VOV4.Êđê- Klei bi lông mjuăt asei mlei Ngŏ Dhŭng Asi Sea Games 31 mjưh ruê̆ hŏng Knăm mjưh ruê̆ hlăm Sang bi lông êrah ti tač Mỹ Đình, Hà Nội hlăm mmăt mbruê 23/5 leh 12 hruê bi lông. Hŏng akŏ “ Bi klin čiăng guh mngač- Gather to shine", hdră mjưh ruê̆ Sea Games 31 dưi mbha hlăm 3 kdrêč. Kdrêč phŭn hlăm knăm bi ruê̆ jing Hdră 2 “Bi klin” hŏng Knăm kkuh kơ hla čhiăm gru, klei êbat ruê̆ mơ̆ng 11 ala čar, 40 mta bi lông, êpul dlăng klei bi lông leh anăn phung kăp đru bruă. Mbĭt anăn mâo rup jăk siam hĭn hlăm 12 hruê mkŏ mjing SEA Games 31.

Mta kñăm hlăm hdră anei jing knăm kkuh kơ hla čhiăm gru plah wah pô bi ala Êpul hgŭm mjuăt ktang asei mlei Ngŏ Dhŭng Asi leh anăn Việt Nam kơ pô bi ala Knơ̆ng bruă Olympic  Campuchia - ala čar mkŏ mjing  SEA Games 32.  Klei bi lông mkŏ mjing 40 mta klei bi lông hŏng 526 boh phŭn, mâo 11 êpul bi lông Ngŏ Dhŭng Asi, hŏng hlăm brô 10 êbâo čô bi lông, knuă druh, phung dlăng klei bi lông. Knhal tuč klei bi lông, hlue si hră dăp medai mơ̆ng Anôk bruă mkŏ mjing, Việt Nam dôk mrô sa hŏng 205 medai êa mah, leh kơ anăn Thái Lan hŏng 92 medai êa mah, dôk tal 3 jing Indonesia hŏng 69 medai êa mah./.

                                               Pô mblang: H’Zawut Ƀuôn Yă