VOV4.Êđê- Hlăm jar klei bi lông kdŏ mmuiñ kluôm ala mkŏ mjing ti ƀuôn prŏng Ƀuôn Ama Thuôt, Êpul hgŭm phung čih mčeh klei mmuiñ Việt Nam bi hgŭm hŏng Êpul hgŭm Dhar kreh kdŏ mmuiñ čar Dak Lak mkŏ mjing leh klei bi kƀĭn ênhiang mmuiñ djuê ana Lăn Dap Kngư hlăm klei muiñ ară anei. Klei bi kƀĭn iêo jak lu phung čih mčeh bi trông, hŏng lu klei ksiêm hriăm mâo boh phŭn êlam.

Hlăm klei kƀĭn, phung bi ala kơ dŭm mta phŭn msĕ si: Klei thâo čih mčeh dưn yua dŭm ênhiang klei mmuñ mơ̆ng dŭm djuê ana, ba yua ênhiang klei mmuñ knhuah gru hlăm dŭm klei čih mčeh mrâo, knhuah klei mmuñ hlăm klei khan krĭng Lăn Dăp Kngư, knhuah klei mmuñ ênhiang krĭng Lăn Dăp Kngư hlăm klei hdĭp leh anăn hnoh êa klei mmuñ hlăm klei mmuñ mrâo. Phung bi ala lač, čiăng čih mčeh sa klei mmuñ mrâo mâo knhuah ênhiang djuê ana amâodah sa krĭng lăn, pô čih mčeh êlâo hĭn srăng thâo klă dŭm ênhiang klei mmuñ grăp krĭng kwar, alŭ wăl hluê si dŭm ênhiang klei mmuñ leh anăn klei pĕ tông kreh mâo, knhuah gru djuê ana anăn. Mơ̆ng anăn pô čih mčeh srăng mâo ênhiang klei čih, ksiêm mĭn leh anăn mă anăn dưn yua hlăm dŭm klei čih mrâo. Pô čih klei mmuñ Mạnh Trí ti čar Dak Lak lač sơnei:

“Kơ bruă anei pô srăng nao hlăm boh sĭt, hiu duah čiăng thâo klă ênhiang klei mmuñ, tơdah hmư̆ arăng thâo mta klei mmuñ anei jing ênhiang djuê ana anei, mmông anăn klei čih mčeh srăng hluê êlan djŏ, amâo djŏ ôh kpleh kơ dŏ mkăn, pô amâo mâo čŏng ngă ôh ƀiădah ñu kpeh srăng bi luč klei jăk, knhuah gru sa krĭng anăn.”

Phung bi ala  bi trông kơ akŏ klei mmuiñ ênhiang djuê ana Lăn Dap Kngư hlăm klei mmuiñ ară anei

Lu phung bi ala ăt bi êdah klei mĭn pô čiăng bi klă leh anăn lŏ dơ̆ng kriê pioh, bi lar dŭm ênhiăng klei mmuñ čiăng mđĭ kyar jing dŭm klei mmuñ mrâo hlăm wưng ară anei. ƀiădah, bruă đĭ kyar anei čiăng mâo hdră tă leh anăn dưi djăp pioh mta phŭn hlăm klei đĭ kyar, dêč kơ bruă luč knhuah gru leh anăn phŭn agha mơ̆ng klei mmuñ ênhiăng êjai dưn yua čiăng čih mkra klei mmuñ mrâo. Pô čih klei mmuñ A Đuh ti čar Kon Tum brei thâo:

Hluê si kâo amâodưi bi rai ôh ênhiang mphŭn mâo mơ̆ng êlâo, jing ênhiang phŭn ăt dưi djă pioh msĕ êlâo. Bi kơ bruă lŏ mđĭ kyar, hluê si phŭn anăn arăng srăng mđĭ kyar, jing ñu dôk ti anôk mkăn amâo djŏ ôh mă dŏ anăn bi raih hĕ dŏ phŭn mơ̆ng ñu, anăn jing klei soh pô, bi kơ pô thâo dưn yua ñu, mơ̆ng ênhiang anăn amâo dah drei ngă kơ ñu jing jăk hĭn, anăn yơh klei đĭ kyar, klei čih mčeh.

Dŭm klei kdŏ mmuiñ Lăn Dap Kngư mphŭn pŏk klei bi kƀĭn

Hŏng 12 klei ksiêm êmuh dưi ba mdah hlăm hdră, phung bi ala mâo leh klei bi trông kñăm tui duah dŭm hdră čih mčeh klei mmuñ mrâo djŏ guôp hŏng klei hdĭp ară anei leh anăn dưi bi mni kơ knhuah klei mmuñ ênhiăng djuê ana, klei mmuñ phŭn mơ̆ng dŭm djuê ana krĭng Lăn Dăp Kngư. Pô čih klei mmuñ Đỗ Hồng Quân, khua kiă kriê êpul gơ̆ng phung kdŏ mmuñ, êpul čih klei mmuñ Việt Nam bi klă: Anei jing bruă mâo knhuah klei mrâo leh anăn dŭm klei blŭ, klei ksiêm êmuh mơ̆ng phung bi ala mâo knhuah thơ̆ng kơ bruă. Klei kƀĭn jing bruă ksiêm duah, čih yap mâo boh tŭ yuôm bhăn klei klei rang mdah, kdŏ mmuñ kluôm ala gưl anei. Pô čih klei mmuñ Đỗ Hồng Quân lač sơnei:

Hŏng dŭm klei ksiêm êmuh, klei blŭ, grăp čô mâo sơăi sa klei hmăng hmưi mbĭt jing si srăng ngă čiăng kơ klei mmuñ krĭng Lăn Dăp Kngư, mơ̆ng drei dưi djă pioh klei phŭn leh anăn dưi mâo dŭm klei găl čiăng bi lar, đĭ kyar hŏng dŭm klei čih mrâo mơ̆ng phung čih mčeh ară anei. Boh klei yuôm bhăn mkăn jing amâo mâo djŏ knŏng dưn yua dŭm ênhiang klei mmuñ dŭm djuê ana krĭng Lăn Dăp Kngư, ƀiădah yua dŭm ênhiăng anăn čiăng dưi čih mkra dŭm klei mmuñ mrâo, dŭm akŏ mrâp, sơnăn kơh mđĭ đĭ hĭn klei hmăi leh anăn djŏ hŏng klei hmăng hmưi mơ̆ng mnuih ƀuôn sang, anăn jing klei mmuñ nao mơ̆ng klei mmuñ ênhiăng knhuah gru djuê ana truh kơ ênuk ară anei.

Pô mblang: Y-Ƀel Êban