VOV4.Êđê- Klei kdŏ mmuñ rang mdah knhuah dhar kreh dŭm djuê ana alŭ wăl Trường Sơn – krĭng Lăn Dăp Kngư pŏk phai gưl tal III thŭn 2022 mkŏ mjing ti wăl hiu čhưn ênguê ala čar Măng Đen, wăl krah Măng Đen, kdriêk Kon Plông, čar Kon Tum, mbĭt hŏng bruă răng mdah dŭm klei kdŏ mmuñ, klei ngă bruă hlăm dhar kreh klei đăo knang, klei ngă yang, dŭm mta klei mmuñ ênhiang, rang mdah kdrăp čŭt hơô djuê ana… Lŏ mâo klei nao hgŭm mơ̆ng dŭm mta mnơ̆ng ƀơ̆ng djuê ana dŭm krĭng kwar hlăm klei bi lông êkei mniê thâo mbruă iêo jăk lu mnuih ƀuôn sang leh anăn phung tuê nao dlăng.

 Hlăm Klei kdŏ mmuñ rang mdah knhuah dhar kreh dŭm djuê ana ti Duôr Čư̆ prŏng - Lăn Dap Kngư pŏk mlar tal III thŭn 2022 ti Wăl hiu čhưn ênguê čư̆ dliê ala čar Măng Đen, wăl krah Măng Đen, kdriêk Kon Plông, čar Kon Tum, Klei bi lông êkei mniê rơ̆ng boh phŭn hưn mdah hlao mnơ̆ng ƀơ̆ng djuê ana pô bŏ hŏng mdê hjăn, bi tluh  mnuih ƀuôn sang leh anăn hiu čhưn.

19 êpul phung thâo mbruă 19 čar, mâo 5 čar krĭng wăl Lăn Dap Kngư leh anăn dŭm čar: Tuyên Quang, Vĩnh Phúc, Bắc Ninh, Hải Dương, Hà Nam, Thanh Hóa, Nghệ An, Quảng Trị, Thừa- Thiên Huế, Quảng Nam, Quảng Ngãi, Đồng Nai, An Giang leh anăn ƀuôn prŏng Hồ Chí Minh hưn mthâo dŭm mta mnơ̆ng ƀơ̆ng djuê ana hŏng mnâo jăk hjăn. Nguyễn Công Trung,  K’iăng Khua Knơ̆ng bruă Dhar kreh - Phŭn bruă dhar kreh, mjuăt asei mlei leh anăn hiu čhưn ênguê, brei thâo:

“ Djuê ana dreo mâo mnơ̆ng ƀơ̆ng lu jơr. Hmei amâo mkŏ mjing klei bi lông tŭk knă ôh ƀiădah hưn mdah sa hlao êsei djuê ana. Drei mâo lu knăm ngă yang, hruê Tết, knăm mơak. Grăp djuê an mâo hlao êsei djuê ana pô. Hlăm Klei bi lông anei hmei čiăng hưn mthâo hŏng lu mnuih ƀuôn sang dŭm hlao êsei djuê ana ayŏng adei hlăm kluôm ala”

Krĭng wăl Duôr Čư̆ Prŏng - Lăn Dap Kngư hŏng dŭm mta mnơ̆ng ƀơ̆ng djuê ana, msĕ si êsei brông, mnŭ ăm, hla hƀei ƀlang đeh… ngă kơ lu mnuih knŏng mrâo ƀơ̆ng sa blư̆ ăt hdơr mnâo, klei mdê hjăn mơ̆ng mnơ̆ng ƀơ̆ng anei. Pô thâo mbruă Ksor Chung, ƀuôn Kép, ƀuôn prŏng Pleiku, Êpul čar Gia Lai lač kơ klei mdê hjăn dŭm mta mnơ̆ng tak hlăm hlao êsei mnuih Jrai:

“Dŭm mta mnơ̆ng tak anei jing khăng mâo grăp hruê čiăng huă êsei amâodah nao hma. Mâo amrêč hdăm sao, amrêč kplăng, amrêč hla êč. Bi anei jing phĭ êmô pô ngă amrêč tak ăt mă mơ̆ng phĭ êmô. Amrêč hdăm sao hmei nao mă hlăm hma. Bi amrêč anei hmei pia jing groač, hbei anei ăt mă mơ̆ng dliê mơh čiăng ngă mnơ̆ng bi ƀăt. Êa tak amâodah đeh hal hbei ƀlang brei mâo groač anei đeh mbĭt. Mnuih Jrrai hlăk êjai ngă Yang amâodah ngă hlao êsei grăp hruê jing mưng leh, bi phung tuê hiu čhưn snăn ƀơ̆ng knŏng sa blư̆ khăp, hdơr nanao yơh.”

Êpul čar Tuyên Quang hưn mthâo hlao êsei djuê ana mnuih Dao Tiền hŏng mnŭ tŭk bi luk hŏng hla kruê̆, čĭm kbao ăm, čĭm ŭn hrô giê, djam bei đŭng bi luk hŏng kan; dŭm mta mnơ̆ng ƀơ̆ng mơ̆ng kan…dưi mkra mjing jăk snăk hŏng lu êa mil, mnâo ƀâo mngưi; Êpul čar An Giang hưn mthâo hlao êsei hŏng mnơ̆ng ƀơ̆ng djuê ana mnuih Khmer msĕ si ƀêñ êya, dŭm mta mnơ̆ng ƀơ̆ng mơ̆ng boh Thốt nốt amâodah mnơ̆ng bi luk hŏng čĭm êmô Khmer. Pô thâo mbruă Lê Quang Nhuận, Êpul ƀuôn prŏng Hồ Chí Minh hưn mthâo dŭm mta klei mơ̆ng đum sum leh anăn mta ƀêñ hing ang mơ̆ng mnuih Hoa:

“Đum sum jing klei pia mbĭt kơ mnơ̆ng ƀơ̆ng điêt, mâo sa tal kpŭng nah êngao êpih leh anăn hlăm lam jing tal kđeh. Mâo dŭm mta đum sum msĕ ƀêñ hŏng hdang, čĭm, hdang hŏng čĭm. Bi hŏng mta ƀêñ ƀao dưi mkra mjing leh anăn bi lu jơr hĭn hŏng ƀêñ bao khăng mâo. Mta ƀêñ ƀao prŏng mâo 8 boh bip, ƀêñ ƀao bi smiam. Rup mjing klei mdê hjăn leh anăn jăk siam. Mta ƀêñ ƀao yua pioh kơ dŭm gưl, msĕ si klei ngă yang kơ aduôn aê amâodah jing dŭm gưl Tết.”

 Mưng yua hlăm ƀuôn sang ƀiădah bŏ hŏng mdê hjăn jing klei mnuih ƀuôn sang lač, phung tuê ăt msĕ mơh lu phung thơ̆ng kơ mnơ̆ng ƀơ̆ng leh lông ƀơ̆ng mnơ̆ng ƀơ̆ng hlăm hlao êsei dŭm djuê ana, mâo 19 Êpul phung thâo mbruă hưn mthâo hlăm jar dŭm bruă ngă mơ̆ng Klei kdŏ mmuñ rang mdah knhuah dhar kreh dŭm djuê ana krĭng Duôr Čư̆ Prŏng - Lăn Dap Kngư  pŏk mlar tal III thŭn 2022.

Pô mblang: H’Zawut Ƀuôn Yă