VOV4.Êđê- Hŏng akŏ “Duôr Čư̆ Prŏng Lăn Dap Kngư - Bi hgŭm, dhar kreh leh anăn đĭ kyar”, ti Kon Tum mkŏ mjing leh Klei kdŏ mmuiñ ênhiang djuê ana krĭng wăl Duôr Čư̆ Prŏng - Lăn Dap Kngư pŏk mlar tal III thŭn 2022. Anei jing sa hlăm dŭm bruă ngă kkuh drông bi hdơr 47 thŭn mtlaih êngiê čar Kon Tum (16/3/1975- 16/3/2022). Bruă anei mơ̆ng Knơ̆ng bruă dhar kreh, Phŭn bruă dhar kreh, mjuăt ktang asei mlei leh anăn hiu čhưn ênguê bi hgŭm hŏng Knơ̆ng bruă sang čư̆ êa čar Kon Tum mkŏ mjing.

Kčưm pŏk knăm anei, k’iăng khua phŭn bruă Dhar kreh, mjuăt ktang asei mlei leh anăn hiu čhưn ênguê Trịnh Thị Thủy mtrŭt mjhar leh anăn mbĭt hŏng phung bi ala pŏk kčưm bruă ngă thŭn 2022 mơ̆ng bruă Dhar kreh, mjuăt ktang asei mlei leh anăn hiu čhưn ênguê hŏng akŏ: “Mkŏ mjing wăl dhar kreh nah gŭ leh anăn bruă mkŏ mjing êpul êya knuă druh”.

Knăm pŏk kčưm klei kdŏ mmuñ rang mdah knhuah dhar kreh dŭm djuê ana alŭ wăl Trường Sơn – Lăn Dăp Kngư pŏk phai gưl tal III thŭn 2022 dưi mkŏ mjing hŏng ai êwa kdrưh kơang mơ̆ng ênai tông cĭng kwang čư̆ čhiăng mơ̆ng phung tông čing hriê mơ̆ng 5 čar krĭng Lăn Dăp Kngư, mâo Kon Tum, Gia Lai, Dak Lak, Dak Nông leh anăn Lâm Đồng.

Nao hgŭm hlăm knăm rang mdah anei mâo êbeh 600 pô thâo mbruă, phung kdŏ mmuñ mơ̆ng dŭm djuê ana hriê mơ̆ng 19 čar mâo 5 čar krĭng Lăn Dăp Kngư leh anăn dŭm čar Tuyên Quang, Vĩnh Phúc, Bắc Ninh, Hải Dương, Hà Nam, Thanh Hóa, Nghệ An, Quảng Trị, Thừa- Thiên Huế, Quảng Nam, Quảng Ngãi, Đồng Nai, An Giang leh anăn ƀuôn prŏng Hồ Chí Minh. Hriê hgŭm hlăm knăm anei mơ̆ng ƀuôn Kon Trang Long Loi, wăk krah Đăk Hà, kdriêk Đak Hà, čar Kon Tum, pô thâo mbruă A Thui, 64 thŭn, mnuih djuê ana Bahnar kƀiêng Rơ Ngao hơ̆k mơak brei thâo:

            “Hmei čiăng ba knhuah dhar kreh djuê ana pô brei kơ jih jang dưi ƀuh. Hruê anei hriê ti anôk kdŏ mmuñ anei, dưi bi tuôm, blŭ hrăm hŏng măh jiăng mơ̆ng dŭm čar, hmei ƀuh klei mơak sơnăk, dưi blŭ hrăm hŏng mah jiăng čar mkăn, djuê ana mkăn srăng thâo tui hriăm leh anăn hluê ngă msĕ hŏng arăng”.

            Hlăm mlam mphŭn pŏk klei kdŏ mmuñ rang mdah knhuah dhar kreh dŭm djuê ana alŭ wăl Trường Sơn – krĭng Lăn Dăp Kngư pŏk phai gưl tal III thŭn 2022, mnuih ƀuôn sang leh anăn phung tuê dưi ñu kma pô hŏng ai êwa knăm hơ̆k mơak hŏng ênai čing kwang leh anăn klei kdŏ čhuang krĭng Lăn Dăp Kngư, ktuê dlăng dŭm klei kdŏ mmuñ nao hgŭm hlăm knăm anei msĕ si: Klei bhiăn kkuh mpŭ Mẫu Tam Phủ mơ̆ng êpul anôk bruă Dhar kreh čar Vĩnh Phúc, klei bi lông tông čĭng mơ̆ng êpul phung thâo mbruă čar Quảng Ngãi, klei kdŏ Nguyên Tiêu Thịnh Hội- Ngũ Phúc Lâm Môn mơ̆ng êpul hruê mơ̆ng ƀuôn prŏng Hồ Chí Minh, rang mdah kdrăp čŭt hơô knhuah gru… Nguyễn Công Trung, k’iăng khua kiă kriê anôk bruă Dhar kreh nah gŭ, phŭn bruă dhar kreh, mjuăt ktang asei mlei leh anăn hiu čhưn ênguê brei thâo:

