VOV4.Êđê -  Ti Hà Nội mrâo mkŏ mjing Hdră kdŏ mmuiñ “Mtŭ klei êngiê” 2022 ƀri gưl bi hdơr 77 thŭn Krŭ kdơ̆ng mlan 8 leh anăn mkŏ mjing ala čar 2/9 hâo hưn klei mpŭ kơ čar kwar, djuê ana hŏng dŭm ênoh yuôm adôk lă lar mơ̆ng sa djuê ana jhŏng ktang: Hdră dưi mbha dua kdrêč phŭn, sa kdrêč mâo akŏ “Việt Nam – Djuê ana jhŏng ktang, săn asei kyua bruă prŏng” leh anăn kdrêč tal dua jing “Việt Nam – klei mđĭ ai kơ klei êđăp ênang leh anăn đĭ kyar”. Anôk bruă mkŏ mjing hưn thâo leh dŭm klei čih hŏng akŏ “Lăn čar mơ̆ng phung jhŏng ktang” leh anăn “Phung jhŏng ktang mơ̆ng ênuk mrâo”, hŏng lu pŏk rup yuôm bhăn hŏng lu klei bi hdơr kdrưh kơăm, dŭm kdrêč phŏn lač kơ ai êwa mrâo, klei găl mrâo mơ̆ng lăn čar hlăm ênuk êđăp ênang. Bih nik, hlăm jar mơ̆ng hdră “Mtŭ klei êngiê” thŭn anei, Anôk bruă mkŏ jing mđup brei 20 hnư mnơ̆ng jing hră mkiêt mkriêm leh anăn mnga jăk siam kơ phung khua krŭ kdơ̆ng, phung amĭ Việt Nam jhŏng ktang, phung jhŏng ktang, phung kahan êka êkeh hlăm dŭm gưl bi blah. Grăp hnư mâo ênoh 10 êklăk prăl mơ̆ng prăk đru ba ala ƀuôn.

Võ Trọng Nam, K’iăng khua kiă kriê knơ̆ng bruă Dhar kreh – mjuăt ktang asei mlei ƀuôn prŏng Hồ Chí Minh brei thâo, thŭn anei ƀuôn prŏng mâo hdră mko mjing knăm “Tết êngiê” bi hdơr 77 thŭn hruê krŭ kdơ̆ng mlan 8 leh anăn hruê mkŏ mjing ala čar Yang ƀuôn ngă phñ Việt Nam, 77 thŭn Sài Gòn sua wĭt klei êngiê hŏng lu bruă ngă mđăm mbĭt. Knŏng ti hruê 2/9 ƀuôn prŏng mâo dŭm mta bruă msĕ si, mđung kpung êwa mđĭ hla čhiăm gru ti tuê hang krông Sài Gòn, kdâo dŭ, mjuăt asei mlei ti êa krông, klei kdŏ mmuñ. Boh nik jing klei kdŏ mmuñ mmăt ti êlan êbat jơ̆ng Nguyễn Huệ srăng mâo lu mnuih nao dlăng. Hluê si Võ Trọng Nam, wưng hruê mkŏ mjing ala čar thŭn anei jing sa thŭn ƀuôn prŏng găn hgao klei ruă tưp, ƀuôn prŏng amâo mâo mnah phao briêng msĕ hŏng dŭm thŭn ƀiădah srăng pioh hlăm wưng mkăn. Jih jang srăng kñăm kriê dlăng klei hdĭp mnuih ƀuôn sang dưi djăp ênŭm hĭn.

Kkuh m’ak 77 thŭn Hruê mkŏ mjing ala čar 2/9 lehanăn mđing truh knăm bi hdơr 190 thŭn hruê mkŏ mjing čar An Giang, kdriêk Tri Tôn mkŏ mjing leh Knăm m’ak Khinh khí cầu Tri Tôn thŭn 2022 lehanăn Kdâo kdŭ, Mđung hla mâo kdrăp bi êran, amâo kdrăp bi êran, mguôp hŏng Knăm bi lông êran Êmô Bảy núi… hŏng anăn “Phiơr ti krah knăm m’ak”. Anei jing knăm m’ak khing khí cầu tal êlâo dưi mkŏ mjing ti krĭng Yŭ kwar Dhŭng. Knăm anei mâo giăm 20 mta khinh khí cầu. Hlăm anăn, mâo 14 mta khinh khí cầu gưl 1 dưi đung phiơr ti hnơ̆ng dlông mơ̆ng 20 – 40 m lehanăn 3 mta khinh khí cầu gưl 7, 2 mta khinh khí cầu dưi brei phung tuê đĭ hiu dlăng Tri Tôn hŏng hnơ̆ng dlông 50m… Boh nik, aguah hruê 2/9, mâo êbeh 600 čô mâo: Knuă druh, mnuih mă bruă, êpul kahan, mnuih ƀuôn sang dăp pruê̆ jing rup kak ala čar Việt Nam ti tač bi lông êran êmô, kdriêk Tri Tôn čiăng nao ti knăm kkuh hla čhiam gru, hŏng sa blah hla čhiăm gru mâo boh prŏng 200m2 dưi mđĭ ti hnơ̆ng dlông 50m, mjing klei jăk siam êdi ti gŭ jơ̆ng čư̆ Phụng Hoàng čiăng kkuh m’ak hruê mkŏ mjing ala čar 2/9. Êngao anăn, knăm anei lŏ mkŏ mjing Mlam Mnga lehanăn dŭm hdră kdŏ mmuñ, knăm rang mdah, dŭm mta mnơ̆ng ƀơ̆ng lehanăn mkŏ mjing klei hlăp lêñ djuê ana mơ̆ng mnuih Khmer kñăm hưn mthâo pŏk rup Tri Tôn truh kơ phung tuê hiu čhưn ênguê./.

H’Nêč + Y Ƀel pô mblang