VOV4.Êđê-  Mơ̆ng sui leh, mnuih ƀuôn sang alŭ Krot Dơng, wăt kơ să Bải Thuận, kdriêk Di Linh, čar Lâm Đồng dlăng kơ mduôn K’Brel jing ngăn dŏ yuôm bhăn hlăm ƀuôn sang. Kyua ñu mâo nanao klei khăp čiăng jih ai tiê hŏng dhar kreh tông čing čhar mơ̆ng mnuih K’Ho Sre. Thŭn 2021, Phung bruă dhar kreh mjăt ktang asei mlei leh anăn hiu čhưn ênguê tŭ yap mduôn K’Brei jing “Pô thâo mbruă êdah êdi” hlăm bruă mnơ̆ng kriê pioh dhar kreh amâo thâo ƀuh hŏng ală, klei yăl dliê ti gŭ anei yăl dliê kơ mduôn anei

Khua mduôn yăl dliê ñu thâo tông čing mơ̆ng hlăk sa čô hđeh 13-14 thŭn. TRuh ară anei, ñu ăt dôk hdơr nanao kơ dŭm hruê ƀơ̆ng kbao mơ̆ng sang anei truh sang mkăn, mơ̆ng hruê anei truh hruê mkăn, đa đa sui truh jih sa mlan hŏng djăp klei bhiăn djuê ana mnuih K’Ho. Tinăn, phung êkei tông čing, tông hgơr, mniê snăn đru bruă kơ gŏ snag mkŏ mjing knăm ƀơ̆ng kbao. Anăn jing ênai čing kwang kdrăm kơah leh anăn ênai anăn kwang nanao hlăm akŏ ñu hŏng klei yuôm bhăn, hŏng klei mưng, msĕ si mtrŭt ñu wĭt hŏng dhar kreh djuê ana pô.

 Gŏ sang K’Brel mâo 3 čô ayŏng adei, snăn jih 3 čô mâo âm bi hriăm tông čing hŏng klei raih. Truh ară anei, hŏng K’Brel, adei kluič K’Brel kkiêng thŭn 1970 ăt khăng nao hlăm klei rang mdah sĭt alŭ ƀuôn, bruă sang čư̆ êa mkŏ mjing mjĕ êrô dhar kreh čing čhar hruê bi hgŭm djuê ana.

 Êngao kơ bruă mtô bi hriăm čing čhar kyua Anôk bruă dhar kreh - hâo hưn leh anăn mjuăt ktang asei mlei kdriêk mkŏ mjing, ñu lŏ mtô tông čing hlăm sang kkuh mpŭ hlăm sang khop Kala. Amâo djŏ knŏng khăp ôh, khua mduôn K’Brel lŏ jih ai tiê hlăm bruă mtô bi hriăm tông čing kơ phung mda asei, boh nik hđeh mnuih djuê ƀiă ti alŭ wăl. Khua mduôn K’Brel jih ai tiê hŏng dŭm klei tông čing msĕ si čing 6 mdah klei ngă yang huă êsei mrâo hŏng klei jing anak hia amĭ mjum pĭt, mơak jih jang knăm moak prŏng mnuih K’Ho. Čing 5 hŏng klei mơak knăm akâo hjan “Dan biăp dan gòl” akâo kơ yan buh pla čăt jing, yan adiê găl jăk, čoh bruă ngă hma m’êa kiê kngan. Lač kơ klei tông čing, khua mduôn K’Brel brei thâo:

“Klei tông čing 3 jing čing kkuh drông, čing 5, čing 6 jing klei tông čing drông tuê, ngă yang hlăm knăm mơak, akâo adiê hjan, akâo jăk kơ yan buh pla, boh nik čing mdua yua ngă Yang. Anei jing klei tông čing yuôm bhăn čiăng ngă yang - jing kban mkŏ yang hŏng anak mnuih hlăm bruă ngă yang mnuih K’Ho. Êngao anăn, čing mdua lŏ mâo klei tông čing bi mni kơ phung thâo mbruă, êdah kdlưn hlăm ƀuôn sang thâo ngă bruă duh mkra. Klei tông čing drông ayŏng adei găp djuê bi hgŭm, čang hmăng mâo klei suaih pral, Anei jing klei mdê mơ̆ng dŭm klei tông čing mnuih K’Ho Sre hŏng dŭm djuê ana mkăn”.

