt, đru mguôp hlăm bruă răng mgang, mđĭ lar boh tŭ yuôm wăl anôk dhar kreh čing čhar Lăn dap kngư; mơ̆ng anăn mtô mblang mđĭ klei thâo săng, răng mgang knhuah dhar kreh jăk siam mơ̆ng mnuih djuê ana K’ho kơ ênuk gưl mrâo.

Yăl dliê kơ klei khăp dhar kreh K’Ho, khua mduôn K’Tiếu hdơr kơ ênuk hlăk điêt, hlăk hlăm brô ka bŏ 15, 16 thŭn, ñu tuič leh jih klei tông čing hlăm kdrăp čing 6 boh mnuih K’Ho. Hlăm dŭm knăm mơak, knăm huă êsei mrâo hlăk đưm, ñu hlue amĭ ama pô nao dlăng leh anăn khăp kơ dhar kreh čing čhar. Grăp blư̆ truh knăm mơak, knŏng hmư̆ klei tông čih wĭt ñu hriăm leh anăn tuič klei tông anăn. Hlăk anăn ka truh êdam ôh, K’Tiếu ti alŭ Duệ mâo mnuih hlăm ƀuôn ruah hlăm êpul tông čing mơ̆ng ƀuôn. “Sa ênuh hŏng kâo mnuih thâo leh anăn raih lu klei tông čing msĕ si kâo ƀiă snăk. Msĕ si hlăm ƀuôn K’Brà, alŭ Duệ anei mâo êbeh pluh čô hlăm sa ênuk, msĕ si K’Khéo- Dam Brẹo, hlăm čing 6 boh ñu knŏng thâo dŭm klei đuič, kăn thâo lu msĕ kâo mơh. Bi kâo mdê hŏng digơ̆, kyua kâo khăp tông čing anăn hriăm tuč jih klei tông, si tô hmô klei tông čing akâo adiê hjan, klei anei si tông, phung hŏng êpul si srăng tông mbĭt čiăng kơ jăk, ênai kwang mbĭt ngă kơ phung dôk hmư̆ khăp, hdră tông čing si ngă djŏ snăn jing kyua klei khăp leh anăn hur har sơăi mâo, mâo lu mnuih thâo tông čing ƀiădah amâo thâo ôh klei anei”.

Thŭn mlan sui siă suôr hŏng êpul tông čing, găn dŭm yan knăm mơak, dŭm klei khăp kơ ênai čing jiă kma hlăm ai tiê khua mduôn K’Tiếu. Êpul tông čing mơ̆ng alŭ Duệ să Đinh Lạc dưi tiŏ nao hlăm Knăm mơak Dhar kreh, mjuăt asei mkei dŭm djuê ana ti dŭm să, kdriêk krĭng mnuih djuê ƀiă hlăm kluôm čar Lâm Đồng, dŭm čar hlăm krĭng lăn Dap Kngư leh anăn mâo klei pah mni kdlưn snăk. Mrâo anei hin, êpul tông čing mơ̆ng alŭ Duệ dưi mdah ti ƀuôn dhar kreh dŭm djuê ana Việt Nam ti Đồng Mô, Hà Nội. Ñu mơak snăk hŏng bruă sang čư̆ êa alŭ wăl mguôp ai tiê bi hriăm leh anăn răng mgang dhar kreh čing čhar djuê ana K’Ho. Kyua anăn, ñu čang hmăng kriê pioh dhar kreh čing čhar hŏng alŭ wăl mâo hdră ngă jăk hĭn: “Čiăng mđĭ lar dhar kreh čing čhar hlue si kâo mĭn brei mâo bruă ngă klă klơ̆ng, tal sa brei mâo anôk bi hriăm, amâo djŏ ôh khăp snăn mtô amâo khăp snăn lui. Hruê kăm 3 blư̆ truh 9, 10 mmông kơh kâo wĭt truh ti sang nao hriăm tông čing, klei anăn amâo yuôm bhăn hŏng bruă pô bi hriăm klei tông čhing kơ ênuk mda asei, anăn jing klei yuôm bhăn hĭn, Kâo ăt ƀuh ênguôt snăk kyua phung anak čô ară anei amâo lŏ khăp ôh kơ dhar kreh čing čhar, mâo bruă sang čư̆ êa alŭ wăl mđing dlăng mjung klei găl dưi bi hriăm tông čing kâo mơak snăk. Wăt tơdah khua thŭn leh amâo lŏ suaih ôh, ƀiădah kâo jih ai tiê hŏng dhar kreh čing čhar, kâo srăng bi hriăm čing char truh jih klei hdĭp pô, dôk hdĭp srăng lŏ bi hriăm.”

