VOV4.Êđê- Ƀri wưng bi hdơr 110 thŭn hruê k’iêng kơ Tô Hiệu (1912 - 2022) leh anăn 78 thŭm hruê djiê Tô Hiệu (1944 - 2022), ti wăl kriê pioh ala čar sang mnă Sơn La, Sang kriê pioh hƀuê ênuk čar Sơn La mkŏ mjing leh klei rang mdah rup “Ai tiê Tô Hiệu”. klei rang mdah anei mkŏ mjing mơ̆ng hruê 1/3 truh kơ jih hruê 31/12/2022, mâo 100 pŏk rup mdah dlông 15 pano ti tač êngao sang.

Dŭm pŏk rup dưi rang mdah mâo 3 akŏ: Ƀuôn sang, Tô Hiệu – Ai tiê leh anăn klei mĭn bruă krŭ kdơ̆ng, Mngač nanao ai tiê Tô Hiệu. klei rang mdah gưl anei đru bi klă knhuah bruă kđi čar kjăp, knhuah bruă krŭ kdơ̆ng, wơr asei pô jih ai kyua bruă krŭ kdơ̆ng, nao mbĭt hŏng kđeh klang, mnuih ƀuôn sang jing knhuah êdah êdi mơ̆ng Tô Hiệu. Mbĭt anăn, bi klă klei đru mguôp prŏng prĭn leh anăn knhuah hdĭp jăk mơ̆ng Tô Hiệu, jing gru mngač kơ ênuk êdei hluê ngă, đru hlăm klei mtô mjuăt knhuah gru jăk siam mơ̆ng aê ama drei.

Pô mblang: Y-Ƀel Êban