“Găn leh 2 blư̆ mkŏ mjing, truh kơ ară anei, klei kdŏ mmuñ rang mdah anei mâo lu êdi klei arăng mđing. Sa klei năng mđing hĭn jing phung bi ala mơ̆ng dŭm krĭng kwar ala čar mâo leh ƀô̆ mta ti Măng Đen. 4 hruê mkŏ mjing klei rang mdah kdŏ mmuñ anei srăng jing klei siam dhar kreh mâo lu êa mil. Jih jang dŭm mta bruă msĕ si, klei mmuñ ênhiăng, kdŏ mmuñ, mnơ̆ng ƀơ̆ng huă, kdrăp čŭt hơô djuê ana, dŭm mta bruă mjuăt ktang asei mlei. 4 hruê amâo lu ôh ƀiădah srăng kđăm lu klei amâo thâo wơr kơ mnuih ƀuôn sang dŭm djuê ana.

Mkŏ mjing hlăm 4 hruê, mơ̆ng hruê 16 truh kơ hruê 19/3, Klei kdŏ mmuñ rang mdah knhuah dhar kreh dŭm djuê ana alŭ wăl Trường Sơn –  Lăn Dăp Kngư pŏk phai tal III thŭn 2022 srăng mâo dŭm mta bruă msĕ si: răng mdah dŭm mta bruă hlăm dhar kreh kkuh mpŭ, đăo knang, klei ngă yang, dŭm mta klei mmuñ ênhiang, kdŏ mmuñ, rang mdah kdrăp čŭt hơô djuê ana, kdrăp pĕ tông knhuah gru, čĭng čhar krĭng Lăn Dăp Kngư leh anăn dŭm bruă mjuăt ktang asei mlei, mnơ̆ng ƀơ̆ng huă dhar kreh.

Klei kdŏ mmuñ rang mdah knhuah dhar kreh dŭm djuê ana alŭ wăl Trường Sơn – krĭng Lăn Dăp Kngư pŏk phai tal III thŭn 2022 knăm kơ bruă kriê pioh, mtô bi hriăm leh anăn bi lar knhuah dhar kreh djuê ana, klei mưng hlăm klei hdĭp, klei ngă yang knhuah gru, klei mmuñ ênhiang, kdŏ mmuñ, kdrăp čŭt hơô, mnơ̆ng ƀơ̆ng huă…mơ̆ng êpul êya dŭm djuê ana alŭ wăl Trường Sơn – krĭng Lăn Dăp Kngư leh anăn bi ala kơ đa đa dŭm djuê ana hlăm kluôm ala. Mbĭt anăn mñă klă klei đăo knang hŏng klei gĭt gai mơ̆ng Đảng, knŭk kna, râo klei hmăng hmưi mđĭ kyar ala čar, bi lar klei mĭn, ai ktang mơ̆ng klei bi mguôp djuê ana.

K’iăng khua bruă sang čư êa čar Kon Tum Nguyễn Ngọc Sâm brei thâo: Ƀri wưng bi hdơr 47 thŭn hnuk êngiê čar Kon Tum, čar dưi mâo klei hĭn ang jing alŭ wăl mâo phŭn bruă Dhar kreh, mjuăt ktang asei mlei leh anăn hiu čhưn ênguê čuăn ruah jing anôk mkŏ mjing klei rang mdah tal anei. Hlăm hruê mmông kơ anăp, čar Kon Tum srăng lŏ dơ̆ng knăm hlăm dŭm bruă klam msĕ si kriê pioh, bi lar klei yuôm bhăn knhuah dhar kreh jăk siam dŭm djuê ana mnuih djuê ƀiă nao mƀĭt hŏng mđĭ kyar bruă hiu čhưn ênguê. Mkŏ mjing mâo boh tŭ dŭm hdră mkăp, hdră êlan kơ bruă kriê pioh dhar kreh čĭng čhar, sang roong, kdrăp čŭt hơô, klei mmuñ ênhiang, klei kdŏ mmuñ, uêñ mĭn leh anăn đru lu hĭn kơ phung thâo mbruă êdah êdi nao hgŭm hlăm bruă kriê pioh dhar kreh.

Pô mblang: Y-Ƀel Êban