A Chinh – Khua mduôn alŭ Măng Rương, să Văn Lem, kdriêk Đăk Tô, čar Kon Tum brei thâo, mơ̆ng đưm truh kơ ară anei, dŭm klei bhiăn knhuah gru mơ̆ng mnuih Sêdang ăt mâo mnuih ƀuôn sang djă pioh. Sang Roong phŭn jing sang mbĭt mơ̆ng ƀuôn sang, jing anôk mkŏ mjing dŭm mta bruă dhar kreh, dŭm klei ngă yang yuôm bhăn. Kyuanăn jih jang dŭm ƀuôn êlan mơ̆ng mnuih Sêdang hlăm să Văn Lem mâo sơăi sang roong.

 “Mnuih ƀuôn sang djuê ana Sêdang ăt dôk mâo sang roong dlông ti krah ƀuôn, čuôr sang kreh tiap hŏng rơ̆k hlang. Knŏng mâo mă kmeh sang roong ară anei kyua mâo knŭk kna duh bi brei bi kjăp ngă hŏng bêtông, xi măng. Bi kơ dŭm mta mnơ̆ng mkăn hŏng kyâo, kram đrao mă mơ̆ng dliê, ngă hluê si sang krum. Sang roong ară anei mâo klei mdê mkă hŏng ênuk aduôn aê đưm, êlâo dih sang krum knŏng ngă mă hŏng đrao kram…ƀiădah ară anei mâo mdhă kjăp hĭn”.

 A Ku, Pô ngă bruă Dhar kreh – Yang ƀuôn să Văn Lem, kdriêk Đăk Tô, čar Kon Tum brei thâo: Hlăm să ară anei mâo êbeh 650 gŏ sang, hŏng êbeh 2.800 čô mnuih ƀuôn sang, lu jing mnuih Sêdang mâo 95% ênoh mnuih ƀuôn sang. Klei hdĭp mnuih ƀuôn sang ti nei knŏng ngă bruă lŏ hma. Hlăm anăn, lu jing plă mdiê lŏ, boh kreh leh anăn ƀiă ênhă pla mjing kphê. Thŭn 2023, să mâo ênŭm hnơ̆ng čuăn să krĭng ƀuôn sang mrâo. A Ku brei thâo, khădah klei hdĭp mrâo mrang, hdră ngă bruă đĭ kyar, ƀiădah knhuah dhar kreh djuê ana mnuih Sêdang ăt dôk dưi djă pioh hŏng dŭm hdră bhiăn hlăm klei mă bruă knuă, boh nik hŏng bruă pla mjing mdiê lŏ.

 “Hluê si klei mưng ngă bruă lŏ hma mơ̆ng mnuih Sêdang, hlăm brô mlan 3, mlan 4 mnuih ƀuôn sang srăng kčưm trŭn čoh bruă ngă hma, rah pla mjeh. Hlăm ƀuôn ăt dôk mkŏ mjing dŭm knăm mơak hluê si wưng hlăm grăp thŭn. Dŭm knăm mơak anei hluê si klei găl, thŭn mâo boh mnga srăng čuh kbao, čuh ŭn. Hlăm dŭm knăm mơak amâo mâo dưi kƀah ôh phung êkei êdam mniê êra tông čĭng, kdŏ mmuñ. Leh buh pla 2 3 mlan mnuih ƀuôn sang lŏ mkŏ mjing klei ngă yang ƀơ̆ng mdiê mjeh (Tĭng Kâ Tŏng), leh 2 3 mlan êdei ngă klei ngă yang jah waih êlan nao hma. mprăp nao hma dlăng mdiê bi mtian. Dŭm mlan knhal jih thŭn hlăm ƀuôn mkŏ mjing klei ngă yang huă êsei mrâo (Tĭng Kâ Báu Nếo).

