VOV4.Êđê - Aguah mbruê 22/3, ti Hà Nội, êpul bruă êdam êra gưl dlông Hồ Chí Minh mkŏ mjing leh knăm mđup brei klei pah mni klei bi lông čih mkra leh anăn ba mdah mnơ̆ng bi ala klei kƀĭn bruă êdam êra kluôm ala tal 12. Klei bi lông anei dưi mtrŭt mjhar mơ̆ng hruê 29/10/2021. Leh êbeh sa mlan mkŏ mjing, klei bi lông mâo leh êbeh 200 čô čih mkra hŏng 368 klei čih ba bi lông. Êpul mkŏ mjing hrŏng rau mđup brei 1 klei pah mni mrô 1, 1 klei pah mni mrô 2, 1 klei pah mni mrô 3, 4 klei pah mni mđĭ ai leh anăn sa čô pô čih mkra mâo lu klei čih. Hlăm anei klei pah mni mrô 1 dưi mđup brei kơ Vũ Hồng Quân, dôk ti Hà Nội. Hluê si khua kiă kriê êpul bruă êdam êra gưl dlông Hồ Chí Minh Nguyễn Tường Lâm, logo klei pah mni mrô 1 srăng jing mnơ̆ng bi ala klă klơ̆ng hlăm klei kƀĭn bruă Đoàn kluôm ala tal 12 leh anăn dưi ba mdah hlăm dŭm kdrăp hâo hưn leh anăn mbah mrô mơ̆ng hruê 22/3.

Y-Ƀel pô mblang