VOV4.Êđê - Hlăm hdră klei rang mdah kdŏ mmuñ kluôm ala dôk mkŏ mjing ti ƀuôn prŏng Ƀuôn Ama Thuôt, Êpul hgŭm phung kdŏ mmuñ Việt Nam bi mguôp hŏng êpul hgŭm phung čih klei yăl dliê čar Dak Lak mkŏ mjing leh klei kƀĭn klei mmuñ ênhiang krĭng Lăn Dăp Kngư hŏng klei kdŏ mmuñ ară anei. Klei kƀĭn mâo lu phung kdŏ mmuñ, phung čih klei yal dliê nao hgŭm, kah mbha hŏng lu klei bi trông mâo mta phŭn êlam.

Hŏng 12 klei ksiêm êmuh dưi ba mdah hlăm hdră, phung bi ala mâo leh klei bi trông kñăm tui duah dŭm hdră êlan čih mkra klei mmuñ djŏ guôp hŏng klei hdĭp ênuk anei leh anăn dưi bi mni kơ knhuah klei mmuñ ênhiang dŭm djuê ana krĭng Lăn Dăp Kngư. Pô čih klei mmuñ Đỗ Hồng Quân, khua kiă kriê êpul hgŭm phung čih mčeh klei mmuñ Việt Nam brei thâo, anei jing akŏ mâo knhuah klei mrâo leh anăn dŭm klei blŭ, klei bi trông mơ̆ng phung bi ala mâo knuah thơ̆ng kơ bruă. Klei kƀĭn jing hdră ksiêm duah mâo boh tŭ yuôm bhăn klei rang mdah kdŏ mmuñ kluôm ala gưl anei.

Y-Khem pô mblang