VOV4.Êđê - Hluê si klei mĭn mơ̆ng mnuih Mnông, pin êa jing anôk phung yang dôk lehanăn kăp kriê dlăng. Pin êa ăt jing anôk mkăp êa kơ ƀuôn sang. Kyua anăn, grăp thŭn, mnuih Mnông kreh ngă yang pin êa čiăng lač jăk kơ phung yang đru dlăng kriê, brei adiê jăk êa hlĭm hjan, ba lu klei myun, mbhă mbhai, klei suaih pral kơ mnuih ƀuôn sang. Klei bhiăn anei mơ̆ng mnuih Mnông ăt mtă mtăn kơ êpul êya mđĭ klei thâo săng hlăm bruă răng mgang wăl hdĭp mda, răng mgang phŭn mkăp êa.

Mrâo anei, ti pin êa, êa krông Krông Knô, alŭ Phú Lợi, să Quảng Phú, kdriêk Krông Knô, čar Dak Nông mkŏ mjing leh knăm ngăn yang pin êa mơ̆ng mnuih djuê ana Mnông. Mơ̆ng čang rang aguah, mâo lu mnuih ƀuôn sang mjĕ giăm, tiah kbưi hdĭp mda ti ktuê hang Krông Knô nao ti ti akŏ pin êa. Mnơ̆ng ngă yang mâo 2 drei mnŭ knô, 1 drei ŭn knô, 3 boh čeh kpiê, sa boh giêt êa leh anăn sa čhiên êsei. Pô ngă yang Y-Tai Jun Yuh – khua mduôn alŭ Phú Lợi răk klei ngă yang hŏng mta phŭn msĕ sơnei: “Mnuih ƀuôn sang hmei lač jăk kơ yang hlăm hruê mmông êgao đru brei mâo hjan siam, angĭn jăk, amâo mâo klei truh yan adiê, suôt đuê̆ klei ruă tưp, brei klei suaih pral kơ mnuih ƀuôn sang, mâo lu boh mnga”. Leh ngă klei ngă yang pin êa, khua mduôn Y-Tai Jun Yuh brei thâo: “Klei ngă yang pin êa čiăng lač jăk kơ dŭm mta yang msĕ si: yang êa, yang lăn, yang dliê, yang adiê, đru kơ mnuih ƀuôn sang găn hgao klei truh yan adiê, klei ruă tưp, klei êngoh duăm čiăng kơ mnuih ƀuôn sang mâo klei suaih pral, trei mđao. Klei ngă yang pin êa jing sa knhuah gru jăk siam čiăng lač jăk kơ yang leh anăn aduôn aê atâo tiêt brei leh kơ mnuih ƀuôn sang găn hgao klei truh yan adiê, klei ruă tưp êngoh duăm leh anăn hmăng hmưi mâo hjan siam, angĭn jăk”.

Čiăng mkŏ mjing klei ngă yang pin êa, khua mduôn mkŏ mjing sa klei kƀĭn, hŏng klei nao hgŭm mơ̆ng ênŭm phung bi ala dŭm gŏ sang hlăm ƀuôn čiăng ruah hruê jăk. Leh anăn, khua mduôn srăng mbha bruă kơ grăp êpul mdê mdê. Hlăm anăn, êpul hđeh êdam êra hlăm ƀuôn srăng ngă bruă waih bi doh pin êa. Phung khua hĭn srăng nao hlăm dliê koh ana đrao, mă hruê̆ hwiê, hlang – kram – mơô- hla kyâo čiăng mdơ̆ng gơ̆ng ngă yang, mnơ̆ng bi hmô sang knhuah gru, leh anăn mñam dŭm mta mnơ̆ng rông pioh myơr kơ yang. Leh pin êa dưi bi doh, mnơ̆ng yua mâo ênŭm, phung êkei thâo mbruă hlăm ƀuôn srăng mdơ̆ng gơ̆ng ngă yang ti anôk thu, ti anăp mnơ̆ng bi hmô sang dôk knhuah gru, leh anăn hưn kơ grăp čô dơ̆ng truh leh hruê ngă yang pin êa, čiăng kơ jih jang mâo ƀô̆ mta.

Y-Ăng Phê Blang, khua êpul bruă mặt trận alŭ Phú Lợi, să Quảng Phú, kdriêk Krông Knô ăt jing sa čô hlăm êpul mkŏ mjing klei ngă yang pin êa anei brei thâo, anei jing knhuah dhar kreh jăk siam mơ̆ng mnuih Mnông mâo leh mơ̆ng đưm đă. Êngao kơ boh tŭ jing klei lač jăk kơ lăn adiê leh anăn phung yang kơup mgang mnuih ƀuôn sang hlăm ƀuôn, klei ngă yang anei lŏ mtă kơ êpul êya yang ƀuôn mâo klei thâo săng răng mgang wăl hdĭp mda, răng mgang hnoh êa. Y-Ăng Phê Blang brei thâo: “Mơ̆ng đưm đa dih, grăp thŭn ăt mkŏ mjing klei ngă yang pin êa čiăng lač jăk kơ phung yang rang mgang leh mnuih ƀuôn sang, gang mkhư̆ klei ruă tưp, amâodah klei truh yan adiê, kyuanăn hmei ăt djă pioh dŭm mta knhuah dhar kreh jăk siam hlăm klei ngă yang pin êa. Knăm ngă yang pin êa jing wưng brei mnuih ƀuôn sang lač jăk kơ phung yang kyua răng mgang, đru kơ mnuih ƀuôn sang hlăm mmông mâo klei truh, kyuanăn grăp thŭn hmei ăt mkŏ mjing čiăng amâo mâo luč ôh knhuah gru jăk siam djuê ana pô”.

