VOV4.Êđê - Y -Ƀhĭ Ayŭn djuê ana Êđê, ti ƀuôn Hŭk, să Čư̆ Mgar, kdriêk Čư̆ Mgar, čar Dak Lak siă suôr êdi hŏng bruă hrĭ mñam mơ̆ng êlâo. Grăp hruê hruê, ñu hrĭ mñam bŭng, ê’i, lip, knguôr… mbruă, siam êdi. Hŏng kiê kngan mbruă, dŭm mta mnơ̆ng ñu hrĭ mñam amâo djŏ knŏng ba wĭt klei tŭ dưn hlăm bruă duh mkra pla mjing, yua hlăm aguah tlam ƀiădah lŏ đru krơ̆ng kjăp bruă hrĭ mñam djuê ana mơ̆ng đưm.

Nao čuă pô thâo mbruă hrĭ mñam Y-Ƀhĭ Ayŭn kreh iêo Aê H’Ñun hlăm sa tlam adiê hjan. Ti djiêu kpur pui hlăm sang krum mđao, ñu dôk hrĭ dŭm aruăt mñam čiăng mñam dŭm mta mnơ̆ng msĕ bŭng, bai, ê’i, knguôr…Bruă anei ba wĭt sa ênoh prăk đru kơ anak čô leh anăn dưi djă pioh knhuah dhar kreh djuê ana pô. Aê H’Ñun brei thâo, ñu thâo bruă hrĭ mñam mơ̆ng hlăk 16 thŭn, êjai dlăng kơ aê, aduôn, amiêt awa dôk mñam dŭm mta mnơ̆ng yua hŏng đrao, hŏng kram. Khăp kơ bruă anei, ñu ktuê dlăng hlăm grăp klei ngă bruă, leh anăn ƀrư̆ thâo raih yơh.  “Bruă hrĭ mñăm mơ̆ng mnuih djuê ana Êđê mâo mơ̆ng đưm đă leh. Kâo mñam bung, ê’i mơ̆ng hlăk kâo dôk êdam. Kâo hriăm mơ̆ng awa kâo kơ klei mñam dŭm boh mnga leh anăn hluê ngă msĕ sơnăn”.

Mnuih ƀuôn sang ti ƀuôn Hŭk, să Čư̆ Mgar, kdriêk Čư̆ Mgar mưng yua leh dŭm boh bŭng, ê’i, knguôr mơ̆ng pô thâo mbruă Aê H’Ñun hrĭ mñam. Mnuih ƀuôn sang ƀuôn giăm, ƀuôn kbưi ăt kreh hriê blei mơh. Đa đa dŭm sang huă mñăm mơ̆ng ƀơ̆ng knhuah djuê ana ăt kreh hriê blei hŏng ênoh lu.

Aê H’Ñun brei thâo, čiăng mkŏ mjing dŭm mta mnơ̆ng dhơ̆ng mơ̆ng bruă hrĭ mñam, êngao kơ klei thâo adiê brei, pô hrĭ mñam čiăng mâo klei gĭr mơ̆ng bruă ruah mă ana đrao, ana hwiê, ana kram. Phung mduôn khua ngă sui leh bruă anei srăng mâo klei thâo, ruah mă dŭm ana đrao amâo mâo hluăt ƀơ̆ng, leh anăn koh jing dŭm kdrêč, bhu krô leh anăn hrĭ mñam. Pô hrĭ mñăm srăng mâo kngan kjăp kơ dưi mñăm bi msir dŭm aruăt đrao. Knhal tuč jing ksiêt griŏ, mă klei hwiê kă bi kjăp… Amâo djŏ knŏng thâo raih klei mñam pŭ sa, pŭ mdua, pŭ tlâo, pô thâo mbruă Aê H’Ñun lŏ thâo duah mjing dŭm mta boh mnga siam hlăm grăp mta mnơ̆ng, mâo boh tŭ dưn yuôm bhăn. “Mâo klei hmar kơh dưi thâo mñam dŭm mta boh mnga siam, mâo dŭm mta boh mnga hlăm ê’i msĕ si rup kyâo bi kal, rup hna, kru jơ̆ngh mja, mnga trong, rup yang hruê, čim ktang, rup mnga, rup 4 kiêng. Hlăm anăn, boh mnga rup čim ktang mâo boh tŭ yuôm bhăn hĭn. Hlăm ƀuôn hŭk anei, knŏng hjan kâo thâo mñam boh mnga anei. Đưm dih, sĭt mâo pô thâo mbruă dưi mñam 7 ê’i mâo boh mnga jing rup čim ktang srăng dưi ngă yang klei suaih pral. Dŭm boh ê’i anăn srăng dưi ba mđup brei kơ phung amiêt awa, ayŏng adei hlăm gŏ sang.

Bruă hrĭ mnăm jing bruă mâo mơ̆ng đưm mơ̆ng mnuih djuê ana Êđê, ƀiădah ară anei mâo ƀiă sơnăk phung thâo hrĭ mnă, thâo đêč boh mnga mâo boh tŭ dưn hlăm grăp mnơ̆ng dhơ̆ng. Čiăng dưi mñam sa mnơ̆ng hrĭ mñam siam čiăng mâo klei ngă jăk hlăm djăp bruă leh anăn luč lu mmông, kyuanăn hŏng klei hdĭp ară anei, phung mda asei amâo lŏ khăp ôh kơ bruă anei. Kyuanăn, pô thâo mbruă Aê H’Ñun hmăng hmưi dưi mtô kơ anak čô pô čiăng kriê pioh bruă hrĭ mñam knhuah gru djuê ana. “Ară anei lu phung mda asei khăp kơ hlăp lêñ hĭn, amâo amâo čiăng hriăm hrĭ mñam ê’i amâodah bung ƀai. Kâo iêo mthưr diñu hriê hriăm ti sang kâo. Êjai kâo dôk suaih pral, dôk hdĭp dưi mtô kơ diñu, kơ klei bhiăn mnuih djuê ana Êđê pô, êdei dih wĭt hŏng aduôn aê atâo tiêt amâo mâo pô lŏ mtô ôh.

Hmăng hưi hŏng klei khăp leh anăn klei čiăng mtô mơ̆ng phung thâo mbruă, bruă hrĭ mñam knhuah gru dhar kreh mơ̆ng mnuih djuê ana Êđê amâo srăng luč rai ôh.