VOV4.Êđê - Aguah hruê 14/6 mbruê, ti tač čưng boh čar Kon Tum ti ƀuôn prŏng Kon Tum mkŏ mjing leh Knăm Mphŭn pŏk Klei bi lông mjuăt ktang asei mlei čar Kon Tum tal VII thŭn 2022. Mkŏ mjing hlăm 7 hruê, mơ̆ng hruê anei truh kơ jih hruê 20/6, Klei bi lông mjuăt ktang asei mlei čar Kon Tum tal VII thŭn 2022 mâo 30 êpul hŏng 2.600 čô knuă druh, phung mjuăt bi hriăm lehanăn phung bi lông nao hgŭm.

Ti knăm anei, srăng bi lông 18 mta klei hŏng 136 medai pah mni. Êlâo kơ mphŭn pŏk klei bi lông, mâo 10 mta klei bi lông dưi mkŏ mjing êlâo, mâo: Pah ping pong, pah mlâo mnŭ, cờ vua, cờ tướng, luê, êran, čưng boh êkei, karate, taekwondo lehanăn yoga. Nguyễn Xuân Truyền, K’iăng khua knơ̆ng bruă dhar kreh, mjuăt ktang asei mlei lehanăn hiu čhưn ênguê, K’iăng khua anôk bruă mkŏ mjing klei bi lông anei brei thâo, mkă hŏng gưl mkŏ mjing êlâo, Klei bi kƀĭn anei dưi mđĭ leh ênoh mta klei bi lông lehanăn ênoh mnuih nao hlăm klei bi lông./.

H’Nêč pô mblang