Pô thâo mbruă êdah kdlưn K’Brel

 Hlăm alŭ Krọt Dờng ară anei ăt adôk mâo lu phung mduôn hlăm sa gưl hŏng Khua mduôn K’Brel thâo tông čing. Ƀiădah amâo djŏ ôh djăp čô khăp msĕ si ñu, kyua brei khăp, thâo săng leh anăn jih 6 čô hlăm êpul thâo bi mguôp djŏ ai kơh thâo tông čing jiă kma mngăt djuê ana hlăm klei tông čing. Ñu pô ăt mưng leh hŏng gưl hiu rang mdah, bi lông điêt prŏng hlăm čar leh anăn êngao čar. Dưi bi lông, tui hriăm mơ̆ng dŭm djuê ana mkăn kơ dŭm klei jăk, klei siam mơ̆ng dhar kreh djuê ana, ñu gĭr hĭn hlăm bruă răng kriê leh anăn mđĭ lar dhar kreh čing čhar mnuih K’Ho Sre. Khua mduôn K’Brel brei thâo:

“Čing čhar jing dhar kreh djuê ana, kâo čang hmăng kriê pioh nanao leh anăn amâo čiăng luič ôh dhar kreh djuê ana čing čhar anei. Kâo čiăng mtă kơ ênuk mda asei thâo mpŭ, kriê pioh dhar kreh čing čhar aduôn aê pô. Kâo čang hmăng bruă sang čư̆ êa mđing dlăng đru brei srăng mjing sa boh sang krum djuê ana mnuih K’Ho čiăng kriê pioh dhar kreh mnuih K’Ho yua msĕ si sang dhar kreh, tinei srăng mtô bi hriăm čing char kơ anak čô mnuih K’Ho, kriê pioh dhar kreh djuê ana kơ ênuk êdei čiăng kơ dhar kreh čing čhar mnuih K’Ho Sre srăng dôk nanao hŏng klei đĭ kyar hĭn mơ̆ng mnuih K’Ho.”

Khua mduôn K’Brel hŏng hră bi mklă pô thâo mbruă tông čing čhar

 Hŏng klei ñu đru mguôp, thŭn 2012, khua mduôn K’Brel mâo Knơ̆ng bruă dhjar kreh mjuăt ktang asei mlei leh anăn hiu čhưn ênguê čar Lâm Đồng tŭ yap pô thâo mbruă tông čing čhar. Tŭ yap bruă ngă jih ai tiê, đru mguôp prŏng mơ̆ng khua mduôn K’Brel hlăm wưng êgao hŏng bruă kriê pioh, mđĭ lar dhar kreh čing čhar mnuih K’Ho Sre, thŭn 2021, Phŭn bruă dhar kreh - mjuăt ktang asei mlei leh anăn hiu čhưn ênguê tŭ yap ñu jing “Pô thâo mbruă êdah kdlưn” hlăm mnơ̆ng kriê pioh amâo êdah klă. K’Hữu pô ngă bruă Dhar kreh să Bảo Thuận, kdriêk Di Linh, čar Lâm Đồng brei thâo khua mguôn K’Brel jing klei ktưn hưn mnuih ƀuôn sang alŭ Krọt Dờng, leh anăn jih să Bảo Thuận:

“Khua mduôn jing jih ai tiê hŏng dhar kreh djuê ana aduôn aê, ñu răng kriê msĕ si mnơ̆ng yuôm bhăn, hlăm anăn mâo dhar kreh čing čhar. Sĭt anak čô čiăng tui duah, čiăng thâo, ñu gĭr kah mbha jih ai tiê, hlak mblang djăp phŭn agha kơ dhar kreh čing čhar, ayŭ brô̆ čiăng anak čô thâo kơ dhar kreh djuê ana. Hlei pô mâo klei čiăng thâo, ñu jih ai tiê lŏ mtô, hŏng klei khăp kơ čing čhar čiăng anak čô ênuk êdei khăp kơ dhar kreh djuê ana pô, tui hriăm. Kơ ênuk lŏ kriê pioh dhar kreh djuê ana, ară anei, grăp alŭ ti să mkŏ mjing leh sa êpul tông čing, phung hđeh raih leh anăn thâo tông čing leh. Hlăm anăn ai tiê ñu jing prŏng snăk hlăm bruă răng kriê mđĭ lar dhar kreh čing čhar ti alŭ wăl.

 Hŏng dŭm bruă khua mduôn K’Brel ngă leh leh anăn dôk ngă hŏng dhar kreh amâo êdah klăm čing čhar mnuih K’Ho Sre, čang hmăng, ênao čing char hŏng dhar kreh amâo êdah klă čing čhar srăng kwang nanao hŏng ênuk lŏ čuê anak čô mnuih K’Ho ti dap kngư Di Linh.

                                               Pô mblang: H’Zawut Ƀuôn Yă