Klei ngă yang pin êa mơ̆ng mnuih djuê ana Mnông kreh mkŏ mjing hlăm 2 hruê. Hruê tal êlâo jing klei ngă yang akâo kơ aduôn aê atâo tiêt brei mkŏ mjing klei ngă yang pin êa. Mnơ̆ng ngă yang jing 1 drei mnŭ knô, 1 boh kpiê čeh. Boh tŭ klei ngă yang anei jing čiăng iêo aduôn aê atâo tiêt wĭt ti sang leh anăn hưn hŏng diñu akâo klei ngă yang pin êa. Hruê tal dua jing hruê ngă yang ti gŭ gơ̆ng ngă yang mdơ̆ng leh êlâo anăn. Mnơ̆ng ngă yang mâo 2 drei mñŭ knô, 1 drei ŭn knô, 3 boh čeh kpiê, sa boh giêt êa leh anăn sa čhiên êsei. Klei ngă yang knhal tuč jing knăm lač jăk kơ khua mduôn. Mnơ̆ng ngă yang jing 1 drei mñŭ leh anăn sa boh čeh kpiê. Hlăm anei ngă yang anei, khua mduôn ăt hưn hŏng phung yang dưi thâo klei ngă yang mjưh ruê̆ leh. Leh anăn jing klei huă ƀơ̆ng, mnuih ƀuôn sang kdŏ mmuñ mnăm kpiê čeh, ƀơ̆ng dŭm mta mnơ̆ng knhuah gru djuê ana pô. Grăp čô hơ̆k mơak kdŏ mmuñ mbĭt hŏng ênai tông čing. Leh 2 hruê mkŏ mjing klei ngă yang, mnuih ƀuôn sang lŏ wĭt hŏng klei mă bruă msĕ yăng đar.

Huỳnh Công Nga – K’iăng khua adŭ bruă dhar kreh – klei hâo hưn, kdriêk Krông Krông Knô, čar Dak Nông brei thâo, bruă kriê pioh leh anăn bi lar knhuah dhar kreh dŭm djuê ana dưi ba leh hlăm hdră mtrŭn mơ̆ng bruă Đảng ti kdriêk. Grăp thŭn, bruă sang čư êa kdriêk ăt mkăp brei ngăn prăk čiăng đru kơ mnuih ƀuôn sang mkŏ mjing dŭm knăm knhuah gru. Dŭm anôk bruă djŏ tuôm ăt nao hgŭm, đru kơ mnuih ƀuôn sang mkŏ mjing tŭ jing, ba wĭt boh tŭ dưn klă klơ̆ng. “Bruă kriê pioh knhuah dhar kreh djuê ana jing bruă ngă jêñ jêñ leh anăn năng mjêč hlăm grăp thŭn. Boh klei anei mâo leh bruă Đảng ba hlăm hdră mtrŭn hlăm dŭm wưng. Mâo klei gĭt gai bruă bruă Đảng hlăm kdriêk, bruă sang čư êa kdriêk, grăp thŭn, adŭ bruă mkŏ mjing hdră êlan ăt mkăp brei ngăn prăk čiăng kơ mnuih ƀuôn sang lŏ mkŏ wĭt klei ngă yang pin êa anei. Mta kñăm jing kriê pioh knhuah dhar kreh djuê ana tal 2 jing ƀri wưng mâo klei tŭ jing hlăm bruă gang mkhư̆ klei ruă tưp, hluê si klei hmăng hmưi mơ̆ng mnuih ƀuôn sang čiăng lač jăk kơ yang akŏ êa, phung yang čư̆, yang êa, yang kiă kriê ƀuôn êlan…đru leh kơ mnuih ƀuôn sang găn hgao klei ruă tưp Covid-19.”

Klei ngă yang pin êa mơ̆ng mnuih djuê ana Mnông jing sa knhuah dhar kreh jăk siam mâo mơ̆ng đưm đă. Hlăm klei ngă yang anei dưi mtô kơ grăp čô hlăm ƀuôn sang mâo bruă klam răng mgang wăl hdĭp mda, răng mgang dliê, lăn ala, akŏ êa, dưi yap jing ai hdĭp mơ̆ng mnuih djuê ana Mnông.

Y-Ƀel pô mblang