VOV4.Êđê- Knăm mnơ̆ng ƀơ̆ng leh anăn bruă hiu čhưn ênguê ƀuôn sang ti Hà Nội wưng Sea Games 31 kñăm hưn mdah, rang mdah mnơ̆ng ƀơ̆ng Hà Nội, hưn mdah hŏng phung tuê hiu čhưn ênguê hlăm leh anăn êngao ala čar klei jăk siam mơ̆ng ƀuôn sang ngă bruă đưm ti ƀuôn prŏng phŭn – anôk mklin 47 hlăm 52 mta bruă knhuah gru mơ̆ng đưm ti ƀuôn prŏng phŭn. Knăm anei mĭn tĭng srăng mkŏ mjing hlăm 5 hruê, mơ̆ng hruê 19 – 23/5, ti ktuê êlan Lê Quang Đạo, kdriêk čar Nam Từ Liêm (klă anăp hŏng êlan bi lông F1). Êpul mkŏ mjing brei thâo, knăm anei srăng mâo 6 anôk rang mdah hŏng akŏ mdê mdê, hlăm anăn mâo đa đa dŭm mta bruă knhuah gru mơ̆ng đưm dưi mđĭ kyar truh kơ klei mnia mblei leh anăn hiu čhưn ênguê hŏng dŭm hdră hiu čhưn ênguê kơ phung tuê hriê čuă dlăng leh anăn blei mnơ̆ng dhơ̆ng knhuah gru msĕ si: mnơ̆ng mmuôn hŏng lăn čuh Bát Tràng, mnơ̆ng pơ̆k mñam Vạn Phúc, bai mñam hŏng kram Phú Vinh, Sơn Đồng… Anei jing bruă ngă čiăng mtrŭt mđĭ bruă hiu čhưn ênguê dưi mkŏ mjing hŏng klei prŏng leh anăn mâo boh tŭ dưn, mtrŭt mjhar mnuih ƀuôn sang ƀuôn prŏng phŭn hiu čhưn ênguê hlăm dŭm anôk jăk yâo ti Hà Nội, iêo mthưr mnuih ƀuôn sang mơ̆ng dŭm alŭ wăl hlăm kluôm ala hriê ti ƀuôn prŏng phŭn Hà Nội, mbĭt anăn lŏ dưn mdah dŭm klei yuôm bhăn, jăk yâo mơ̆ng dŭm mta bruă mâo mơ̆ng đưm, mnơ̆ng ƀơ̆ng Hà Nội.

        Pô mblang: Y-Ƀel Êban