Nao čuă dlăng anôk mkra čĭm êmô ƀhu sa mđiă Tuấn Hậu ti wăl krah Phú Túc, kdriêk Krông Pa, čar Gia Lai dŭm hruê anei, hmei ƀuh dŭm pra dôk ƀhu čĭm êmô ti dlông, anôk dưi drông kluôm klei mđiă kñĭ hưr mơ̆ng krĭng Lăn dap kngư. Mơ̆ng pô anôk bruă truh kơ mnuih mă bruă dôk mjêč ruăt ngă mkra, čiăng dưi mâo mta mnơ̆ng jăk “Djŏ mnâo” êmô sa mđiă Krông Pa kơ Têt djuê ana. Dŭm klŏ čĭm êmô mđơr hŏng plă kngan mâo anôk bruă anei ruah kđeh čĭm jăk êdi mơ̆ng êmô, mâo kdrêč khăt dlông, amâo mâo praĭ, dưi dưm dŭm mta mnơ̆ng bi ƀăt hlăm brô 60 mnĭt, mâo hra, êsŭn, toi, amrêč lehanăn plăng, srăng dưi ba ƀhu ti pra mơ̆ng 3 – 4 mmông.

Amai Hoàng Thị Minh Châu, sa čô mnuih kbưi hŏng ƀuôn sang kreh blei čĭm êmô ƀhu sa mđiă ngă hnư mnơ̆ng Têt, brei thâo:

 “Kâo hơ̆k êdi dưi ƀơ̆ng čĭm êmô ƀhu sa mđiă ti Krông Pa, Gia Lai, kyua kđeh êmô tinei gơ̆ mmih, ƀâo mngưi, kđeh kjăp, dưi ƀhu hlăm adiê mđiă hlơr, mâo mnâo mnañ mdê êdi. Grăp thŭn giăm Têt kâo kreh blei dŭm kg čiăng ngă hnư mnơ̆ng ba mơĭt kơ găp djuê.

Trần Quang Tuấn – Khua anôk bruă Tuấn Hậu brei thâo, grăp hruê adiê mđiă siam, ñu kreh ƀhu mâo 2 gưl, mơ̆ng 9h aguah – 12h yang hruê, mơ̆ng 12h yang hruê truh kơ 3h tlam. Tuấn brei thâo, mơ̆ng sa mta mnơ̆ng ƀơ̆ng aguah tlam mơ̆ng mnuih djuê ana Jrai tinei, čĭm êô ƀhu sa mđiă Kông Pa ară anei dưi blei yua leh lu hlăm wăl anôk mnia mblei:

 “Mta mnơ̆ng anei kbiă hriê mơ̆ng mnơ̆ng ƀơ̆ng aguah tlam mơ̆ng mnuih Jrai, mơ̆ng anăn mnuih ƀuôn sang mă mta mnơ̆ng anei mkra ba čhĭ kơ tuê hiu čhưn ênguê. Kơ hdră dưm dŭm mta mnơ̆ng bi ƀăt snăn hmei dưm dŭm mta mnơ̆ng bi ƀăt hluê knhưh gŏ sang, amâo yua msĕ hŏng wăl anôk mnia mblei, ngă mdê snăn. Grăp wưng mkŏ mjing knăm mơak hưn mthâo dŭm mta mnơ̆ng mơ̆ng ƀĭng ngă lŏ hma mkra snăn gŏ sang kâo ăt nao hgŭm. Mâo knăm mơak jak iêu pô nao pô nao hgŭm yơh čiăng hưn mthâo dum mta mnơ̆ng anei truh hŏng mnuih blei yua jăk hĭn.

Mơ̆ng dŭm mta mnơ̆ng aguah tlam, čĭm êmô ƀhu sa mđiă ară anei jing leh sa mta mnơ̆ng ƀrư̆ hruê ƀrư̆ mâo kơhưm ti kdriêk Krông Pa, hŏng lu gŏ sang nao hgŭm mkra mjing, mkŏ mjing anăn knăl lehanăn dưi bi mklă jing mta mnơ̆ng OCOP mơ̆ng alŭ wăl. Hồ Thị Mười – Khua anôk bruă Mười Đức wăl krah Phú Túc, kdriêk Krông Pa mâo leh giăm 30 thŭn mkra mjing čĭm êmô ƀhu sa mđiă. Hluê aduôn Mười, grăp hruê, anôk bruă mkra mjing mơ̆ng ñu mkra hlăm brô 50 kg čĭm êmô mtah. Hlăm wưng giăm Têt djuê ana msĕ ară anei, mâo hruê mkra mơ̆ng 500 – 700 kg čĭm ŭn čiăng mkăp kơdŭm anôk čhĭ, mâo leh hnưhrui wĭt hơĭt kjăp.

 “ Ară anei, gŏ sang kâo ăt mâo 3 mtŭ gưl kdriêk lehanăn anăp truh kdriêk ăt mâo klei ba mdah čiăng đĭ 4 mtŭ, mta mnơ̆ng pô mâo hnơ̆ng tŭ jăk kdlưn hĭn, siam hĭn, jăk hĭn, ƀơ̆ng jăk hĭn, ba čhĭ kơ wăl anôk mnia mblei ăt dưi maoa 4 mtŭ čiăng tui tiŏ wăl anôk mnia mblei hlăm ala čar. Kyua kleu suaih pral mơ̆ng mnuih blei yua, pô ăt mđing truh kơ klei doh êƀăt mnơ̆ng dhơ̆ng lehanăn dŭm mta mnơ̆ng mâo klei jăk găl hĭn.

