VOV4.Êđê - Êbeh 30 thŭn êgao, pô thâo mbruă Y-Thái Êban, ti ƀuôn prŏng Ƀuôn Ama Thuôt, čar Dak Lak dôk jih ai pô čiăng kriê pioh leh anăn bi lar bruă krah rup hŏng kyâo, dŭm bĕ kyâo amâo mâo mngăt, amâo mâo klei mĭn dưi krah jing dŭm mta mnơ̆ng siam. Y-Thái Êban jing sa hlăm ênoh ƀiă pô thâo mbruă ti čar Dak Lak dôk mâo klei khăp kơ bruă krah rup hŏng kyâo, leh anăn mâo prăk ba wĭt mơ̆ng bruă anei.

Dôk ti krah dŭm gru rup krah hŏng kyâo hŏng lu mta mdê mdê, pô thâo mbruă Y-Thái Êban kreh iêo Aê En Lin, ti ƀuôn Kmrơ̆ng Prŏng B, să Ea Tu, ƀuôn prŏng Ƀuôn Ama Thuôt, čar Dak Lak hur har hưn mthâo kơ rup krah hŏng kyâo “Pô riu yang leh anăn mniê đru ngă yang”. Ñu brei thâo anei jing sa hlăm dŭm rup krah ñu khăp hĭn, rup anei mâo leh klei pah mni mrô dua hlăm Klei bi lông krah rup hŏng kyâo dŭm djuê ana Lăn Dap Kngư thŭn 2017.

Pô thâo mbruă Aê Enlin brei thâo, hlăk điêt, ñu khăng tui hlue phung ama neh, phung awa nao hlăm dliê mă kyâo pioh krah rup dưm ti msat. Kyua khăp kơ klei bi êdah hlăm grăp boh rup krah, ñu mđing dlăng leh anăn hlue krah. Lu blư̆ kngan amâo thâo ngă, amâo dưi gai jông, krah hlue si klei pô čiăng ngă kơ klŏ kyâo jhat hĕ. Amâo êdu ai ôh, ñu ăt lŏ dơ̆ng hriăm, krah tơl dưi mjing sa rup krah jăk siam. Nanao snăn, êbeh 30 thŭn êgao, krah rup hŏng kyâo jing leh klei khăp leh anăn ba kơ ñu klei tŭ jing, đru ñu mâo thiăm ai tiê kriê pioh leh anăn mđĭ kyar.Sa klei mĭn mbruă jing kâo mă kyâo krah amâo djŏ čih kač rup ôh. Jing kâo ăt gĭr, kyua bruă pô kriê pioh, răng mgang dhar kreh anei, Kâo huĭ adei anei luič ram, êdei anei pô khua mduôn snăn amâo lŏ mâo klei suaih pral lŏ dơ̆ng ngă klei anei ôh, amâo dưi luič ôh čiăng kơ anak čô êdei anei ƀuh, msĕ si đưm dih kâo ƀuh amiêt awa kâo ngă leh, truh hruê anei kâo ăt kriê pioh ăt hdơr leh anăn kâo dưi ngă mơh.

Thŭn 2015, mơ̆ng leh klei bi lông krah rup hŏng kyâo tal êlâo dưi ba mkŏ mjing hlăm jar Knăm mơak phê Ƀuôn Ama Thuôt, pô thâo mbruă Aê Enlin khăp kơ bruă krah rup hŏng kyâo, kyua ñu ƀuh leh anôk hlăp, thâo thiăm lu mnuih mâo klei khăp msĕ pô. Ăt mơ̆ng klei bi lông anăn, pô thâo mbruă Aê Enlin mâo lu mnuih thâo leh anăn akâo blei rup krah hŏng kyâo. Ăt lu blư̆ ñu bi ala kơ čar Dak Lak nao hgŭm leh anăn mâo klei pah mni hlăm dŭm knăm bi lông krah rup djuê ana ti krĭng wăl Lăn Dap Kngư. Truh ară anei, rup krah hŏng kyâo amâo djŏ jing klei khăp ôh ƀiădah lŏ jing bruă phŭn ba prăk hrui wĭt hơĭt kjăp kơ gŏ sang ñu.

