VOV4.Êđê - Mmăt 29/3, ti să Ka Đơn, kdriêk Đơn Dương (Lâm Đồng) mkŏ mjing leh knăm mphŭn pŏk Knăm mơak dhar kreh, mjuăt ktang asei mlei krĭng mnuih djuê ƀiă čar Lâm Đồng tal 5 2022. Hŏng akŏ “ênai kwang dap kngư”, Knăm mơak dhar kreh, mjuăt ktang asei mlei krĭng mnuih djuê ƀiă čar Lâm Đồng tal 5 -2022 iêô jak 300 čô phung thâo mbruă mơ̆ng 12 kdriêk, ƀuôn prŏng hlăm čar hgŭm.

Hlăm wang 2 hruê, knăm mơak mkŏ mjing lu bruă ngă čiăng hâo hưn kơ klei răng mgang, mđĭ lar ênoh mnơ̆ng kriê pioh wăl dhar kreh čing čhar Lăn Dap Kngư; bi lông hlue ngă tŭ dưn Hdră mtrŭn Klei bi kƀĭn Phung bi ala kluôm ala tal XIII mơ̆ng Đảng.

 Boh nik, knăm mphŭn pŏk leh anăn mlan bi hgŭm “ênai kwang dap kngư’, lu klei kdŏ mmuiñ jăk siam, lŏ mkŏ mjing klei nao iêô yang Pui, yang čing, knăm ngă yang akŏ pin êa mnuih Churu, tŭk knă leh anăn tông čing, kdŏ čhuang mơ̆ng mnuih Mạ, K’Ho… Êngao anăn, knăm mơak lŏ mâo klei bi lông mjuăt asei mlei, klei hlăp djuê ana, klei bi lông tông čing leh anăn mmuiñ ênhiang djuê ana…

H’Zawut pô mblang