VOV4.Êđê - Hruê 14/4, Anôk bruă sang čư̆ êa čar Kon Tum bi hgŭm hŏng Sang hră gưl prŏng Đà Nẵng ti Kon Tum lehanăn Êpul hgŭm bi mjĕ mjuk Việt Nam- Lào-Campuchia čar mkŏ mjing leh knăm djuê ana Bunpimay lehanăn Chol Chnam Thmay kơ phung hđeh Lao lehanăn Campuchia dôk hriăm ti alŭ wăl.

Hlăm hdră anei, phung bi ala lehanăn phung hđeh hriăm hră hluê ngă leh klei bhiăn kă mrai ti kngan hlăm knăm  djuê ana Bunpimay mơ̆ng Lào lehanăn ngă yang hlăm mlam kkuh drông thŭn mrâo Chol Chnam Thmay mơ̆ng Campuchia, kdŏ ênhiang mmuñ Lăm Vŏng… Ƀri gưl anei, Anôk bruă sang čư̆ êa čar Kon Tum, Sang hră gưl prŏng Đà Nẵng ti Kon Tum mđup brei leh mnơ̆ng yuôm bhăn lehanăn dŭm asăp h’êč hmưi jăk siam truh kơ phung hđeh ƀri wưng knăm djuê ana. Dưi thâo, ară anei, mâo êbeh 160 čô sinh viên Lao lehanăn 17 čô sinh viên Camuchia dôk hriăm ti Sang hră gưl prŏng Đà Nẵng ti Kon Tum./.

H’Nêč pô mblang