Čiăng mjing rup krah, pô thâo mbruă Aê Enlin knŏng yua jông, mnhat, dhŏng. Sĭt dlăng hlăm klŏ kyâo, ñu bi mĭn leh anăn čŏng ñu pô mkŏ mjing rup krah amâo guôn lŏ lač ôh. Grăp boh rup krah mâo sa klei yuôm bhăn mdê, jing sa klei yăl dliê, sa klei yuôm bhăn djuê ana, sa klei jăk siam dhar kreh, mguôp hŏng klei hdĭp grăp hruê mnuih Êđê. H Yâo Ƀuôn Yă (Aduôn Enlin), mô̆ pô thâo mbruă brei thâo:Ñu dưi ngă djăp mta mnơ̆ng hŏng klei pô bi mĭn leh anăn krah rup, mơ̆ng gru rup krah hlăm boh ƀăng truh kơ rup krah mâo rup mdê mdê. Kâo pô ăt jih ai tiê mđĭ ai čiăng ñu lŏ dơ̆ng bi hriăm kơ 1 čô anak êkei, anăn gŏ sang kâo nao ai, mđĭ ai čiăng ñu lŏ dơ̆ng kriê pioh dhar kreh aduôn aê, tơdah amâo mâo ñu snăn amâo lŏ mâo pô ngă ôh.

Hlue si Aê Enlin, mâo leh wưng rup krah hŏng kyâo amâo mâo pô yua ôh anăn luič ram. Ară anei ñu mơak snăk leh ƀrư̆ hruê mâo lu phung mda asei leh anăn phung tuê khăp kơ rup krah hŏng kyâp. Ƀuh ênoh yuôm leh anăn klei tŭ dưn bruă duh mkra mơ̆ng bruă anei, ñu mtrŭt mjhar phung anak leh anăn phung hlăm ƀuôn, hlei pô khăp leh anăn gĭr tui hriăm, ñu srăng bi hriăm leh anăn mđĭ ai diñu đru sĭt mâo hră amâo blei krah rup. Bùi Văn Hượng, knuă druh dhar kreh să Ea Tu, ƀuôn prŏng Ƀuôn Ama Thuôt brei thâo, ñu đru mguôp jăk hlăm bruă kriê pioh mđĭ lar knhuah dhar kreh djuê ana Êđê ti alŭ wăl:Pô thâo mbruă Y Thái gĭr hgŭm hlăm bruă kriê pioh bruă krah rup hŏng kyâo leh anăn knhuah dhar kreh djuê ana mnuih Êđê ti să. Pô thâo mbruă Y Thái ară anei lŏ dơ̆ng mđĭ lar ênoh yuôm dhar kreh kơ klei krah rup pô čiăng hưn mthâo mnơ̆ng dhơ̆ng pô leh anăn pioh kơ bruă hiu čhưn ênguê êdei anăp. Ară anei ti să Ea Tu snăn ăt kăn mâo mơh pô thâo mbruă krah rup hŏng kyâo êngao kơ Y Thái kyua anăn să lŏ dơ̆ng mđĭ ai, mtrŭt mjhar pô thâo mbruă Y Thái mđĭ kyar thiăm, lŏ dơ̆ng mđĭ lar klei dưi pô.

Mpŭ kơ klei yuôm knhuah gru djuê ana pô, pô thâo mbruă Aê Enlin ăt dôk gĭr bi siam krah rup hŏng kyâo. Ñu tui hriăm, lŏ pioh knhuah djuê ana čiăng krah rup hŏng kyâo, jing klei yăl dliê kơ grăp čô mnuih. Hŏng ñu, krah rup hŏng kyâo jing hdră čiăng kriê pioh knhuah gru djuê ana leh anăn lŏ bi hriăm ênuk êdei.