VOV4.Êđê - Aguah hruê 8/4, ti să Hùng Lô, ƀuôn prŏng Việt Trì, čar Phú Thọ, să Hùng Lô mkŏ mjing leh Knăm tŭ drông klei bi mklă Knăm djuê ana “Đình Hùng Lô” jing Knhuah dhar kreh amâo êdah klă ala čar lehanăn hưn mthâo klei bi mklă mơ̆ng čar Phú Thọ tŭ yap wăl hiu čhưn ênguê dhar kreh êpul êya Hùng Lô. Ƀuôn Hùng Lô êlâo adih mâo anăn pia jing Khả Lãm Trang, êdei anei bi mlih jing An Lão. Klei hâo hưn mơ̆ng đưm êlâo snei, hlăm sa hruê jăk siam, mtao Hùng mbĭt hŏng anak mtao lehanăn phung hlăm sang mtao nao găn êa krông Lô hiu čhưn dlăng lehanăn lua mnah.  Truh ti krĭng lăn Hùng Lô, Mtao ƀuh lăn mnga êa m’ak tinei jăk êdi, lăn ala čăt jing, ana kyâo mtâo mtah mda kyua anăn dôk mjưh mdei. Phung khua mduôn lehanăn mnuih ƀuôn sang krĭng anei ƀuh snăn mprăp mnơ̆ng dhơ̆ng drông mtao. Mtao hơ̆k kdơ̆k lehanăn mtă kơ mnuih ƀuôn sang ti krĭng anei mkŏ mkra ƀuôn sang. Dơ̆ng mơ̆ng anăn, mnuih ƀuôn sang Hùng Lô mkŏ mjing anôk ngă yang čiăng čuh brui mngưi grăp blư̆ hruê 9 – 10/3 hluê hruê mlan ƀlĕ hlăm grăp thŭn čiăng mkŏ mjing knăm bi hdơr kơ mtao. Hluê si klei bhiăn djuê ana, knăm đình Hùng Lô mâo 7 hdră phŭn, hlăm anăn, knăm mgrông yang jing sa knăm yuôm bhăn hĭn, hnơ̆ng prŏng truh dŭm êtuh čô nao hgŭm. Ară anei, ti alŭ wăl să Hùng Lô ăt dôk krơ̆ng kjăp 50 boh sang kyâo đưm mâo mơ̆ng 100 thŭn kơ dlông, dŭm boh sang anei mâo boh tŭ yuôm hƀuê ênuk, hdră rŭ mdơ̆ng, jiă knhuah dhar kreh, boh nik dhar kreh bruă lŏ hma. Bruă tŭ yap Knăm m’ak djuê ana “Đình Hùng Lô” jing knhuah dhar kreh amâo êdah klă ala čar lehanăn jing anôk hiu čhưn ênguê dhar kreh êpul êya, jing anôk čiăng kơ mnuih ƀuôn sang Hùng Lô mđĭ lar klei tŭ yuôm hlăm knhuah dhar kreh, mđĭ kyar bruă hiu čhưn ênguê./.

H’Nêč pô mblang