VOV4.Êđê- Hrue mbrue (19/5), ti Đồng Tháp klă klơ̆ng pŏk leh knăm mnga krih Đồng Tháp tal 1 thŭn 2022, bruă anei mâo mkŏ mjing ƀri bi hdơr 132 thŭn hruê kkiêng kơ khua gĭt gai Hồ Chí Minh (19/5). Hŏng akŏ jing “Mnga Krih hrue mrâo”, Knăm mnga Krih Đồng Tháp ba mtrŭh klei êpa hmao kơ klei đĭ kyar, kpưn nao kbưi hĭn mơ̆ng bruă Đảng, bruă sang čư̆ êa lehanăn phung ƀuôn sang Đồng Tháp, lŏ dơ̆ng čih êwang êlan rŭ mdơ̆ng, lehanăn hưn mdah kơ anăn knăl krĭng lăn Mnga krih hrah.

Knăm anei mkŏ mjing hŏng lu bruă duh mkra mnia mblei, bruă hiu čhưn ênguê, ƀrư̆ ƀrư̆ dơ̆ng lŏ kơrŭ wĭt leh găn sa gưl klei ruă tưp prŏng Covid 19. Phạm Thiện Nghiã, Khua knơ̆ng bruă sang čư̆ êa čar Đồng Tháp brei thâo, Knăm Mnga krih tal anei amâo mâo djŏ knŏng hlăm bruă lông ngă, mâo klei mjĕ mjuk, hŏng klei mbruă bi êdah dhar kreh, ƀiădah lŏ jing mmông găl čiăng mkŏ klei bi mguôp mơ̆ng phung nga bruă duh mkra kơ mnga krih, mơ̆ng phung mâo klei mĭn čiăng djă ba mnga krih truh hŏng jih jang mah jiăng dlông rŏng lăn./.

Pô mblang: Y-Khem Niê