VOV4.Êđê - Aguah mbrue (9/6), ti Hà Nội mkŏ mjing leh klei bi kƀĭn ksiêm wĭt, mđup brei klei pah mni bi lông čih “Dŭm mta klei bi hmô jăk lehanăn yuôm bhăn” tal 13 (thŭn 2021 – 2022) mơ̆ng hră klei mrâo Quân đội nhân dân, anôk bruă čih mkra hră klei mrâo mơ̆ng Dhar bruă kiă kriê bruă hâo hưn gưl dlông hgŭm mkŏ mjing. Êpul mkŏ mjing mâo hrŏng ruah leh 19 mta klei čih kdlưn hĭn pioh mđup brei klei pah mni.

Klei bi lông anei mâo mtrŭt mjhar mơ̆ng mlan 6 thŭn 2021 truh jih mlan 4 thŭn 2022. Êpul mkŏ mjing mâo tŭ mă leh êbeh 200 mta klei čih ba bi lông. Hră klei mrâo Quân đội nhân dân mâo hrŏng ruah truh 146 mta klei čih jing kdlưn hĭn, hlăm anăn mâo ruah truh 15 klei čih jăk hĭn pioh mđup brei mâo: 2 klei pah mni mrô 1, 3 klei pah mni mrô 2, 4 klei pah mni mrô 3, lehanăn 10 klei pah mni bi mđĭ ai. K’iăng khua anôk bruă kiă kriê bruă kđi čar lĭng kahan Việt Nam, Khua êpul mkŏ mjing klei bi lông Trịnh Văn Quyết brei thâo, jih jang klei bi lông anăn dưi klah čŭn, lehanăn mă lu klei hriăm yuôm bhăn tui ngă mơ̆ng knhuah mngač Hồ Chí Minh./.

Y-Khem pô mblang