Ti să Văn Lem, kdriêk Đăk Tô dôk hluê ngă lu klei bi hmô mkŏ wĭt ana pla mjing, dưn yua klei kreh knhâo hdră mnêč, kñăm mđĭ hnư hrui wĭt kơ dŭm gŏ sang. Mrâo anei, Êpul hgŭm ƀĭng ngă lŏ hma mkăp brei kơ dŭm gŏ sang 300 phŭn mjeh ana pla mjing dŭm mta, 1 tôn hbâo pruê leh anăn dŭm pluh drei ŭn mjeh. Hluê si khua mduôn A Chinh, ară anei mnuih ƀuôn sang thâo dưn yua klei kreh knhâo mrâo mrang hlăm klei ngă bruă, tơdah ruah duam nao mdrao mgŭn. Ƀiădah, dŭm mta klei bhiăn knhuah gru ăt mâo mnuih ƀuôn sang djă pioh, anăn jing sa kdrêč hlăm klei hdĭp ai tiê.

 “Êlâo kơ nao buh pla akŏ thŭn ăt mâo gŏ sang čuh ŭn, mnŭ, hul điŏ, ăt mâo gŏ sang tŭk knă ngă yang akâo kơ yang đru brei. Êjai hlăm ƀuôn mâo mnuih ruă duam ăt akâo kơ yang bi hlao brei kơ phung hđeh, hnưm mâo klei suaih pral. Ƀiădah, mnuih ƀuôn sang ruă duam ăt čiăng nao mdrao ti sang êa drao, čiăng lŏ wĭt mâo klei suiah pral”.

A Ku, Pô ngă bruă Dhar kreh – Yang ƀuôn să Văn Lem, kdriêk Đăk Tô, čar Kon Tum brei thâo: čiăng kriê pioh leh anăn bi lar boh tŭ dhar kreh djuê ana, bruă klam mơ̆ng khua mduôn, phung mâo kơhưm ti alŭ wăl jing yuôm bhăn êdi. Kyuanăn, grăp thŭn, bruă sang čư êa leh anăn dhar bruă djŏ tuôm mkŏ mjing klei bi tuôm, mđĭ ai leh anăn mâo hdră êlan đru kơ mnuih ƀuôn sang kriê pioh knhuah dhar kreh djuê ana pô.

 “Hlăm să Văn Lem, kdriêk Đăk Tô ară anei dôk rơ̆ng klei bi tuôm hŏng phung khua mduôn čiăng bi trông mkŏ mjing 3 knăm mơak knhuah gru. Knăm tal êlâo hlăm thŭn jing klei ngă yang pin êa (Tĭng Kleăng Kơneăng Têa) mơ̆ng khua mduôn jing pô gĭt gai, mbĭt anăn mbha bruă kơ mnuih ƀuôn sang mprăp dŭm mta mnơ̆ng yua kơ hruê ngă yang dưi mkŏ mjing jăk mơak leh anăn tŭ dưn. Tal 2 jing knăm mơak (Xơkêa Kơdéa), jing knăm jah waih êlan nao pưk hma, mâo boh tŭ jing mmông guôn mdiê ksă. Hlăm brô mlan 10 leh mdiê ksă kñĭ, jih jang mnuih ƀuôn sang bi hrui wiă leh anăn mkŏ mjing knăm huă mdiê mrâo (Tĭng Kâ Báu Nếo).

Kñăm kriê pioh leh anăn bi lar knhuah gru dhar kreh djuê ana mơ̆ng dŭm djuê ana mnuih djuê ƀiă ti alŭ wăl, bruă sang čư êa čar Kon Tum mâo leh klei bi klă, ba mdah lu hdră mkăp, hdră êlan kriê pioh, bi lar kdrăp čŭt hơô djuê ana, kriê pioh, bi lar dhar kreh tông čĭng čhar, kriê pioh leh anăn bi lar sang roong knhuah gru, hră êlan tĭng mkă mnơ̆ng kriê pioh dhar kreh amâo mâo thâo ƀuh hŏng ală ti alŭ wăl čar. Bruă djă pioh dŭm klei bhiăn knhuah gru djuê ana mơ̆ng mnuih Sêdang ti să Văn Lem, kdriêk Đăk Tô ăt jing sa kdrêč hlăm bruă hluê ngă dŭm hdră êlan mơ̆ng bruă sang čư êa čar Kon Tum.