Klei khua mduôn K’Tiếu bi mĭn jing si ngă čiăng kơ mnuih ƀuôn sang ƀuh ktưn hưn kơ dhar kreh djuê ana pô; boh nik si ngă čiăng dưi pioh ênai čing kwang, klei ksŏ jăk siam. Mơ̆ng klei mĭn anăn, K’Tiếu bi kƀĭn đa đa phung êlâo adih tuôm bi lông tông čing hlăm ƀuôn čiăng mkŏ mjing êpul tông čing. Mbĭt hŏng anăn, ñu hgŭm pŏk adŭ bi hriăm tông čing. “Tal sa kâo srăng pŏk adŭ bi hriăm tông čing kơ hđeh, tal dua adŭ mâo djăp êkei mniê, tal 3 adŭ mâo phung mniê sơăi. Kyua kâo čiăng bi hriăm klei tông čing snăn kyua tơdah pŏk sa adŭ knŏng kơ phung êkei êbeh sa êtuh čô leh, ƀiădah leh diñu dôk mô̆ nƀuôn mkăn snăn pô luič mnuih thâo tông čing, anăn kâo mĭn bi hriăm kơ phung mniê jing jăk hĭn kyua phung mniê hriê kơ prŏng dôk ung ăt dôk ti ƀuôn, amâo nao hdĭp kơ anôk mkăn ôh anăn ăt adôk djăp mnuih thâo tông čing. Êdei anăp diñu srăng lŏ bi hriăm anak čô pô, ung diñu thâo tơdah digơ̆ khăp kơ dhar kreh čing čhar djuê ana pô.”

Hŏng klei đru mguôp êbeh 10 thŭn pŏk adŭ bi hriăm tông čing leh anăn kriê pioh dhar kreh čing čhar Lăn Dap Kngư, Knơ̆ng bruă sang čư̆ êa čar Lâm Đồng ngă hră mơar akâo kơ Phŭn bruă dhar kreh mjuăt ktang asei mlei leh anăn hiu čhưn ênguê čih yap pô thâo mbruă êdah kdlưn kơ khua mduôn K’Tiếu hlăm thŭn 2022. Trương Quốc Phương -  K’iăng Khua Knơ̆ng bruă sang čư̆ êa să Đinh Lạc, kdriêk Di Linh lač, khua mduôn K’Tiếu dưi dlăng msĕ si sa ngăn drăp yuôm mơ̆ng ƀuôn sang, năng mpŭ snăk. “Hŏng pô thâo mbruă K’Tiếu, ñu mâo lu klei đru mguôp kơ alŭ wăl hlăm hdră dhar kreh, boh nik răng kriê leh anăn mđĭ lar klei dhar kreh čing čhar. Ñu đru lu snăk kơ bruă răng mgang dhar kreh anăn. Jing mnuih bi hriăm kơ ênuk mrâo, snăn hlăm jih sa wưng sui, hŏng bruă mtô bi hriăm, ñu ăt mtô hđeh mrâo. Snăn ară anei dŭm ênuk anei ăt klă klơ̆ng păn kjăp sa hnơ̆ng prŏng kdrăp kriê pioh djŏ tuôm kơ klei ñu thâo hlăm 10 klei tông čing. Klei mĭn mơ̆ng alŭ wăl čang hmăng hlăm klei ñu thâo ară anei ñu srăng bi hriăm jih kơ phung hđeh jing djuê ana K’Ho”./.