VOV4.Êđê - Ară anei, lu phung êdam êra mbĭt hŏng mnuih ƀuôn sang ti dŭm ƀuôn krĭng lăn dap kngư mâo leh lu hdră mă bruă čiăng kriê pioh, mđĭ lar dhar kreh djuê ana mơ̆ng đưm čiăng drông phung tuê hiu čhưn ênguê leh klei ruă Covid 19 kñăm krŭ wĭt bruă duh mkra, bi h’ĭt klei hdĭp.

Khădah dôk mda asei, ƀiădah Ayŏng Siu Thanh, 25 thŭn, ti alŭ Pleiky, wăl krah Nhơn Hòa, kdriêk Čư̆ Pưh tông čing čhar djuê ana thâo êdi. Ayŏng Siu Thanh brei thâo, ayŏng thâo tông čing mơ̆ng điêt, thâo lu hdră tôngmơ̆ng djuê ana. Khă snăn, dhar kreh čing čhar ti alŭ wăl čar Gia Lai lehanăn dŭm čar krĭng Lăn dap kngư dôk tlă anăp hŏng klei luič ram, amâo lŏ mâo mnuih thâo tông. Kyua anăn, hlăm wưng ti anăp, Siu Thanh čang hmăng mâo klei mđing dlăng hĭn mơ̆ng dŭm gưl, dhar bruă, čiăng mtô mblang, hưn mthâo kơ knhuah dhar kreh čing čhar hlăm kdrăp hâo hưn kơ lu mnuih, lŏ mdah wĭt dŭm knăm m’ak djuê ana mơ̆ng đưm êdah êdi mguôp hŏng klei bi mjĕ mjuk dhar kreh čing čhar. Ayŏng Siu Thanh brei klei blŭ: “Mơ̆ng êlâo truh kơ ară anei kâo gĭr jih ai tiê pô čiăng krơ̆ng kjăp lehanăn hưn mthâo knhuah dhar kreh jăk siam mơ̆ng djuê ana mâo aê aduôn pô lui leh mơ̆ng đưm êlâo, mâo klei ênguôt anăn jing hruê anei mnuih ƀuôn sang wơr bĭt leh. Ƀiădah ară anei kâo mbĭt hŏng ayŏng adei hlăm ƀuôn lŏ gĭr hưn mthâo dŭm knhuah jăk siam hlăm dhar kreh djuê ana kơ jih jang ƀĭng găp jĕ giăm taih kbưi. Leh anăn ară anei kâo lŏ gĭr hĭn hlăm bruă mtô mblang kơ ênuk gưl êdei čiăng kơ phung anak čô lŏ dơ̆ng kriê pioh lehanăn mđĭ lar dhar kreh mnuih ƀuôn sang mơ̆ng đưm”.

Jing knuă druh Adŭ bruă Dhar kreh – hâo hưn kdriêk Kbang, čar Gia Lai, Đinh Mỡi mâo bruă klam kriê dlăng dŭm wăl knhuah gru hƀuê ênuk mơ̆ng kdriêk. Bruă phŭn mơ̆ng ayŏng jing ktrâo lač lehanăn hưn mthâo kơ phung tuê hiu čhưn ênguê kơ hdră bruă krŭ kgŭ kdơ̆ng mơ̆ng mnuih ƀuôn sang alŭ wăl hlăm 2 hdră kdơ̆ng mblah hŏng Prăng lehanăn Mi; lehanăn dŭm knhuah jăk siam mơ̆ng dhar kreh đưm mơ̆ng mnuih djuê ana Bahnar. Khădah mơ̆ng akŏ thŭn 2021 truh kơ ară anei, hdră hiu čhưn ênguê tinei hmăi djŏ mơ̆ng klei ruă Covid 19, ƀiădah ayŏng ăt mtrŭt mđĭ ai mnuih ƀuôn sang gĭr mjuăt hriăm, krơ̆ng êpul tông čing čhar, pơ̆k mñam. Ară anei, anôk bruă hiu čhưn ênguê mâo klei bi êdah lŏ krŭ wĭt, ayŏng lehanăn mnuih ƀuôn sang hơ̆k kdơ̆k čih mkra hdră kčah đru mguôp hưn mthâo knhuah dhar kreh jăk siam, hƀuê ênuk krĭng ƀuôn sang Kbang jhŏng ktang. Ayŏng Đinh Mỡi – knuădruh bruă dhar kreh kdriêk Kbang, čar Gia Lai brei thâo:Wăl knhuah gru hƀuê ênuk dhar kreh gưl čar anăn jing Krĭng 10 hlăm să Kroong, kdriêk Kbang, čar Gia Lai dưi lŏ krŭ wĭt. Anei jing knhuah gru hƀuê ênuk yuôm bhăn, hlăm 2 thŭn êgao, klei ruă tưp bluh mâo kjham, anôk bruă hiu čhưn ênguê dleh dlan. Ară anei, hlăk klei ruă tưp ƀrư̆ dưi ksiêm dlăng, anôk bruă hiu čhưn ênguê mâo klei bi êdah lŏ krŭ wĭt, asei ñu pô gĭr bi hgŭm hŏng mnuih ƀuôn sang hrăm mbĭt mkŏ mkra lehanăn mđĭ bruă tông čing čhar, dŭm knhuah dhar kreh, dŭm mta bruă msĕ si kdŏ mmuñ; mơ̆ng anăn đru kriê pioh, mđĭ lar lehanăn mđĭ kyar dhar kreh djuê ana jăk hĭn, hưn mthâo pŏk rup kơ phung tuê hiu čhưn ênguê hlăm lehanăn êngao ala čar. Phung mbruă ăt msĕ mơh mnuih ƀuôn sang hrăm mbĭt kriê pioh, hưn mthâo pŏk rup hƀuê ênuk lehanăn lŏ mtô mblang kơ anak čô čiăng kơ phung čô anak dưi thâo anôk yuôm bhăn hŏng hdră krŭ kgŭ kdơ̆ng, hŏng mnuih ƀuôn sang ti Gia Lai lehanăn hŏng kluôm ala”.

Hlăm dŭm hrue ngă klei bi kbưi hlăm yang ƀuôn kñăm gang mkhư̆ klei ruă tưp Covid 19 jing wưng aduôn Thị Pyơm, ti Bon Bu Nrung, să Dak Bu So, kdriêk Tuy Đức, čar Daknông, dôk kreh kruiñ dôk pơ̆k mñam. Ñu brei thâo, êbeh 60 thŭn siă suôr hŏng bruă pơ̆k mñam, ka tuôm mâo ôh ñu mñam lu msĕ si wưng leh êgao. Ară anei klei hdĭp lŏ wĭt msĕ si aguah tlam leh, ñu lŏ dơ̆ng mtô bi hriăm bruă pơ̆k mñam kơ anak čô, kñăm kriê pioh knhuah gru dhar kreh djuê ana pô: Jih jang mnơ̆ng kâo mñam hlŏng dưi čhĭ jih. Êngao anăn kâo mñăm pioh yua hlăm gŏ sang. Kâo ăt mñam lu mnơ̆ng djuê ana pô pioh kơ anak čô, lehanăn lŏ mtô kơ anak mniê thâo mñam kñăm kriê pioh bruă aê aduôn pô. Ară anei phung thâo mñam knŏng ƀiă, tơdah amâo lŏ mtô bi hriăm ôh, snăn phung hđeh gưl mrâo amâo lŏ thâo ôh.