VOV4.Êđê - Aguah hruê 21/4, ti Sang kriê pioh kdrăp mnơ̆ng hdră mblah Hồ Chí Minh, Knơ̆ng bruă kđi čar anôk bruă kahan krĭng 7 mkŏ mjing leh Knăm rang mdah Ai ktang lĭng kahan lehanăn mnuih ƀuôn sang hlăm Hdră mblah Hồ Chí Minh lehanăn mdrơ̆ng hŏng klei ruă tưp, đru kơ mnuih ƀuôn sang. Knăm rang mdah anei hưn mthâo 300 pŏk rup, hră m’ar, mnơ̆ng dhơ̆ng mâo dŭm êpul kahan drei ba yua hlăm Hdră mblah kluôm lehanăn krŭ kdơ̆ng yan mnga thŭn 1975 lehanăn êbeh 500 pŏk hdruôm hră.

Wăl anôk anei rang mdah 2 mta phŭn: Ai ktang lĭng kahan lehanăn mnuih ƀuôn sang hlăm Hdră mblah kluôm lehanăn krŭ kdơ̆ng yan mnga thŭn 1975, lĭng kahan lehanăn mnuih ƀuôn sang sa ai gĭr mdrơ̆ng tŭ dưn hŏng klei ruă Covid 19. Blŭ mphŭn pŏk knăm anei, Đại tá Thái Thành Đức, K’iăng khua Knơ̆ng bruă kđi čar anôk bruă kahan krĭng 7 mñă klă, klei bi mguôp lĭng kahan lehanăn mnuih ƀuôn sang jing phŭn agha ai ktang dưi mblah tŭ dưi hlăm yan mnga thŭn 1975. Hlăm wưng bluh mâo klei ruă Covid 19 tal 4, lĭng kahan lehanăn mnuih ƀuôn sang kahan krĭng 7 mâo êbeh 200 hruê ngă bruă gang mkhư̆ klei ruă tưp. Čiăng mđĭ lar ai tiê “Gang mkhư̆ klei ruă tưp msĕ si bi kdơ̆ng hŏng phung roh”, giăm 10 êbâo čô kahan mơ̆ng kahan krĭng 7 lehanăn êbeh 70 êbâo čô kahan ƀuôn čŏng pô ba anăp nao hlăm krĭng dôk bluh mâo lu mnuih ruă./.

H’Nêč pô mblang