Čĭm êmô ƀhu sa mđiă ară anei amâo djŏ knŏng jing mta mnơ̆ng jăk mơ̆ng krĭng “Mđiă ktang” Krông Pa. Lu anôk čhĭ mnơ̆ng ƀơ̆ng ti Gia Lai ba leh mta mnơ̆ng ƀơ̆ng anei hlăm hră hưn mthâo mnơ̆ng čiăng mkăp kơ tuê, boh nik anei jing mta mnơ̆ng mâo anăn knăl, ai bi ktưn prŏng êdi mơ̆ng dŭm anôk bruă mnia mblei. Hluếi Lê Hòa, khua Shop “Hla pŏk web ƀĭng ngă lŏ hma Foods” ti ƀuôn prŏng Pleiku, mơ̆ng akŏ mlan 12 hluê hruê mlan ƀlĕ, phung tuê hlăm kluôm ala čar lŏ kuôl kă blei čĭm êmô ƀhu sa mđiă ngă hnư mnơ̆ng mđup brei hruê Têt.

 “ Dŭm hruê giăm anei čĭm êmô ƀhu sa mđiă ƀrư̆ hruê ƀrư̆ mâo lu mnuih mđing dlăng kyua anei jing mta mnơ̆ng ƀơ̆ng jăk lehanăn mdê êdi, kyua mâo mnâo mnañ jiă knhuah krĭng čư̆ dliê kyua anăn lu mnuih truh ti Gia Lai tui duah blei lehanăn khăp êdi ƀơ̆ng. Jing anôk thơ̆ng čhĭ dŭm mta mnơ̆ng jăk jiă knhuah Lăn dap kngư, mơ̆ng akŏ mlan 11 hluê hruê mlan ƀlĕ grăp thŭn snăn Shop mâo leh phung tuê blei êngao čar hriê kuôl kă blei ngă hnư mnơ̆ng Têt mđup brei kơ ayŏng adei, ƀĭng găp lehanăn găp djuê. Hŏng klei bi hgŭm mnia mblei jăk găl msĕ ară anei bruă ba čhĭ mnơ̆ng jăk msĕ si čĭm êmô ƀhu sa mđiă snei kâo mĭn mâo lu êdi klei găl, boh nik hlăm wưng Têt hat, knăm mơak.

Hŏng êpul êmô êbeh 64.000 drei, Krông Pa dôk mđĭ lar klei jăl găl čiăng dưi mâo phŭn mkăp čĭm êmô tŭ jăk. Kluôm kdriêk ară anei mâo hlăm brô 30 anôk mkra čĭm êmô ƀhu sa mđiă. Năng mđing, hlăm ênoh 29 mta mnơ̆ng OCOP mơ̆ng kdriêk, mâo truh 20 mta mnơ̆ng dưi mkra mơ̆ng čĭm êmô msĕ si čĭm êmô ƀhu krô aruăt điêt, čĭm êmô ƀhu krô klŏ prŏng, kđeh čĭm êmô ƀhu sa mđiă, čĭm êmô ƀhu ti dlông pra pui. Võ Ngọc Châu – Khua Adŭ bruă Lŏ hma lehanăn Mđĭ kyar krĭng ƀuôn sang kdriêk brei thâo:

 “Grăp thŭn, kdriêk ăt tiŏ nao dŭm pô OCOP nao hưn mthâo anăn knăl mnơ̆ng dhơ̆ng ti alŭ wăl, hlăm čar lehanăn dŭm čar, ƀuôn prŏng mkăn. Mta kñăm mơ̆ng bruă anei čiăng hưn mthâo anăn knăl čĭm êmô ƀhu sa mđiă Krông Pa truh hŏng phung tuê hiu čhưn ênguê ti dŭm krĭng mkăn. Čiăng mđĭ kyar hơĭt kjăp, kdriêk dôk maoa hdră đru kơ hdră mnêč mkra mjing ênuk mrâo čiăng mđĭ boh tŭ yuôm anăn knăl, pŏk mlar wăl anôk mnia mblei lehanăn mđĭ kyar hdră bi hgŭm mơ̆ng bruă mkra truh kơ hrui blei.

Mơ̆ng sa mta mnơ̆ng ƀơ̆ng aguah tlam mơ̆ng mnuih Jrai, čĭm êmô ƀhu sa mđiă Krông Pa jing leh mta mnnơ̆g jăk mâo lu mnuih khăp čiăng, đru mguôp yuôm bhăn hlăm hdră mđĭ kyar bruă duh mkra mơ̆ng alŭ wăl. Hlăk Têt truh Yan mnga hriê, jiă mnâo mnañ mơ̆ng mta mnơ̆ng anei hĭn mơh mâo boh tŭ yuôm, msĕ si sa knhuah dhar kreh jăk siam êdi mơ̆ng krĭng Lăn dap kngư./.